Donalda Trampa aficyjna abvinavacili ŭ złačynstvie suprać dziaržavy i hramadzian — sprobie skasavać vyniki vybaraŭ

Eks-prezidentu ZŠA Donaldu Trampu ŭ aŭtorak vystaŭlenaje aficyjnaje abvinavačvańnie ŭ złačynstvie suprać Złučanych Štataŭ i ich hramadzian — u sprobie padmanam skasavać vyniki prezidenckich vybaraŭ 2020 hoda, piša Bi-bi-si.

Trampu zahadana źjavicca ŭ sud u Vašynhtonie ŭ čaćvier, 3 žniŭnia.

Biespartyjny śpiecprakuror Džek Śmit, jaki kantralavaŭ rasśledavańnie padziej 6 studzienia 2021 hoda, vystaviŭ Trampu abvinavačvańni pa čatyroch punktach:

• zmova z metaj padmanu Złučanych Štataŭ
• zmova z metaj pieraškodzić aficyjnym praceduram
• pieraškoda i sproba pieraškodzić aficyjnym praceduram
• zmova z metaj parušeńnia pravoŭ hramadzian.

Heta treciaje i samaje surjoznaje z kryminalnych abvinavačvańniaŭ, vyłučanych suprać Trampa, jaki pakul maje namier znoŭ bałatavacca ŭ prezidenty naleta.

Pa dvuch z hetych abvinavačvańniaŭ zakon praduhledžvaje da 20 hadoŭ turmy.

U tekście abvinavačvańnia, pieradadzienym u vialikaje žury ŭ sudzie Vašynhtona, havorycca, što Donald Tramp ćviorda navažyŭsia zastacca va ŭładzie paśla vybaraŭ 2020 hoda i «raspaŭsiudžvaŭ chłuśniu», zajaŭlajučy, što jon ich vyjhraŭ.

«Hetyja śćviardžeńni byli iłžyvymi, i abvinavačany viedaŭ, što jany iłžyvyja», — havorycca ŭ dakumiencie.

Kamanda Trampa, sabranaja im dla pieradvybarnaj kampanii, u svajoj zajavie nazvała abvinavačvańnie čarhovaj sprobaj umiašańnia ŭ chod prezidenckich vybaraŭ 2024 hoda.

Paplečniki Trampa zajaŭlajuć, što hetaja kryminalnaja sprava suprać jaho źjaŭlajecca «palavańniem na viedźmaŭ» i nahadvaje im pra nacysckuju Niamieččynu.

Sam Tramp za niekalki chvilin da taho, jak było aficyjna abvieščana ab novym abvinavačvańni, napisaŭ va ŭłasnaj sacsietcy Truth: «Ja čuŭ, prydumany Džek Śmit, kab umiašacca ŭ prezidenckija vybary 2024 hoda, vyłučaje čarhovaje falšyvaje abvinavačvańnie ŭ adras vašaha lubimaha prezidenta, mianie».

Džek Śmit u karotkim vystupie pierad žurnalistami paśla pieradačy abvinavačvańnia ŭ vialikaje žury Vašynhtona skazaŭ, što šturm Kapitolija prychilnikami Trampa 6 studzienia 2021 hoda byŭ spravakavany «chłuśnioj abvinavačanaha, meta jakoha składałasia ŭ padryvie asnoŭ funkcyjanavańnia ŭłady ŭ Złučanych Štatach».

Džek Śmit paabiacaŭ, što budzie damahacca, kab sud pa hetaj spravie prajšoŭ chutka, a zaviaršyŭ svaju zajavu napaminam, što Donald Tramp pavinien ličycca nievinavatym, pakul u sudzie nie dakazana advarotnaje.

• 15
• 0
• 0
• 1
• 0
• 1
• 1
• 0