U parłamiencie Litvy nie bačać patreby pašyrać sankcyi suprać biełarusaŭ
Śpikierka litoŭskaha parłamienta Viktoryja Čmilicie-Nilsen vykazałasia za nieabchodnaść praviadzieńnia kansultacyj z pamiežnaj słužbaj i inšymi dziaržaŭnymi ŭstanovami, jakija adkazvajuć za biaśpieku.
Staršynia Siejma Litvy Viktoryja Čmilicie-Nilsen zajaviła, što nie bačyć nieabchodnaści ŭnifikavać sankcyi suprać rasijanaŭ i biełarusaŭ, jak piša «Radyjo Svaboda».
«Mianie nie pierakonvaje arhumient prezidenta Naŭsiedy pra toje, što zakon treba źmianić abo pierahledzieć praz prysutnaść hrupoŭki «Vahnier» u Biełarusi. Tolki tamu, što rasijskija hramadzianie z terarystyčnaj hrupoŭki «Vahnier» pierajeduć u Biełaruś, jany nie stanuć biełaruskimi hramadzianami, tamu da ich buduć prymianiacca tyja ž patrabavańni, jakija dziejničali dahetul», — zajaviła Viktoryja Čmilicie-Nilsen 5 lipienia ŭ efiry radyjostancyi LRT.
U toj ža čas śpikierka litoŭskaha parłamienta vykazałasia za nieabchodnaść praviadzieńnia kansultacyj z pamiežnaj słužbaj i inšymi dziaržaŭnymi ŭstanovami, jakija adkazvajuć za biaśpieku, ci «bačać jany ŭ hetym prablemu i metazhodnaść bolš strohich norm zakonu i jahonaha pierahladu i ci ŭsio pad kantrolem».
«Pakul nie baču nieabchodnaści jaho pierahladać», — adznačyła Viktoryja Čmilicie-Nilsen.
Prezident Litvy Hitanas Naŭsieda 4 lipienia zajaviŭ ab nieabchodnaści ŭviadzieńnia adnolkavych abmiežavalnych mier dla biełarusaŭ i rasijanaŭ i arhumientavaŭ heta patencyjnym źjaŭleńniem na biełaruskaj terytoryi najmitaŭ rasijskaj PVK «Vahnier».
«Najbližejšym časam daviadziecca viarnucca da hetaha pytańnia, bo kala našych miežaŭ mohuć źjavicca ŭzbrojenyja ludzi ź biełaruskim hramadzianstvam, pad vopratkaj jakich buduć chavacca tyja samyja «vahnieraŭcy». Ja nie pałochaju, prosta prapanuju vielmi dobra padumać, u jakoj situacyi my ciapier znachodzimsia. Hetyja chłopcy peŭna nie adčuvajuć zhryzotaŭ sumleńnia, i ŭ adpaviednych rukach jany mohuć być vykarystanyja dla jakich-niebudź złamysnych metaŭ», — skazaŭ Hitanas Naŭsieda ŭ intervju telekanału LNK.
Uviesnu Siejm Litvy pryniaŭ pakiet nacyjanalnych sankcyj, jakija pieravažna dla rasijskich hramadzianaŭ zrabili bolš strohim paradak ujezdu i znachodžańnia na terytoryi krainy, a taksama abmiežavali pravy. U vyniku ažyŭlenych dyskusij biełarusy paźbiehli bolšaści abmiežavalnych zachadaŭ.
Hitanas Naŭsieda nakłaŭ na zakon vieta, damahajučysia adnolkavych abmiežavańniaŭ dla hramadzianaŭ Biełarusi i Rasii, ale parłamient adchiliŭ jaho prapanovy.
Zhodna z novym zakonam, z 2 maja 2023-ha da 3 maja 2024 hoda dla hramadzianaŭ Biełarusi i Rasii abmiežavali atrymańnie litoŭskich viz, elektronnaha statusu rezidenta, a taksama ŭvoz imi ŭkrainskich hryŭniaŭ.
Dla rasijanaŭ uskładnili mahčymaść nabyćcia nieruchomaści ŭ Litvie i spynili pryjom zajaŭ na atrymańnie vidaŭ na žycharstva.
Kamientary