Dyrektar CRU pravioŭ dźviuchhadzinnuju sustreču z novym lidaram Vieniesueły Dełsi Radryhies

Jak paviedamiŭ žurnalistam u piatnicu nienazvany amierykanski čynoŭnik, kiraŭnik CRU prylacieŭ u Vieniesuełu pa prośbie prezidenta ZŠA Donalda Trampa, a sustreča z Radryhies doŭžyłasia kala dźviuch hadzin.

«Pa daručeńni prezidenta Trampa dyrektar Retklif naviedaŭ Vieniesuełu, kab sustrecca z časovym prezidentam Dełsi Radryhies i pieradać joj pasłańnie pra toje, što ZŠA spadziajucca na palapšeńnie pracoŭnych adnosin. Padčas sustrečy ŭ Karakasie Retklif abmierkavaŭ patencyjnyja mahčymaści ekanamičnaha supracoŭnictva i toje, što Vieniesueła bolš nie moža być biaśpiečnaj havańniu dla praciŭnikaŭ Amieryki, asabliva dla narkahandlaroŭ», — skazaŭ jon.

Sustreča adbyłasia ŭ toj ža dzień, kali Radryhies vystupiła sa svaim pieršym paśla ŭstupleńnia na pasadu zvarotam da nacyi, u jakim abviaściła pra reformy ŭ naftavaj pramysłovaści, nakiravanyja na pryciahnieńnie novych zamiežnych inviestycyj.

Raniej zakanadaŭstva Vieniesueły praduhledžvała, što zamiežnyja partniory pavinny supracoŭničać ź dziaržaŭnaj naftahazavaj kampanijaj PDVSA, jakaja abaviazkova pavinna była vałodać kantrolnym pakietam akcyj.

Radryhies zajaviła, što reformy «dazvolać nakiravać hetyja inviestycyjnyja patoki ŭ novyja śfiery — u tyja, dzie nikoli nie było inviestycyj, i ŭ rehijony bieź infrastruktury», a srodki ad prodažu nafty pojduć na patreby pracoŭnych i finansavańnie dziaržaŭnych pasłuh.

Prezident Donald Tramp zajaviŭ, što amierykanskija naftavyja kampanii pačnuć pracu ŭ Vieniesuele, a prybytak ad ich dziejnaści budzie nakiravany jak nasielnictvu krainy, tak i ŭ ZŠA. Da hetaha času ŭ krainie było dazvolena pracavać tolki amierykanskaj kampanii Chevron.

Kiraŭniki najbujniejšych naftavych kampanij ZŠA, jakija na minułym tydni ŭdzielničali ŭ naradzie ŭ Biełym domie, pryznali, što Vieniesueła źjaŭlajecca pryvabnym miescam dla inviestycyj, ale maje patrebu ŭ surjoznych pieraŭtvareńniach.

«Vy budziecie mieć spravu niepasredna z nami. Vy nie budziecie mieć nijakich spraŭ ź Vieniesuełaj. My nie chočam, kab vy mieli spravu ź Vieniesuełaj», — zajaviŭ Tramp, dadaŭšy, što mienavita jaho administracyja budzie vyrašać, jakim kampanijam dazvolena pracavać u Vieniesuele.

U svaim zvarocie da nacyi Dełsi Radryhies zajaviła, što nie baicca supraćstajać ZŠA «na dypłamatyčnym uzroŭni praz palityčny dyjałoh», dadaŭšy, što Vieniesueła pavinna abaraniać svaje «honar i hodnaść».

«Kali mnie kali-niebudź daviadziecca adpravicca ŭ Vašynhton u jakaści vykonvajučaj abaviazki prezidenta, ja zrablu heta ŭpeŭniena, i budu stajać, a nie poŭzać», — skazała jana.

Tramp i Radryhies parazmaŭlali pa telefonie ŭ sieradu, i abodva baki nazvali razmovu pazityŭnaj.

Vizit dyrektara CRU ŭ Karakas taksama supaŭ ź vizitam lidara vieniesuelskaj apazicyi Maryi Karyny Mačada ŭ Bieły dom. Padčas sustrečy z prezidentam ZŠA Mačada ŭručyła jamu svaju Nobieleŭskuju premiju miru.

Adnak Tramp admoviŭsia padtrymać Mačada ŭ jakaści novaha lidara Vieniesueły, zajaviŭšy, što ŭ jaje niedastatkova padtrymki ŭnutry krainy.

Vystupajučy ŭ piatnicu na mierapryjemstvie ŭ Vašynhtonie, Mačada zajaviła, što časovy lidar Vieniesueły Dełsi Radryhies atrymlivaje «zahady», namiakajučy, što jany iduć z Vašynhtona.

«Jana dziejničaje nie pa ŭłasnaj voli, a vykonvaje zahady», — skazała Mačada.

Lidar apazicyi taksama zajaviła, što ŭpeŭnienaja ŭ tym, što ŭ jaje krainie adbudziecca «ŭparadkavany pierachod» ułady.

«Vynikam stabilnaha pierachodu stanie vieličnaja Vieniesueła, jakaja budzie najlepšym sajuźnikam ZŠA ŭ Paŭnočnaj i Paŭdniovaj Amierycy», — zajaviła jana.

U raniejšym intervju amierykanskamu telekanału Fox News Mačada skazała, što ŭznačalić krainu, «kali pryjdzie čas».

«U nas jość misija, i my pieratvorym Vieniesuełu ŭ kvitniejučuju ziamlu. Ja vieru, što kali pryjdzie čas, ja budu abranaja prezidentam Vieniesueły — pieršaj žančynaj-prezidentam», — zajaviła jana.

• 5
• 0
• 0
• 1
• 0
• 0
• 0
• 0