Dyrektara bujnoj kampanii asudzili na 2,5 hoda «chatniaj chimii» pa siamiejnym fota z maršu
Dyrektara ZAT «Avanhard Lizinh» Antona Andrenku asudzili ŭ sudzie Leninskaha rajona Minska 13 sakavika pavodle č. 1 art. 342 Kryminalnaha kodeksa (udzieł u hrupavych dziejańniach, jakija hruba parušajuć hramadski paradak), piša «Viasna».
Sudździa Maryna Klimčuk pryznačyła jamu dva z pałovaj hady «chatniaj chimii». Da hetaha biznesoŭca ŭtrymlivali try miesiacy na Akreścina za «reposty ekstremisckich materyjałaŭ», a potym pieraviali na Vaładarku pa kryminalnym artykule.
Jak stała viadoma pravaabaroncam «Viasny», vosieńniu 2022 hoda pa «danosie nieabyjakavych hramadzian» adbyŭsia nalot siłavikoŭ na kampaniju «Avanhard Lizinh», u vyniku jakoha pa administracyjnych artykułach aryštavali 13 čałaviek, u tym liku dyrektara arhanizacyi i jaho pamočnika.
11 čałaviek vypuścili paśla pieršych «sutak», a Antona Andrenku i jaho pamočnika Alaksieja sudzili jašče niekalki razoŭ. Jak raspaviali pravaabaroncam ich byłyja sukamierniki, sudzili ich za «reposty ekstremisckich materyjałaŭ» pavodle art. 19.11 KaAP. Pa papiaredniaj infarmacyi, ich sudzili šeść razoŭ ahułam na 90 sutak.
«Ich trymali na Akreścina ŭ piakielnych umovach», — kaža adzin z sukamiernikaŭ.
Pakul Antona Andrenku ŭtrymlivali na Akreścina, supracoŭniki siłavych struktur znajšli ŭ jaho siamiejnaje fota z adnaho z maršaŭ u 2020-m hodzie. Za heta suprać mužčyny zaviali kryminalnuju spravu pavodle č. 1 art. 342 Kryminalnaha kodeksa (aktyŭny ŭdzieł u hrupavych dziejańniach, jakija hruba parušajuć hramadski paradak).
Dyrektara kampanii «Avanhard Lizinh» źmiaścili pad vartu ŭ SIZA-1, dzie ŭtrymlivali niekalki miesiacaŭ da suda.
13 sakavika ŭ sudzie Leninskaha rajona Minska Antona Andrenku asudzili da dvuch hadoŭ i šaści miesiacaŭ abmiežavańnia voli biez nakiravańnia ŭ papraŭčuju ŭstanovu adkrytaha typu.
-
Zamiest mietaładachoŭki — dubovaja dranica. U centry Viciebska na miescy milicyi adkryłasia kaviarnia ŭ biezdakorna adnoŭlenym 200‑hadovym budynku
-
«Ludzi damovilisia ŭ adzin čas vyjści ŭ łakalnyja ŭčastki i bić usich aktyvistaŭ». Ihar Łosik raskazaŭ pra bunt u Navapołackaj kałonii
-
Druhi vajskoviec, jaki zahinuŭ pry avaryi MAZa pad Asipovičami — 21‑hadovy tenisist ź Viciebska
Ciapier čytajuć
Druhi vajskoviec, jaki zahinuŭ pry avaryi MAZa pad Asipovičami — 21‑hadovy tenisist ź Viciebska3
Kamientary