Minzdaroŭja prakamientavała trahiedyju ŭ Dziaržynskaj balnicy, dzie pamierli paradzicha i niemaŭla
Ministerstva achovy zdaroŭja rasśleduje śmierć žančyny.
Ministerstva achovy zdaroŭja vykazała spačuvańni siamji žančyny, jakaja pamierła 8 sakavika ŭ Dziaržynskaj CRB. Stvorana kamisija dla rasśledavańnia.
«Paviedamlajem, što ŭ hety momant pracuje śpiecyjalnaja kamisija ŭ składzie pazaštatnych śpiecyjalistaŭ Ministerstva achovy zdaroŭja. Aceńvajucca ŭsie etapy akazańnia miedycynskaj dapamohi. Kančatkovy dyjahnaz budzie ŭstanoŭleny paśla atrymańnia vynikaŭ patołahaanatamičnaha razboru i praviadzieńnia sudova-miedycynskaj ekśpiertyzy», — havorycca ŭ kamientary.
Akramia taho, načalnik hałoŭnaha ŭpraŭleńnia arhanizacyi miedycynskaj dapamohi Ministerstva achovy zdaroŭja Leanid Niedzień paviedamiŭ, što
pryniata rašeńnie ab prypynieńni realizacyi i miedycynskaha vykarystańnia lekavaha preparata. Što za preparat, jon nie nazvaŭ.
8 sakavika ŭ Dziaržynskaj CRB pamierła 26‑hadovaja ciažarnaja žančyna, jaje dzicia miedyki taksama nie zmahli vyratavać. Paradzicha znachodziłasia pryblizna na 34 tydni ciažarnaści.
Hałoŭnaja doktarka Dziaržynskaj CRB Alena Padalančyk dała ścipły kamientar «Anłajnieru»: «Pakul tolki skažu: miedyki zrabili ŭsio, što zmahli. Heta ja kažu z usioj adkaznaściu: usio, što zmahli».
Dyk što adbyłosia? U tym samym dopisie ŭ Threads kaleha śćviardžała, što pryčynaj śmierci staŭ anafiłaktyčny šok ad preparatu. Hetuju infarmacyju paćvierdzili i krynicy «Našaj Nivy». Sa słoŭ ludziej, znajomych ź situacyjaj, žančynie ŭviali antybijotyk ceftryaksan.
Mienavita hety antybijotyk raniej traplaŭ u skandał. U studzieni 2017 hoda tolki za adzin tydzień było zafiksavana try vypadki anafiłaktyčnaha šoku ad ceftryaksana: dva školniki trapili ŭ balnicu ŭ ciažkim stanie, adna žančyna pamierła. U hetych vypadkach vykarystoŭvali jak ajčynny preparat, tak i zamiežny.
Paśla śmiarotnaha vypadku ceftryaksan časova zabaranili ŭ Biełarusi. Tady vice-premjer Vasil Žarko zajaviŭ, što ŭ 2016 hodzie ŭ krainie było zafiksavana 25 vypadkaŭ alerhičnaj reakcyi na hety antybijotyk — biełaruskaj, rasijskaj i polskaj vytvorčaści.
Siarod tych 25 vypadkaŭ bolšaść zastałasia nieviadomaj dla hramadstva. Rezanansnaj stała tolki śmierć paradzichi ŭ Maładziečnie. Tady 27‑hadovaja Kaciaryna naradziła zdarovaha syna, ale praź niekatory čas joj stała drenna. Miedyki ŭviali žančynie biełaruski ceftryaksan — i jana zahinuła ad anafiłaktyčnaha šoku.
Za paŭhoda da Kaciaryny ŭ toj ža Maładziečanskaj radzilni zahinuła inšaja žančyna. Pryčynaj taksama staŭ anafiłaktyčny šok paśla ŭviedzienaha antybijotyku.
Ale ž Vasil Žarko sprabavaŭ zaspakoić, što za miažoj alerhičnych reakcyj na ceftryaksan fiksujuć bolš.
Treba adznačyć, što prablemy z ceftryaksanam sapraŭdy ŭźnikali nie tolki ŭ Biełarusi. Naprykład, va Ukrainie zabaraniali hety antybijotyk (ukrainskaj vytvorčaści) u 2019 hodzie — taksama paśla śmiarotnaha vypadku.
U vyniku ceftryaksan usio ž znoŭ dazvolili vykarystoŭvać u Biełarusi — adbyłosia heta ŭ sakaviku 2017 hoda.
Kamientary