Turahienctvy paviedamlajuć pra admienu rejsaŭ u Tajłand. Mahčyma, heta recha vajny ŭ Iranie
Turahienty i tyja, chto płanavaŭ pravieści adpačynak u Tajłandzie ŭ najbližejšy miesiac, paviedamlajuć u sacsietkach pra admienu pramych rejsaŭ u Pataju i Pchukiet ź Minska. Što zdaryłasia, piša Onliner.
«Z 12 maja admianili pramyja rejsy ŭ Pataju ź Minska. Ale heta my pieražyviom — zimoj, spadziajomsia, hety kirunak vierniecca», — napisała ŭčora ŭ Threads studyja padarožžaŭ Mallina Travel.
Žurnalisty źviazalisia z pradstaŭnikami turahienctva i spytali pra mierkavanyja pryčyny admieny rejsaŭ. Tam adznačyli, što rašeńnie z boku ajčynnaj avijakampanii było łahičnym, maŭlaŭ, skončyŭsia siezon. «Z Maskvy pramyja rejsy byli, i ŭ niekatorych apierataraŭ jany pakul zastajucca», — dadali ŭ kampanii.
U paście turystyčnaha ahienctva «Nachodka» milhajuć inšyja daty: «Učora źniali rejsy ŭ Pataju ź Minska (vylety z 14.05), siońnia — u Pchukiet (vylety z 17.05)».
U ahienctvie vydańniu skazali nastupnaje:
— Zaviaršeńnie vysokaha siezona ŭ Tajłandzie i źnižeńnie ekanamičnaj efiektyŭnaści pieravozak. Chutčej za ŭsio, hałoŭnaja pryčyna — rezki rost koštu avijapaliva ŭ Azii z-za padziej u Iranie.
Taksama ŭ ahienctvie ŭdakładnili: kampanija «Aerabiełservis» (adzin ź viadučych biełaruskich turapierataraŭ i avijabrokieraŭ) 24 krasavika taksama papiaredziła pra admienu ŭsich rejsaŭ u Dananh (Vjetnam). Tam spasłalisia na «niespadziavanyja ekanamičnyja abstaviny».
Kamientary