Takoha cnatlivaha pakaleńnia daŭno nie było. Voś što viadoma pra moładź 13-24 hadoŭ
Navukoŭcy vyśvietlili, što ciapierašniaj moładzi nie padabajucca seksualnyja sceny ŭ kino. I nie tolki heta.
Sacyjołahi Kalifarnijskaha ŭniviersiteta ŭ miežach daśledavańnia «Padletki i ekran» pryjšli da vysnovy, što pradstaŭniki pakaleńnia Z bolš cikaviacca siužetami filmaŭ i sieryjałaŭ, dzie hałoŭnaj temaj źjaŭlajucca płataničnyja siabroŭskija adnosiny, a nie seks-sceny. Pra heta piša vydańnie Euronews.
Navukoŭcy praviali apytańnie siarod 1500 maładych ludziej 13-24 hadoŭ. Bolš za pałovu ź ich (51,5%) pryznalisia, što im padabajucca filmy, dzie hałoŭnaje miesca zajmajuć siabroŭskija adnosiny. Niahledziačy na papularnaść takich šou, jak «Pałavaja adukacyja» i «Ejfaryja»,nasyčanych eratyčnymi scenami, amal pałova apytanych ličyć, što bolšaść filmaŭ i sieryjałaŭ mahła b abyścisia biez takoj kolkaści seksu, a 44,3% uvohule śćviardžajuć, što tema kachańnia ŭ miedyjaprastory źjaŭlajecca začasta.
Sacyjołahi, jakija pravodzili daśledavańnie, navat dali hetaj źjavie nazvu «noŭmans» (nomance, abjadnańnie anhlijskich słovaŭ no i romance, ci prosta admaŭleńnie ramantyki).
U čym pryčyny takoj źjavy? Daśledčyki śćviardžajuć, što vinavatyja pandemija karanavirusa i sacyjalnaja izalacyja, padčas jakoj u moładzi źjaviŭsia zapyt na bolš zdarovyja adnosiny i ŭ žyćci, i na kinateleekranach.
«Maładyja ludzi adčuvajuć niedachop blizkich siabroŭskich adnosin, adryŭ ad hramadstva i toje, što ličbavaja identyčnaść vyciaśniaje realny śviet», — tłumačycca ŭ ese, pryśviečanym vynikam daśledavańnia.
Reč nie ŭ tym, kažuć ekśpierty, što moładź nie cikavicca seksualnaj tematykaj u kino i miedyja, a ŭ tym, što jany chočuć bačyć roznyja vidy adnosin.
Rost tendencyi «noŭmansu» taksama spałučajecca z vynikami daśledavańniaŭ, jakija vyjavili panižeńnie seksualnaj aktyŭnaści siarod pradstaŭnikoŭ pakaleńnia Z.
Pa danych apytańnia Centra pa kantroli i prafiłaktycy zachvorvańniaŭ ZŠA, jakoje pravodzicca raz u dva hady, u 2021 hodzie tolki 30% niepaŭnaletnich padletkaŭ užo ŭstupali ŭ seksualnyja adnosiny, što na 8% nižej, čym u 2019 hodzie. U papiarednija dziesiacihodździ heta zdarałasia z 50% padletkaŭ.
Jak kažuć navukoŭcy, heta dobraja źjava, pry ŭmovie, što raście kolkaść ludziej, jakija śviadoma nie ŭstupajuć u pałavyja kantakty ŭ rańnim uzroście, ale i vyrašajuć skaracić kolkaść seksualnych partnioraŭ. Z druhoha boku, heta moža być taksama niehatyŭnaj prajavaj taho, što ŭsio bolš maładych ludziej majuć składanaści z zaviazvańniem afłajnavych adnosin z procilehłym połam.
Kamientary