Stała viadoma, dzie ŭ Homielskaj vobłaści źjavicca bujny vajskovy palihon. Jaho budujuć u rajonie čyhunačnaj stancyi Jakimaŭka ŭ Rečyckim rajonie, i padrychtoŭčyja raboty tam užo iduć, piša «Fłahštok».
Paćviardžeńnie hetaj infarmacyi źjaviłasia ŭ pačatku 2026 hoda ŭ sistemie dziaržaŭnych zakupak. Kampanija «Darbudmantažtrest» abjaviła tendar na vysiečku lesu i kustoŭja, a taksama karčavańnie pnioŭ dla padrychtoŭki terytoryi pad budaŭnictva palihona. U dakumientach paznačana, što heta ŭžo treciaja čarha rabot i jana tyčycca inžynierna-transpartnaj infrastruktury, u tym liku čyhunačnaha napramku kala stancyi Jakimaŭka. Źviestak pra papiarednija etapy budaŭnictva ŭ adkrytych krynicach niama.
Fakt vysiečki lesu paćviardžajuć i spadarožnikavyja zdymki: na fota bačnyja źmieny, jakija adbylisia na hetaj terytoryi za apošni miesiac. Zaviaršyć raboty pa rasčystcy ŭčastka płanujuć da kanca sakavika 2026 hoda, na što vydzielena krychu bolš za miljon rubloŭ.
Zhodna ź Dziaržaŭnaj inviestycyjnaj prahramaj, u 2026 hodzie na budaŭnictva palihona praduhledžana 15 miljonaŭ rubloŭ. Asnoŭnyja ž vydatki zapłanavanyja na nastupnyja hady: u 2027 hodzie — 150 miljonaŭ, u 2028‑m — amal 246 miljonaŭ rubloŭ.
Pobač taksama ŭzvodzicca vajskovy haradok u rajonie vioski Prybar Homielskaha rajona, ale asnoŭnyja raboty tam taksama pieraniesienyja na budučyja hady. Pieršyja zakupki źjavilisia jašče ŭ siaredzinie 2025 hoda, u tym liku tendar na vysiečku lesu bolš jak na 8 miljonaŭ rubloŭ.
Admietna, što da tendarnaj dakumientacyi prykładajecca pahadnieńnie ab kanfidencyjnaści: za raskryćcio detalaŭ prajekta praduhledžany štraf u pamiery 100 bazavych vieličyń za kožny vypadak.
Pakul ciažka dakładna acanić pamiery budučaha palihona, ale pra maštaby možna mierkavać pa vydatkach na vysiečku lesu. Dla paraŭnańnia: u 2024 hodzie na rasčystku 60 hiektaraŭ pad vajskovy haradok kala Prybara było vydzielena kala 1,5 miljona rubloŭ, a ciapier na anałahičnyja raboty pa palihonie — užo 16,5 miljona.
Akramia taho, płanujecca budaŭnictva inžynierna-transpartnaj infrastruktury, u tym liku aŭtadarohi ad stancyi Jakimaŭka da administracyjnaj i vučebnaj zon. Pakul idzie zbor cenavych prapanoŭ.
Miarkujecca, što pryznačeńnie palihona źviazana z uzmacnieńniem paŭdniovaha kirunku paśla pačatku rasijskaha ŭvarvańnia va Ukrainu. Raniej paviedamlałasia, što ŭ Homielskaj vobłaści płanujuć raźmiaścić novuju 37‑iu asobnuju desantna-šturmavuju hvardziejskuju bryhadu, i budaŭnictva palihona, vierahodna, źjaŭlajecca častkaj hetych płanaŭ.
Ciapier čytajuć
Chto tyja dva piersanažy, jakija nie pili ŭ mižvajennaj Vilni, jak Zośku Vieras abudzili ad letarhii i ci praŭdzivaja bajka pra Karatkieviča i restaran11
Kamientary