Słuchańni pryznačany na 10 červienia.
Zasnavalnik kampjutarnaha hihanta Microsoft i fiłantrop Bił Hiejts u červieni hetaha hoda daść pakazańni kamisii Kanhresa ZŠA, jakaja rasśleduje dziejnaść asudžanaha piedafiła Džefry Epštejna, piša Bi-bi-si.
Kanhresmieny paćvierdzili, što jašče 3 sakavika zapatrabavali ad Hiejtsa raskazać pra jaho siabroŭstva z Epštejnam. Da hetaha pierad kamisijaj vystupali niekalki inšych viadomych asob, u tym liku były prezident ZŠA Bił Klintan i jaho žonka, eks-kiraŭnik Dziarždepa Chiłary Klintan.
Aficyjny pradstaŭnik Hiejtsa paviedamiŭ Bi-bi-si, što toj «z radaściu adkaža na ŭsie pytańni členaŭ kamiteta, kab dapamahčy ich važnaj pracy».
Achviary złačynstvaŭ Epštejna nikoli nie vyłučali jakich-niebudź abvinavačańniaŭ suprać Hiejtsa. Jaho imia mnostva razoŭ sustrakajecca ŭ miljonach dakumientaŭ z «daśje Epštejna», apublikavanaha Miniustam ZŠA, adnak samo pa sabie heta nie moža słužyć śviedčańniem jakich-niebudź niezakonnych abo nieprystojnych dziejańniaŭ.
Miniust apublikavaŭ kala troch miljonaŭ dakumientaŭ pa spravie Epštejna, a jašče niekalki miljonaŭ zastajucca nieapublikavanymi.
Što viadoma pra suviazi Hiejtsa i Epštejna
Hiejts, jaki zasnavaŭ Microsoft, a ŭ apošnija hady zajmajecca dabračynnaj dziejnaściu, nie chavaje, što niekatory čas znachodziŭsia z Epštejnam u pryjacielskich adnosinach. Pry hetym jon nastojvaje, što ničoha nie viedaŭ pra jaho złačynstvy.
Jak paviedamiŭ jaho fond, Hiejts niadaŭna pravioŭ z hetaj nahody schod z supracoŭnikami svajoj arhanizacyi i «pryznaŭ adkaznaść za svaje dziejańni». «Bił ščyra i padrabiazna adkazaŭ na niekalki pytańniaŭ», — skazana ŭ zajavie.
Pavodle haziety Wall Street Journal, Hiejts prynios prabačeńni supracoŭnikam; jon taksama pryznaŭ, što ŭ jaho było dva ramany z žančynami z Rasii — i pra heta stała viadoma Epštejnu. Jak pisała vydańnie, Epštejn sprabavaŭ pahražać Hiejtsu ŭ suviazi z adnym z hetych ramanaŭ.
«Ja nie rabiŭ ničoha niezakonnaha. Ja nie bačyŭ ničoha niezakonnaha», — skazaŭ Hiejts svaim supracoŭnikam (pavodle danych aŭtaraŭ publikacyi).
Jak pisała WSJ, Hiejts raskazaŭ supracoŭnikam fondu, što sustreŭ Epštejna ŭ 2011 hodzie — praź niekalki hadoŭ paśla taho, jak toj pryznaŭ siabie vinavatym u schileńni niepaŭnaletniaj da prastytucyi — i dadaŭ, što viedaŭ pra niejkuju «18‑miesiačnuju spravu», jakaja nakładvała abmiežavańni na pajezdki Epštejna, ale nie pravieryŭ jaho bijahrafiju naležnym čynam.
Raniej zasnavalnik Microsoft taksama kamienciravaŭ svaje suviazi z Epštejnam u intervju aŭstralijskaj telekampanii 9News. Jon śćviardžaŭ, što ich adnosiny abmiažoŭvalisia sumiesnymi viačerami, i kazaŭ, što nikoli nie byŭ na vostravie Epštejna.
«Ja škaduju ab kožnaj chvilinie, jakuju ja ź im pravioŭ, i prynošu prabačeńni za toje, što heta rabiŭ», — skazaŭ Hiejts.
U svajoj zajavie dla Bi-bi-si aficyjny pradstaŭnik Hiejtsa skazaŭ, što toj nikoli nie braŭ udziełu ŭ sumiesnych viečarynkach z Epštejnam i nie byŭ datyčny da jaho niezakonnych dziejańniaŭ.
Čakajecca, što ŭ bližejšyja miesiacy pakazańni ab suviaziach z Epštejnam kamisii Kanhresa taksama daduć ciapierašni ministr handlu ZŠA Hovard Lutnik i były hienieralny prakuror Pem Bondzi.
Kamientary