«Źlataŭ na Bali — zrabiŭ usio, što treba». Jak rełakanty jeździać na lačeńnie ŭ inšyja krainy

«Źlataŭ u adpačynak — i zrabiŭ usio, što treba, za €450 na Bali»

— Ja žyvu ŭ Niderłandach užo 4 hady, ale časta lačusia ŭ inšych krainach.

Adnojčy ja złamaŭ vialikuju halonkavuju kostku. Na žal, miascovy doktar nie pavieryŭ u pierałom, a pravodzić abśledavańnie, vidać, jaho nie navučyli. Nakiravańnie da traŭmatołaha jon vydać admoviŭsia. Tamu ja źviarnuŭsia da daktaroŭ… u Litvie.

Lacieć tudy było niadoraha (pamiataju, što daroha abyšłasia mnie ŭ €150 u abodva baki), i ja lublu Vilniu. Trapić na pryjom taksama akazałasia nie składana — ja zapisaŭsia zahadzia. Kolki kaštavaŭ pryjom, užo i nie pamiataju — usie vydatki na lačeńnie byli kampiensavany pa strachoŭcy z Allianz.

Pierałom, viadoma, paćvierdziŭsia. Ciapier hetym doktaram zojmiecca miascovaja tuchtcollege — heta ŭračebnaja kamisija, jakaja razhladaje skarhi na rabotnikaŭ miedycyny. Padać skarhu kaštuje €50, jakija viernuć, kali skarha budzie całkam abo častkova abhruntavanaj.

Taksama mnie nie raz davodziłasia jeździć u inšyja krainy pa leki: za momietazonam, naprykład, ja jeździŭ u Bielhiju, bo tut jaho biez recepta nie kupiš, a recept treba «vytrymać» (majoj kalezie nie davali navat pry zapuščanym hajmarycie).

Mnie adnojčy daviałosia na praciahu tydnia kožny dzień telefanavać da doktara — u vyniku jana skazała, što recept usio ž taki vypiša, ale «ličyć, što heta rana». A ŭ Bielhii ja kupiŭ leki biez recepta ŭ pieršaj ža aptecy, jakaja trapiłasia.

Kali patrebnyja antybijotyki, ja mahu zamović ich ź inšych krain. Naprykład, «Sumamied» mnie pryvozili z Rasii. Kali patrebna pryznačeńnie — biaru vypadkovy bilet kudyści, kudy praściej/tańniej: u Litvu, Čechiju ci Polšču.

Zuby ŭ Niderłandach lačyć składana i doraha. Kab prypisacca da stamatołaha, treba zapłacić €150 za ahlad — pry pieršym naviedvańni i pry nastupnych, kali daŭno nie byŭ. Usio astatniaje jašče daražej. U niejki momant ja navat atrymaŭ «płan lačeńnia na N tysiač».

Ale ja źlataŭ u adpačynak — i zrabiŭ usio, što treba, za €450 na Bali. Abyšłosia tańniej, navat kali ŭličyć košt bileta.

Ja taksama lačyŭ zuby ŭ Prazie i Vilni. U Prazie šmat ruskamoŭnych daktaroŭ — i pasłuhi tam tańniejšyja. Ja rabiŭ čystki i staviŭ płomby. Da taho ž prosta pahulać pa Prazie cikava — tam pryhoža.

U Indaniezii, darečy, ja lačyŭ zuby ŭ vielmi dobraj klinicy — tudy zapisacca niaprosta, asabliva ŭ chaj-siezon, kali tam napłyŭ aŭstralijcaŭ. A lečać tam tak akuratna, što ja admaŭlaŭsia ad aniestezii, kali rabili płomby. Košt płomby tam kala €41,5, i ŭ miascovaj valucie jon nie źmianiaŭsia z 2018 hoda.

«Jeździła na ahlad ź Litvy ŭ Polšču, kožny vizit — 350 złotych»

— Padčas druhoj ciažarnaści ja jeździła da akušera-hiniekołaha ź Litvy ŭ Polšču.

Lubaja žančyna vam skaža: kali tabie pašancavała znajści dobraha hiniekołaha — trymajsia za jaho. A mnie vielmi pašancavała. Ja pačała chadzić da jaje jašče tady, kali žyła ŭ Biełarusi (jana była vielmi papularnaja jak lekar). Hetaja doktar viała maju pieršuju ciažarnaść — i ja była ad jaje ŭ zachapleńni.

U 2021 hodzie ja pierajechała ŭ Litvu razam z kampanijaj muža (maja kampanija, na žal, nie rełakavała supracoŭnikaŭ, ale dazvalała pracavać na dystancyjcy ź luboj krainy). I znoŭ zaciažaryła. Ustała na ŭlik u Litvie. Ale ź litoŭskim śpiecyjalistam u nas «metča» nie adbyłosia — na lubuju maju skarhu (a ŭ mianie byŭ taki žachlivy taksikoz, što ja skardziłasia pastajanna) jon kazaŭ, što «heta narmalna». I ničoha bolš.

Ja pastajanna pisała ŭ telehram svajmu akušeru-hiniekołahu, i ščaście, što jana adkazvała (choć nie była abaviazana), davała parady, jakija analizy zdać i inšaje. Adzin raz ja navat chacieła pajechać u Biełaruś, kab jana mianie ahledzieła, ale muž paličyŭ, što heta moža być niebiaśpiečna, — i nie adpuściŭ.

Nieŭzabavie maja doktar taksama źjechała ź Biełarusi — u Polšču. I ja pačała jeździć da jaje na ahlad — kožny vizit abychodziŭsia ŭ 350 złotych (plus daroha — kali na aŭtobusie, to heta kala 20 jeŭra ŭ adzin bok).

Chtości paličyć heta maim kapryzam. A ja adkažu: vy, napeŭna, prosta nie byli ciažarnymi. Mnie treba było całkam daviarać uraču — i ščaście, što ŭ mianie była mahčymaść naviedvacca nie tolki da litoŭskaha śpiecyjalista.

Maja akušer-hiniekołah pryznačyła mnie preparat, jaki nie pradavaŭsia ŭ Litvie, — i za im taksama treba było jeździć u Polšču. Zvyčajna ja zakuplałasia, kali jechała da jaje na pryjom — amal «miaškami» (žartuju, ale ŭpakovak i praŭda było niamała). Ale adnojčy ja dzieści zhubiła apošniuju ŭpakoŭku lekaŭ (učora była na tumbačcy — a siońnia niama). Tamu daviałosia z samaj ranicy terminova adpravić muža na aŭtobusie ŭ Suvałki — heta najbližejšy da Litvy polski horad.

Ja b i naradžała ŭ Polščy, ale muž paličyŭ, što heta lišniaje. Da taho ž rody pačalisia raptoŭna — na try tydni raniej za termin. Siarod nočy ŭ mianie adyšli vody.

Pakul jechali ŭ balnicu, ja skardziłasia, što lepš by my na ŭsiu chutkaść jechali da majho ŭrača. Ale muž nie paddaŭsia na maje ŭhavory i «burčańnie» — a ŭžo praz paru hadzin naradziŭsia naš mały.

«Ałbanski doktar prapanavaŭ pamianiać karonki, jakija ja staviła ŭ Polščy. Bo jany — «shit»

— Ja zajmałasia hałoŭnym čynam stamatałahičnym turyzmam. Pierad adjezdam ź Biełarusi (jon byŭ płanavy, i zdaryŭsia na pačatku 2020 hoda) dumała, što dobra palačyła zuby. 

Ale ŭvosień 2021 hoda vypała płomba. Pryjšła ŭžo da polskaha doktara — i mnie skazali, što treba palačyć kanały ŭ troch zubach minimum. A dalej — stavić karonki. Adzin kanał kaštuje 600 złotych (140 jeŭra). Karonka — ad 2 tysiačaŭ (465 jeŭra). 

Ja paŭśmichałasia, vyjšła z kabinietu stamatołaha i adrazu napisała siabram u Lvovie i Kijevie z pytańniem: «Za kolki i dzie vy lečycie zuby?» Jany vysłali niekalki kantaktaŭ. 

Pa prykładnych acenkach lačeńnie zuba ŭ Lvovie vychodziła ŭ 4 razy tańniej za Polšču. 

Samalot (a tady va Ukrainu latali cyvilnyja samaloty) kaštavaŭ u dva baki 80 złotych (19 jeŭra). Žyć ja mahła ŭ siabroŭ. Vychodziła nu vielmi vyhadna. Ja vybrała kliniku va Lvovie, my kamunikavali praz Facebook-mesandžar. Usio było vielmi pilna i apieratyŭna. Ja pisała im pa-biełarusku, jany mnie — pa-ukrainsku. U vyniku ja prylacieła pieršy raz, mnie pačyścili niekatoryja kanały. Składana skazać kolki ahułam ja zapłaciła, bo tady ja kajfavała ad Lvova. Pamiataju, što adzin vizit kaštavaŭ niedzie 6 tysiač hryvień (tady 180 jeŭra) heta było ŭ listapadzie 2021 hoda), a ahułam ich było 4 abo 5. 

Za hety čas ja pastaviła 2 karonki, pieralačyła ŭsie kanały, zrabiła čystku. Servis najvyšejšaha ŭzroŭniu! Kamunikacyja, abstalavańnie, padychod da pacyjentaŭ… Plus ačaravańnie majho lubimaha Lvova.

Ja jeździła va Ukrainu lačyć zuby trojčy. U listapadzie, śniežni i lutym 2022 hoda. Źjechała adtul 16 lutaha, nastupny vizit byŭ zapłanavany na sakavik. Na žal ja tudy ŭžo nie viarnułasia — biełarusam ujezd va Ukrainu zabaronieny. Dy j košty na stamatałohiju va Ukrainie mocna vyraśli. 

Mnie zastałosia pastavić va Ukrainie dźvie karonki. Ja vyrašyła zrabić heta ŭ Polščy. Adna kaštavała 1400 złotych (325 jeŭra). Zrabiła — i dumała što zabyła pra ich.

Uviesnu moj chłopiec schadziŭ da stamatołaha i vyśvietliłasia, što ŭ jaho prablemy z zubami. Lačeńnie budzie kaštavać kala 4 tysiač złotych (930 jeŭra). Pamiatajučy pra svoj dośvied stamatałahičnaha turyzmu, ja prapanavała jamu pašukać alternatyvu za miažoj. Znajomyja niešta pisali pra Ałbaniju, voś ja i vyrašyła źviarnucca da tutejšych lekaraŭ. Zaadno možna pačylić na mory. 

My šmat pierabrali klinik, navat šukali na Reddit. Usie pryhody apisvać nie budu, usio-taki bałkanski padychod da pracy — heta vyprabavańnie dla ŭschodniesłavianskaj dušy. 

U vyniku trapili ŭ kliniku ŭ Ciranie pa rekamiendacyi žančyny, u jakoj my zdymali kvateru. Vielmi spadabaŭsia lekar: spakojny, razvažlivy, navat padtrunivaŭ nad nami. Płomba kaštavała ŭ jaho 30 jeŭra, vyrvać zub mudraści — 50 jeŭra. 

Mnie lekar prapanavaŭ pamianiać karonki, jakija ja staviła ŭ Polščy. Bo jany — «shit» (heta ja cytuju). Adna full zirconia karonka kaštavała 200 jeŭra.

Paśla vizitu ŭ Ałbaniju ja vyrašyła, što da polskich stamatołahaŭ bolš nie pajdu. U mianie vyjaviłasia prablema, i ŭsio, što ja atrymlivała ad palakaŭ — isteryka i prapanovy vyrvać zuby i pastavić impłanty (i toje, «kali atrymajecca»). Ałbancy i ŭkraincy chutčej kažuć: «Nie pieražyvaj, kali nie balić, to možna žyć». Hetaja stratehija mnie bolš padychodzić. 

Inšaha dośviedu ŭ mianie nie było. Naŭrad ci ja b pajechała pa apieracyi abo płanavanyja abśledavańni ŭ inšuju krainu. Tolki kali budu tam znachodzicca davoli doŭhi čas. 

Ale maja znajomaja polka naradžała dzicio ŭ Čechii. Kaža, što tam značna lepiej. Asabliva kali ŭličvać polskuju situacyju z abortami — kali niešta pojdzie nie tak, pamre i maci, i dzicia. U Čechii takaja situacyja niemahčymaja.

• 0
• 0
• 0
• 0
• 0
• 1
• 0
• 0