Biełaruskaja kulturnaja prastora CreateCulture Space u Vilni na miažy zakryćcia

«Nie lublu takoje, kaniešnie, pisać, ale situacyja takoje sabie. My doŭha znachodzilisia ŭ režymie «robim prajekty i nie bačym ničoha», nie chacieli vieryć u toje, što nastanie takaja situacyja, dzie my budziem kazać pra prypynieńnie dziejnaści našaj kulturnaj placoŭki i arhanizacyi. Ale jość jak jość. My ciapier u situacyi, što 11 listapada, na naša dvuchhodździe, my pakličam usich na raźvitalnuju viečarynu», — paviedamiła ŭ sacyjalnych sietkach Nadzieja Ilkievič.

CreateCulture Space — heta biełaruskaja prastora ŭ Vilni, dzie rehularna prachodziać roznyja mierapryjemstvy: vystavy, sustrečy ź piśmieńnikami, kancerty i inšaje. Stvaryli jaje Nadzieja Ilkievič i Taćciana Štejnbuk.

— Ja z 2017 hoda žyła za miežami Biełarusi — u ZŠA, Ukrainie, Čechii. Ale pratesty na radzimie, vajna va Ukrainie dy inšyja padziei abudzili ŭva mnie znoŭ vialikaje žadańnie rabić niešta dla biełaruskaj kultury.

Pavialičyć

U 2022 hodzie, paraiŭšysia z Taćcianaj, Nadzieja pryniała rašeńnie zvolnicca sa stabilnaj pracy ŭ Prazie i pajechać u Vilniu, kab razam zasnavać arhanizacyju, jakaja budzie raźvivać biełaruski kreatyŭny siektar. Tady ŭ ich atrymałasia znajści finansavańnie. Nie biez honaru Nadzieja adznačaje, što pieršy miesiac pracy placoŭki byŭ raśpisany jašče da aficyjnaha adkryćcia.

— My pieratvarylisia ŭ svojeasablivy inkubatar: da nas źviartajucca pačynajučyja tvorcy, pačynajučyja mieniedžary kultury, jakim patrebna prastora, dzie jany mahli b pasprabavać svaje siły i zrabić pieršy prajekt. Dla nas važna być placoŭkaj, dzie možna zrabić pamyłku, ale atrymać padtrymku. My namahajemsia nie zarubać inicyjatyvy, a padtrymlivać. Mienavita praz heta składana pastavić CreateCulture Space na kamiercyjnyja rejki.

Nadzieja adznačaje, što za dva hady ich kamanda praviała bolš za 600 roznych iventaŭ. Siarod prajektaŭ, jakimi asabliva hanarycca kamanda, — «Pierfaratar», u ramkach jakoha biełaruskija muzyki mohuć jakasna zapisać treki.

— My ličym, što biełarusam treba vychodzić sa svajoj burbałki, i imkniomsia prasoŭvać ajčynnuju kultury na mižnarodny ŭzrovień. Razam ź litoŭcami my rabili «Muzyčnuju łabaratoryju», padčas jakoj biełaruskija i litoŭskija muzyki stvarali muzyku. Potym byŭ sumiesny kancert na dachu Muzieja enierhietyki i techniki.

Vizitoŭkaj Nadzieja ličyć i «Kinakalady», kali kamandy z roznych krain sprabavali pieraasensavać temu biełaruskich Kalad i na praciahu 48 hadzin stvarali kino — paśla tyja pracy pakazvali ŭ adnym z kinateatraŭ Vilni.

Mnohija mierapryjemstvy prachodzili ci za pracent ad danataŭ, ci ŭvohule biaspłatna.

— Situacyja skłałasia tak, što na dadzieny momant my nie majem paćvierdžanaha finansavańnia. Nam vielmi nie chočacca zakryvacca, tamu spadziajomsia, što vyjdziem ź niaprostaj situacyi.

Kamanda prajekta prosić dapamohi nieabyjakavych ludziej.

— Dapamahčy možna pa-roznamu. Možna zrabić repost u sacyjalnych sietkach, kab bolš ludziej daviedalisia pra našu prastoru. Možna da nas zavitać i zrabić danat najaŭnymi ci achviaravać praz płatformu Buymeacoffee. Kali vy arhanizujecie mierapryjemstvy, možacie arandavać u nas placoŭku za hrošy. Taksama možacie skarystacca pasłuhami našaha videa-pradakšanu. Kali vy znajomyja ź niejkimi arhanizacyjami, jakija padtrymlivajuć raźvićcio biełaruskaj hramadzianskaj supolnaści, možacie nakiravać ich da nas.

• 4
• 0
• 1
• 0
• 0
• 12
• 0
• 0