Usio bolš vytvorcaŭ praduktaŭ i kaśmietyki pierachodziać na minimalistyčny dyzajn upakoŭki

Sproščanaja ŭpakoŭka, jakuju siońnia možna pabačyć usio čaściej, nahadvaje minimalistyčnaje mastactva, jakoje kvitnieła ŭ 1960-ja hady. Tady reakcyja na praźmierna składanyja tvory mastactva, jakija źjaŭlalisia ŭ toj pieryjad u zachodniaj kultury, charaktaryzavałasia skupaściu i abstraktnaściu. Usie elemienty, jakija ličylisia niepatrebnymi, vydalalisia.

U niadaŭnim daśledavańni z udziełam daśviedčanych markietołahaŭ, pra jakoje raspaviadaje The Conversation, daśledčyki pasprabavali vyśvietlić, ci sapraŭdy pakupniki addajuć pieravahu praściejšaj upakoŭcy — i, kali tak, to čamu.

Kali mienš značyć bolš

Pa-pieršaje, daśledčyki chacieli daviedacca, ci hatovyja pakupniki płacić bolš za pradukty ź minimalistyčnym afarmleńniem. Byli praanalizavanyja bolš za 1000 spažyvieckich tavaraŭ, siarod jakich znachodzilisia šampuni, dezadaranty, krekiery i krupy z najbujniejšaj sietki supiermarkietaŭ u ZŠA.

Spačatku daśledčyki vyznačyli, nakolki prostym ci składanym byŭ dyzajn kankretnaj upakoŭki, i skłali adpaviednyja rejtynhi, raźbiŭšy tavary pa hrupach. Vyjaviłasia, što roźničnyja ceny na tavary ŭ «prostaj» upakoŭcy zvyčajna vyšejšyja, čym na anałahičnyja pradukty sa «składaniejšym» azdableńniem. Vyšejšyja roźničnyja ceny śviedčać ab tym, što pakupniki hatovyja płacić bolš za pradukty ŭ takoj upakoŭcy, robiać vysnovu daśledčyki.

Pavialičyć

Dalej u sieryi ekśpierymientaŭ studentaŭ adnaho z univiersitetaŭ paprasili pahladzieć na roznyja ŭpakavanyja pradukty i skazać, kolki jany hatovyja zapłacić za hetyja pradukty. Taksama studentaŭ pytali, kolki inhredyjentaŭ, na ich dumku, moža ŭtrymlivacca ŭ praduktach i nakolki «čystymi» jany ŭsprymajuć hetyja pradukty.

Daśledčyki vyjavili, što pieravaha prostaj upakoŭki była źviazana z tym, što sproščany dyzajn dasyłaŭ tonki, ale mahutny sihnał: «čyścinia». Prostaść upakoŭki prymusiła ŭdzielnikaŭ mierkavać, što pradukt źmiaščaje mienš inhredyjentaŭ, a taksama mienš kansiervantaŭ, farbavalnikaŭ i štučnych aramatyzataraŭ. Ludzi hatovyja płacić bolš za pradukty biez dadatkaŭ abo chimičnych rečyvaŭ — heta tyčycca jak ježy, tak i čyściačych dy myjnych srodkaŭ.

Niekalki brendaŭ prademanstravali zdolnaść pryciahvać pakupnikoŭ prostaj upakoŭkaj. Tak, naprykład, u skrynkach adnaho z brendaŭ kašy vykarystoŭvajecca pryhłušanaja kalarovaja hama i paźbiahajuć pierahruzki ŭpakoŭki niejkimi śćviardžeńniami abo padrabiaznymi apisańniami praduktaŭ. Va ŭpakoŭcy asabliva ŭpadabanych udzielnikami daśledavańnia johurtaŭ vykarystoŭvajecca šmat biełaj prastory, tyja ž pryhłušanyja kolery i prostyja vyjavy, što padkreślivajuć tolki važnyja detali pradukta.

Kali mienš značyć mienš

Adnak prosty dyzajn upakoŭki nie zaŭsiody efiektyŭny. Vyjaviłasia, što pradukty ad mienš viadomych brendaŭ nie atrymlivajuć takich ža pieravah ad minimalistyčnaj upakoŭki. U vypadku z tak zvanymi «niabrendavymi tavarami» (jakija zvyčajna pradajucca ŭ kramach pa canie, nižejšaj za «brendavyja») prostaść upakoŭki, zdajecca, supadaje ź pierakanańniami i čakańniami klijentaŭ, što nieviadomyja brendy mienš inviestujuć u jakaść svajoj pradukcyi.

Takim čynam, na pieravahu prostaj upakoŭki mohuć paŭpłyvać i žadańni pakupnikoŭ. Kali ludzi šukajuć bolš zdarovyja varyjanty, jany hatovyja płacić bolš za pradukty z praściejšaj upakoŭkaj. Adnak kali spažyŭcy žadajuć papieścić siabie niezdarovaj ježaj, jany bolš schilnyja nabyvać pradukty sa składanaj upakoŭkaj, jakaja śviedčyć pra vialikuju kolkaść inhredyjentaŭ i nižejšy ŭzrovień «čyścini» — heta tyja samyja jakaści, jakija spažyŭcy źviazvajuć z bolšym smakam.

Što ŭ Biełarusi?

U Biełarusi pa tradycyi svaja atmaśfiera. Trendy da minimalistyčnaha dyzajnu tut časta dyktuje nie markietynh, a palityka. Jaskravy prykład: upakoŭki Tetra Pak. Jarkija ŭpakoŭki sokaŭ stajuć biełymi i minimalistyčnymi, źnikajuć firmovyja elemienty i zastajucca tolki vyjavy sadaviny na adnym baku tary. Što ž adbyłosia?

Paśla abjaŭleńnia kampanijaj Tetra Pak ab sychodzie z RB i RF u siaredzinie 2022 hoda z-za «niemahčymaści padtrymlivać apieracyjnuju dziejnaść» novym uładalnikam biznesu daviałosia znoŭku šukać pastaŭščykoŭ i materyjały.

Pavialičyć

Vyjaviłasia, što heta nie tak prosta. Reč u tym, što na rynku niama poŭnych anałahaŭ hetaha asieptyčnaha pakavańnia praciahłaha terminu zachoŭvańnia. Tamu na zavodach banalna zakančvajecca farba, jakaja impartavałasia ź Jeŭropy, bo ŭźnikli prablemy z pastaŭkami syraviny z-za sankcyj. Mahčyma, chutka pryjdziecca viarnucca da kłasičnych «saŭkovych» małočnych butelek i šklanak, što dakładna paraduje ŭsich tych, chto nastalhuje pa SSSR.

• 5
• 0
• 5
• 0
• 1
• 2
• 2
• 0