Cichanoŭskaja naviedała biełaruski stend na Mižnarodnym knižnym kirmašy ŭ Varšavie
Siońnia stend 11/5D Biełaruskich niezaležnych vydaviectvaŭ «Volnaja Biełaruś» na Mižnarodnym knižnym kirmašy ŭ Varšavie naviedała Śviatłana Cichanoŭskaja, jakoj my padaryli knihu Daroty Michaluk «Biełaruskaja Narodnaja Respublika 1918—1920 hh.: la vytokaŭ biełaruskaj dziaržaŭnaści», — napisaŭ na svajoj fejsbuk-staroncy kiraŭnik prajekta i vydaviectva «Kamunikat» Jarasłaŭ Ivaniuk.
«Heta vielmi važna ŭ tym kantekście, što sa svajho vizitu ŭ Kijeŭ lidarka biełaruskich demakratyčnych sił pryviezła šerah dakumientaŭ datyčnych adnosin Biełarukaj Narodnaj Respubliki i Ukrainskaj Narodnaj Respubliki. Kniha prafiesara Daroty Michaluk naprykancy 2025 hoda pa inicyjatyvie prakuratury Horackaha rajona trapiła ŭ śpis knih zabaronienych u Biełarusi. Tymčasam — heta adna z najvažniejšych sučasnych prac pra naradžeńnie biełaruskaj dziaržaŭnaści. Heta daśledavańnie, jakoje źmianiła padychod historykaŭ da razumieńnia BNR i złamała stereatyp, što biełaruskuju dziaržaŭnaść nibyta «stvaryli balšaviki», — napisaŭ Jarasłaŭ Ivaniuk.
Knižny kirmaš sioleta prachodzić na stadyjonie Naradovym (al. Księcia Józefa Poniatowskiego 1, 03‑901 Warszawa) i budzie doŭžycca jašče dva dni.
Voś jakija jašče mierapryjemstvy na Biełaruskim stendzie čakajucca siońnia i zaŭtra:
14.00 Aŭtohraf-siesija: Alena Piatrovič, aŭtarka knihi «Sini dom» (Mianie Niama)
15.00 Prezientacyja: sšytak zadańniaŭ «Pieršyja kroki pa-biełarusku», Hanna Płaščynskaja (Gutenberg)
16.00 Aŭtohraf-siesija: Anton Bialajeŭ, aŭtar knihi «Jak ja pravioŭ hetaje leta» (RozUM)
Niadziela
12.00 «Litaraturaznaŭca ŭ turmie». Sustreča z Alaksandram Fiadutam
13:00 «Nasupierak turmie». Sustreča vakoł knihi «Sprava Viktara Babaryki»
13.00 Prezientacyja: «Noradrenalin», Jaŭhien Anaškin (Gutenberg)
14.00 Aŭtohraf-siesija: Viktar Babaryka (Sviedki)
15.00 Prezientacyja: «Imiony Svabody. Častka 1», Uładzimir Arłoŭ
16.00 Prezientacyja: «Viačera z čužym kachankam», Valancina Aksak (Kamunikat).
Kamientary