«Vy zvyčajnuju palikliniku vystavili piekłam». Pryvatnaja žanočaja klinika zrabiła virusnuju rekłamu, ale atrymała chvalu chejtu
Pryvatny miedycynski centr Eva clinic dla rekłamy źniaŭ videa, dzie pakazaŭ, jak žudasna vieści ciažarnaść u zvyčajnaj paliklinicy. Rolik zavirusiŭsia, ale svaju chvalu krytyki klinika atrymała.
U videa sabrany ŭvieś mahčymy niehatyŭ pra dziaržaŭnyja palikliniki: hrubyja daktary, vielizarnyja čerhi… A kali hierainia pytajecca ŭ kabiniecie, dzie ž masažnaje kresła i ci mohuć joj prapanavać biezałkaholnaje šampanskaje, doktarka hrebliva ŭśmichajecca: «Vy razumiejecie, kudy vy patrapili?!». Apošniaje słova hučyć jak u kašmarnym śnie.
Raptam ciažarnaja pračynajecca — u tym samym masažnym kreśle i z kielicham biezałkaholnaha šampanskaha ŭ ruce. Hołas pa-za kadram kaža: «Pračynajciesia i atrymlivajcie asałodu ad viadzieńnie ciažarnaści ŭ Eva clinic».
Rolik zavirusiŭsia i nabraŭ 545 tysiač prahladaŭ u instahramie. Ale daloka nie ŭsim kamientataram spadabałasia takaja demanizacyja dziaržaŭnaj miedycyny. Samy papularny kamientaryj, jaki nabraŭ kala 2300 łajkaŭ, hučyć tak: «Samaja stromnaja rekłama, što bačyła. Abiasceńvać pracu inšych daktaroŭ, pakazvajučy vydumanyja biazhłuździcy».
Darečy, viadzieńnie ciažarnaści ŭ Eva clinic kaštuje ad 3980 da 6180 rubloŭ.
U adkaz niezadavolenym klinika vyrašyła zapisać jašče adzin rolik u tym samym styli. U im dziaŭčyna chodzić za ciažarnaj pa Eva clinic i źjedliva ahučvaje niehatyŭnyja kamientaryi, raźmieščanyja pad minułym rolikam: «Prabačcie, pryjšła, jak ja zrazumieła, na KTH, dzie treba słuchać małoha, i daj tabie masažnaje kresła, jakoje hudzić», «Narmalnaje staŭleńnie ŭ paliklinikach, čerhaŭ niama. Nie treba tut», «Heta ž vysmaktanyja z palca kamfortnyja ŭmovy» i inšyja.
Hałoŭnuju rolu ŭ druhim videa hrała dziaŭčyna Alina, jakaja letaś sa svaim chłopcam Jaŭhienam sprabavała sabrać z padpisčykaŭ u instahramie 10 tysiač dalaraŭ na viasielle mary. Stolki danataŭ sabrać u ich nie atrymałasia, ale šykoŭnaje viasielle (navat dva) para ŭsio ž zrabiła. Ciapier jany čakajuć pieršaje dzicia.
Kamientary