«Hiermanija viartajecca»: budučy kancler Mierc damoviŭsia ab reformie abmiežavańniaŭ na dziarždoŭh

Lidar partyi CHDS/CHSS, što pieramahła na vybarach, i vierahodny budučy kancler Frydrych Mierc damoviŭsia ab reformie kanstytucyjnych abmiežavańniaŭ na pamier dziarždoŭhu, kab rezka pavialičyć vydatki na abaronu i infrastrukturu, piša Bi-bi-si.

Mierc raniej užo damoviŭsia z sacyjał-demakratami ab stvareńni kaalicyjnaha ŭrada. U sumie dźvie partyi atrymajuć prostuju bolšaść u budučym składzie Bundestahu.

Adnak bolš składanaj prablemaj było toje, što ŭ Hiermanii nazyvajuć «daŭhavym tormazam»: u 2009 hodzie ŭ Kanstytucyju było ŭklučana pałažeńnie (artykuł 109, punkt 3), jakoje abaviazvaje ŭrad bałansavać vydatki i dachody biez pryciahnieńnia pazyk.

Hetaje abaviazacielstva pieraškadžała Hiermanii chutčej pavialičvać vydatki na abaronu, što ličyłasia nieabchodnym va ŭmovach rasijskaj ahresii suprać Ukrainy, pahroz z boku Rasii inšym jeŭrapiejskim krainam, a ŭ apošni čas — jašče i sumnievaŭ u nadziejnaści sajuzu z ZŠA pry administracyi Trampa, pra što kazaŭ i sam Mierc.

Akramia taho, žorstkija abmiežavańni na pazyki pryviali da niedafinansavańnia infrastruktury, i jaje znošanaść pačała adčuvacca ŭ paŭsiadzionnym žyćci.

Adnak dla źmieny Kanstytucyi nieabchodna bolšaść u dźvie traciny hałasoŭ deputataŭ. U novym składzie Bundestahu dasiahnuć hetaha budzie ciažka: u im budzie bolš deputataŭ ad radykalnych partyj — Levaj i asabliva ŭltrapravaj «Alternatyvy dla Hiermanii» (AdH), jakija vystupajuć suprać pavieličeńnia vydatkaŭ na abaronu.

Tamu palityki-centrysty vyrašyli prahałasavać za źmienu Kanstytucyi ŭ ciapierašnim składzie parłamienta, jaki farmalna zachoŭvaje svaje paŭnamoctvy da pieršaha pasiadžeńnia novaha Bundestahu, pryznačanaha na 25 sakavika. U starym parłamiencie CHDS/CHSS, sacyjał-demakraty i «Zialonyja» mahli b sabrać dźvie traciny hałasoŭ, kali b damovilisia pamiž saboj.

Pieramovy Mierca z «Zialonymi» doŭžylisia 10 hadzin, ale ŭ vyniku budučy kancler abviaściŭ pra ich pośpiech.

Hałasavańnie pa źmienach u Kanstytucyju pavinna adbycca ŭ aŭtorak, 18 sakavika. «Levyja» i AdH sprabavali asprečyć pravamocnaść hetaha pasiadžeńnia ŭ Kanstytucyjnym sudzie, ale sud adchiliŭ ich skarhi.

«Hiermanija viartajecca, — zajaviŭ Mierc. — Hiermanija ŭnosić vialiki ŭkład u abaronu svabody i miru ŭ Jeŭropie».

Ab čym damoviŭsia Mierc u detalach

• Rezka buduć pavialičany vydatki na abaronu, abaronu hramadzianskaha nasielnictva i raźviedku. Vydatki vyšej za 1% VUP nie buduć uličvacca pry raźliku abmiežavańniaŭ na pazyki.
• Budzie stvorany śpiecyjalny fond u 500 miljardaŭ jeŭra dla inviestycyj u infrastrukturu na bližejšyja 10 hadoŭ. 100 miljardaŭ jeŭra ź ich buduć nakiravany na mierapryjemstvy, źviazanyja sa źmienaj klimatu.
• 16 niamieckich ziemlaŭ taksama zmohuć zajmać u miežach 0,35% VUP.
• Vydatki na dapamohu dziaržavam, «jakija padvierhlisia napadu z parušeńniem mižnarodnaha prava», taksama nie buduć uličvacca pry raźliku dachodaŭ i vydatkaŭ.

Apošniaje pałažeńnie dazvolić dziejučamu kancleru Ołafu Šolcu padpisać pakiet dapamohi Ukrainie ŭ 3 miljardy jeŭra ŭžo na nastupnym tydni.

• 11
• 0
• 0
• 2
• 0
• 0
• 0
• 0