Na Netflix vyjšaŭ druhi siezon polskaha sieryjała pra šlachtu «1670». Hetaja satyra vam spadabajecca
Netflix pradstaviŭ druhi siezon svajho chita z Polščy «1670». Historyja chitraha šlachcica Jana Paŭła, jaho siamji i ich vioski Adamčycha atrymała praciah — budzie jašče bolš śmieła.
Polski sieryjał «1670» vyjšaŭ na ekrany ŭ śniežni 2023 hoda. Režysiory Maciej Buchvald i Kardyjan Kandzieła schavali ŭ realii Rečy Paspalitaj satyru na sučasny śviet. Atrymałasia tak daścipna, što sieryjał nabyŭ papularnaść navat u zachodnich krainach nakštałt ZŠA i Brytanii, nie kažučy pra samu Polšču.
Na Netflix vyjšaŭ druhi siezon sieryjała pra šlachtu «1670». Hetaja satyra biełarusam spadabajecca taksama. My ŭ adnoj Rečy Paspalitaj žyli.
Hetuju historyju źniali ŭ žanry makjumientary, to-bok heta sproba imitavać dakumientalny sieryjał — ale tak, kab vy dakładna razumieli, što ničoha dakumientalnaha ŭ im niama. I tym nie mienš piersanažy majuć poŭnuju svabodu vykazvać svaje dumki na kamieru, jak heta i było b u sapraŭdnaj dakumientalistycy.
U centry ŭvahi polskaja vioska Adamčycha i šlachcič Jan Pavieł Adamčeŭski, jaki vałodaje častkaj vioski. U Adamčeŭskaha vialikaja siamja. Pierš za ŭsio, žyćcio ź im dzielić jaho žonka Zofja, zaŭziataja viernica i askietka ź niepranikalnym tvaram.
Para maje troje dziaciej. Heta starejšy syn Stanisłaŭ, jaki musiŭ być nadziejaj Jana Paŭła, ale vyras hultajem, i małodšy syn Jakub — kali cytavać jaho baćku, Jakub «buduje karjeru ŭ karparacyi» (nasamreč jon katalicki śviatar). Jość jašče i dačka Anela, dziaŭčyna prasunutych pohladaŭ, jakaja ŭ 17‑m stahodździ spakojna chodzić pa vioscy ŭ štanach i maje taki rezki jazyk, što lepš jaje nie złavać.
Jość jašče pravasłaŭny lićvin Maciej, zakachany ŭ Anelu. I Bahdan, jahony susied pa śvirnie i brat Zofji, badziažny husar, dla jakoha nie znajšłosia lepšaha žylla.
Nastroj sieryjału šmat u čym zadaje Jan Pavieł Adamčeŭski. Hety šlachcič, jaki maryć stać najsłaŭniejšaj asobaj u Polščy, moža padacca nie vielmi razumnym i zanadta fanaberystym. Ale ŭ toj ža čas jon charyzmatyčny i dobry, i bieź jaho jarkija žychary Adamčychi, zdajecca, tak i nie vyhladali b celnaj supolnaściu.
«1670» moža pachvalicca niebłahimi rejtynhami. Na ŭpłyvovaj płatformie IMDb sieryjał maje adznaku 7,9 bała z 10 mahčymych. Za pieršyja piać dzion pakazu ŭ Hiermanii sieryjał pahladzieli ci pačali hladzieć amal 515 tysiač karystalnikaŭ Netflix. U Brytanii za hety ž čas da sieryjała dabralisia 253 tysiačy hledačoŭ, a ŭ ZŠA historyjaj šlachciča Adamčeŭskaha zacikavilisia 806 tysiač abanientaŭ Netflix.
Hety polski chit nie moh nie mieć praciahu. 17 vieraśnia vyjšaŭ druhi siezon «1670», ale i heta nie kaniec, sieryjał zahadzia padoŭžyli i na treci siezon.
Druhi siezon jašče śmialejšy za papiaredni. U pieršaj ža sieryi stvaralniki pierachodziać z padziej u Adamčysie na mižnarodny ŭzrovień, bo siamja Adamčeŭskich vypraŭlajecca na adpačynak u Turcyju — ci, jak tady nazyvałasia kraina, u Asmanskuju impieryju. Tam jany sustrakajuć hietmana Jana Sabieskaha: takoje ž imia nasiŭ karol Rečy Paspalitaj, jaki ŭ 1683‑m vyratavaŭ Vienu, abłožanuju tureckimi vojskami.
Ale heta adsyłka nie tolki da toj kampanii, ale i da zvyčki palakaŭ jeździć u adpačynak u Turcyju — maŭlaŭ, u 17‑m stahodździ było toje ž samaje, tolki ałkahol tady treba było ŭžyvać aściarožniej, bo za heta možna było raźvitacca z žyćciom.
Darečy, vyśmiejvajuć tut nie tolki adpačynki ŭ Turcyi. Vy znojdziecie bahata adsyłak da sučasnaści: u sieryjalnym 17‑m stahodździ, naprykład, navat ładziać niešta nakštałt psichaterapii i hulajuć u azartnyja hulni, u tym liku ŭ pokier, jakoha tady i blizka nie isnavała.
Paśla adpačynku siamja vierniecca ŭ Adamčychu. I znoŭ ich čakaje nasyčanaje žyćcio. Try sieryi z vaśmi buduć źviazanyja z tradycyjnaj kulturaj: heta sieryi «Kupalskaja noč», «Dažynki» i jašče adzin epizod, «Čaraŭnictva», dzie abiacajuć lasnuju nimfu i viadźmarku. Budzie jašče adno padarožža ŭ dadatak da «asmanskaj» sieryi — za heta adkaža epizod «Krakaŭ».
Tema Dažynak prachodzić praz uvieś siezon. Praź źbieh abstavinaŭ Jan Pavieł vymušany arhanizoŭvać u Adamčysie karaleŭskija Dažynki, prytym što zusim nie maje dla hetaha srodkaŭ. Ale ci daść jamu jahonaja fanaberystaść admovicca ad takoj prapanovy?
Novy siezon nie prynosić u historyju Adamčychi ničoha kardynalna novaha, i tamu niekatorych fanataŭ jon rasčaravaŭ. Ale jon zrobleny hetak ža talenavita i jakasna, jak i pieršy, dy jašče daśleduje novyja baki suśvietu «1670» — naprykład, novyja tradycyi, lehiendy i hieahrafičnyja miaściny.
Asałoda, jakuju nie varta prapuskać.
«Naša Niva» — bastyjon biełaruščyny
PADTRYMAĆCiapier čytajuć
«Nas u hrupie było 240. U pałonie — siamiora. Astatnija dvuchsotyja». Andrej ź Viciebska, toj samy čałaviek-adkryvačka staŭ adnym ź siami ščaśliŭcaŭ4
Kamientary