«Čuvak dzieła skazaŭ». Ludzi masava padtrymali studenta-afrykanca
Ciemnaskury student u Minsku paskardziŭsia Łukašenku na darahuju koka-kołu. Zamiest Łukašenki junakom zacikaviłasia milicyja. Hetaja historyja vyklikała burnuju reakcyju ŭ sacyjalnych sietkach.
Analiz samych załajkanych kamientaryjaŭ nie pakidaje sumnievaŭ: karystalniki amal adnadušna stali na bok studenta. Jaho słovy paličyli praŭdzivymi i darečnymi.
Pieršaje miesca pa papularnaści ź vielizarnym adryvam zaniała karotkaja, ale jomistaja fraza, jakaja sabrała amal 7600 łajkaŭ:
«Čuvak dzieła skazaŭ».
Na druhim miescy — ščyraje nierazumieńnie taho, čamu prostaje mierkavańnie ab canie praduktu vyklikała takuju niervovuju reakcyju siłavikoŭ. Voś jaki kamientar padtrymali bolš za 3700 čałaviek:
«Nie razumieju, nu vykazaŭ jon mierkavańnie ab canie koka-koły. U čym prablema? Heta ž nie palityčnaje pytańnie».
(U padkładcy hetaha kamienta — ludzi prymirylisia z represijami za palityčnuju pazicyju, ale jany pakul nie hatovyja pryniać za novuju narmalnaść pakarańni za niepalityčnyja vykazvańni.)
Treci pa papularnaści kamientaryj, jaki nabraŭ amal 3700 łajkaŭ, zadaje rytaryčnaje pytańnie:
«Što jon drennaha skazaŭ».
Na čaćviortym miescy pa kolkaści łajkaŭ apynułasia jašče adno vykazvańnie ździŭleńnia. Jano sabrała amal 2800 łajkaŭ:
«Što prystali da čałavieka???»
Asobnaj temaj dla abmierkavańnia stała samo paniaćcie vybačeńniaŭ za vykazvańnie svajho mierkavańnia. Adzin z kamientataraŭ imknučysia prademanstravać zasvojenuju na prykładzie zamiežnaha studenta navuku, zaŭvažyŭ.
«Zahadzia vybačajusia, ale i praŭda, vielmi ŭsio padaražała. Vybačajusia jašče raz. Doraha. Prabačcie». Ź im salidarnaść vykazała kala 1050 čałaviek.
Inšyja karystalniki ščyra nie razumiejuć, čamu čałaviek pavinien prasić prabačeńnia za kanstatacyju fakta rostu cen, jaki zaŭvažajuć usie:
«Za što jamu vybačacca, za zhadku inflacyi?», «A za što jon vybačyŭsia? Čaho jamu bajacca? Jon ža ŭsio skazaŭ jak jość», «Niepatrebna vybačacca pa fakcie. I praŭda, piać hadoŭ nazad usio kaštavała napałovu mieniej», «Jon skazaŭ tolki fakty».
Niechta zrabiŭ aściarožnuju zdahadku:
«Ułady pakryŭdzilisia na toje, što ludzi niezadavolenyja cenami ŭ krainie?»
Ad koka-koły da svabody słova
Mnohija kamientatary ŭbačyli ŭ hetaj historyi nie prosta reakcyju na skarhu, a simptom bolš hłybokich prablem u hramadstvie. Niekatoryja zhadvajuć pra toje, što Biełaruś pavinna być svabodnaj krainaj, u jakoj isnuje svaboda słova.
«Hańba… Za takuju reakcyju, a jon maje racyju!», «Voś heta naša kraina. Svaboda słova. Usio bolej ździŭlaje», «Čamu jon pavinien vybačacca za praŭdu??? U nas svabodnaja kraina», «Svaboda słova, biedny pacan».
Kamientary