U rasijskim Barnaule 8 z 10 novych biełaruskich tramvajaŭ adrazu ž stali na ramont
Ministr transpartu Ałtajskaha kraju Andrej Padalan padčas sustrečy ź biełaruskaj delehacyjaj paviedamiŭ pra surjoznyja prablemy z novymi biełaruskimi tramvajami ŭ Barnaule. Pavodle jaho słoŭ, vosiem ź dziesiaci tramvajaŭ, što pastupili ŭ horad u 2024 hodzie, ciapier znachodziacca na harantyjnym ramoncie z-za častych pałomak. Pryčyna — prablemy pry zborcy transpartu, piša miascovaje vydańnie «Bankfaks».
U ałtajskich haradach Barnaule i Rubcoŭsku ciapier pracujuć 12 biełaruskich tramvajaŭ i 23 tralejbusy, vyrablenyja chołdynham «Biełkamunmaš». Ale z novymi tramvajami ŭźnikli techničnyja składanaści: jany časta vychodziać sa stroju i prastojvajuć u depo. Kab paźbiehnuć padobnych prablem u budučyni, pry nastupnych zakupkach u damovy ŭklučyli novyja harantyjnyja ŭmovy: pastajanna abnaŭlany skład zapasnych častak i kankretnyja terminy ramontu.
Andrej Padalan adznačyŭ, što takaja situacyja stvaraje surjoznyja prablemy dla pieravozčykaŭ i moža niehatyŭna paŭpłyvać na reputacyju ŭsich udzielnikaŭ. Tym nie mienš, Ałtajski kraj hatovy praciahvać supracoŭnictva — ale na ŭmovach, što biełarusy zabiaśpiečać bieśpierabojnuju pracu techniki.
29 lipienia byŭ padpisany novy kantrakt na pastaŭku 12 biełaruskich tramvajaŭ da 15 lipienia 2026 hoda na sumu 742 miljony rasijskich rubloŭ (kala 8 miljonaŭ dalaraŭ). Za apošnija piać hadoŭ u biełaruskich pastaŭščykoŭ było nabyta bolš za 165 adzinak śpiecyjalnaj techniki. U jaje liku — buldoziery, ekskavatary, traktary, mašyny dla ačystki vulic i inšaje abstalavańnie.
Taksama zhadvajecca, što raniejšyja tramvai, nabytyja ŭ 2022 hodzie, vyjšli na liniju tolki ŭ pačatku 2024 hoda. Pavodle ananimnaha mierkavańnia adnaho z supracoŭnikaŭ miascovaha «Harelektratransa», hetyja tramvai drenna prystasavanyja da asablivaściej barnaulskaj infrastruktury — u tym liku z-za nizkapolnaści, što pieraškadžaje ich pracy ŭ zimovy pieryjad, a taksama z-za niesumiaščalnaści z šyrynioj puciej i vialikim patokam pasažyraŭ.
Ciapier čytajuć
Biełaruś užo nie tolki pra palitviaźniaŭ. Z čym Śviatłana Cichanoŭskaja pajechała na adzin z hałoŭnych forumaŭ pa biaśpiecy ŭ ZŠA i što tam rabiŭ Siarhiej Cichanoŭski1515
Kamientary