Finskaja telekampanija apublikavała redkija videa Pucina z pačatku 1990-ch
Finskaja teleradyjokampanija Yle ŭ niadzielu apublikavała niekalki karotkich videa z udziełam ciapierašniaha rasijskaha prezidenta Uładzimira Pucina. Na ich jon — u adpačynku ŭ Finlandyi ŭ pačatku 1990-ch hadoŭ, kali zajmaŭ pasadu kiraŭnika Kamiteta źniešnich suviaziaŭ meryi Sankt-Pieciarburha, piša «Svaboda».
«Unikalnaje chatniaje videa pakazvaje, jak Pucin pravodziŭ volny čas na raskošnaj vile na poŭdni Finlandyi ŭ čas raspadu Savieckaha Sajuza», — anansuje vydańnie svaju publikacyju.
Yle źviartaje ŭvahu na adzieńnie Pucina — «śvietłuju majku i sinija spartovyja štany Adidas», a taksama na jaho rastrapanyja vałasy.
Pohladyvajuŝij ukradkoj v kamieru i odietyj v sportivnyj kostium Vładimir Putin zapiečatlen na domašniem vidieo – Yle publikujet sjemki niepubličnoj pojezdki v Finlandiju https://t.co/0Kc4lyz3dJ
«Takim byŭ Pucin da taho, jak razbahacieŭ: drennaja viatroŭka, drennaja pryčoska, drennaja kašula biez rukavoŭ», — cytuje vydańnie Luka Chardynha, ekśpierta pa Rasii, žurnalista The Guardian.
Videa, jakoje patrapiła ŭ rasparadžeńnie Yle, było źniata ŭ Finlandyi padčas pieršamajskich vychadnych u pačatku 1990-ch hadoŭ. Dakładny hod nie nazyvajecca.
Na videa pakazana, jak Pucin u majcy i spartyŭnych štanach hulaje ŭ pinh-ponh u pary sa svaim načalnikam, tahačasnym meram Pieciarburha Anatolem Sabčakom suprać dvuch mierkavanych achoŭnikaŭ. Na videa taksama patrapiŭ momant, kali Pucin, Sabčak i jašče niekalki ludziej abiedajuć na terasie.
Videa, jak piša Yle, było źniata na pradstaŭnickaj vile kampanii Thomesto Group, jakaja viała biznes u Rasii. Miesca dziejańnia — vostraŭ na paŭdniovym uźbiarežžy Finlandyi.
Finskaja kampanija Thomesto impartavała nieapracavanuju draŭninu z Rasii, «tamu suviazi z kiraŭnikami jaje ŭschodniaha susieda byli dla jaje žyćciova važnyja», — piša vydańnie.
Yle nie nazyvaje krynicu videa, «bo reakcyja Pucina na vykryćcio jaho asabistaha žyćcia moža być niepradkazalnaj». Uryvak raniej byŭ apublikavany ŭ Youtube, ale jaho chutka adtul vydalili.
Vydańnie taksama parazmaŭlała z adnym ź finskich biznesmienaŭ, jaki byŭ na vile padčas vizitu Sabčaka i Pucina. Jon raskazaŭ, što hulaŭ z Pucinym u pinh-ponh. Taksama padčas vizitu hości łavili rybu. Na adnym ź videa Pucin i Sabčak razam z top-mieniedžaram Thomesto jeduć na łodcy. U adpačynku, miarkujučy pa ŭsim, prysutničali tahačasnaja žonka Pucina Ludmiła i jaho dočki.
Na videa, dzie Sabčak z Pucinym abiedajuć, mer Pieciarburha reža vialiki kavałak miasa. «Heta treba puścić na telebačańnie, pakazać, jak siłkujecca mer, kości hryzie», — žartuje ŭ kadry Pucin. «Hrupa jeść smažaninu i žartuje ab svaim abžorstvie, u toj čas jak ludzi ŭ ich rodnym horadzie pakutujuć ad niedachopu ježy», — piša Yle. Pry hetym finski ŭdzielnik sustrečy adznačaje, što Pucin trymaŭsia strymana, nie kazaŭ ničoha pra «žančyn i žyćcio» i amal nie piŭ śpirtnoha.
«Hulec u pinh-ponh, jaki mieŭ źlohku rastrapanyja vałasy i svabodnyja spartyŭnyja štany, z taho času zmoh palepšyć svoj imidž dziakujučy vialikaj kolkaści hrošaj i nieabmiežavanaj uładzie.
Kančatkovy vynik vyhladaje zmročna», — kanstatuje Yle, adznačajučy, što ciapier 71-hadovy Pucin «kuplaje samaje darahoje modnaje adzieńnie, jakoje tolki možna kupić za hrošy, i navat nie robić vyhladu, što identyfikuje siabie z prostymi ludźmi».
Pucin uznačalvaŭ Kamitet źniešnich suviaziaŭ u administracyi Pieciarburha z 1991 pa 1994 hod, da 1996 byŭ namieśnikam mera horada. Šmatlikija śviedki padziej u horadzie ŭ tyja hady, u tym liku znajomyja Pucina, ličać, što jon byŭ datyčny da niezakonnych schiem, mieŭ suviazi z arhanizavanaj złačynnaściu. Nivodnaje z hetych abvinavačvańniaŭ nie razhladałasia ŭ sudzie i nie było dakazana. U atačeńnie Pucina pa-raniejšamu ŭvachodzić šerah asob, što pracavali ź im u Pieciarburhu ŭ 1990-ja hady.
Padčas vajny Pucin zakłapočany novaj jachtaj. U hetym jamu nasustrač iduć jeŭrapiejcy FOTY
U Pucina znajšli jachtu za 700 miljonaŭ dalaraŭ VIDEA
Niamieckaja palicyja aryštavała 30 karcin ź jachty aliharcha Usmanava. Siarod ich była karcina Marka Šahała
Na Sardzinii źnikła jachta rasijskaha aliharcha Maziepina
Kamientary