«Biełavija» praviała pieršy za amal čatyry hady rejs u Ałmaty. Heta stała mahčymym paśla źniaćcia amierykanskich sankcyj
Avijakampanija Belavia paśla čatyrochhadovaha pierapynku adnaviła paloty ź Minska ŭ Ałmaty. Pieršy rejs vylecieŭ 18 śniežnia. Raniej samaloty ŭ hety najbujniejšy horad Kazachstana lotali z 2015 hoda i mieli popyt, ale ŭ 2022‑m paloty byli spynienyja, piša Office Life.
Jak patłumačyŭ namieśnik hiendyrektara Belavia pa markietynhu Uładzimir Barkun, kampanija atrymała dazvoł avijacyjnych uładaŭ Kazachstana na vykanańnie rejsaŭ. Kirunak adrazu vyklikaŭ cikavaść jak u pasažyraŭ, tak i ŭ turystyčnych apierataraŭ.
Rejsy ź Minska buduć vykonvacca pa paniadziełkach i čaćviarhach, nazad z Ałmaty — pa aŭtorkach i piatnicach. Čas palotu składaje kala piaci hadzin. Košt kvitka ŭ adzin bok pačynajecca prykładna ad 540 rubloŭ, tudy i nazad — ad 1045 rubloŭ.
Pieršy rejs akazaŭsia dobra zahružanym: ź Minska byli pradadzienyja 100 miescaŭ u ekanom-kłasie i adno ŭ biznes-kłasie, u zvarotnym kirunku — 80 i 24 miescy adpaviedna. Pavodle słoŭ Barkuna, hety napramak zručny nie tolki dla pramych palotaŭ, ale i dla pierasadak na inšyja rejsy, naprykład, z Ałmaty ŭ Sankt-Pieciarburh ci Kalininhrad abo ź Minska ŭ Biškiek.
Paloty ŭ stalicu Kazachstana, Astanu, Belavia ŭvohule nie spyniała. Jak patłumačyła pradstaŭnica Ministerstva transpartu i kamunikacyj Volha Šapkova, adnavić rejsy ŭ Ałmaty stała mahčymym paśla źniaćcia sankcyj ZŠA ź biełaruskaj avijakampanii. U Astanu lotali samaloty Embraer, bo jana znachodzicca bližej, a ŭ Ałmaty rejsy vykonvajucca na Boeing.
Raniej u Belavia taksama nie vyklučali, što ŭ budučyni mohuć źjavicca i pramyja avijarejsy ź Minska ŭ ZŠA.
Kamientary