Krainy Jeŭrapiejskaha sajuza dasiahnuli pahadnieńnia ab pačatku novaha etapu pieramoŭ z Ukrainaj i Małdovaj adnosna ich budučaha ŭstupleńnia ŭ ES. Paśla dvuch hadoŭ błakavańnia Vienhryja źniała svajo vieta, što dazvoliła 27 dziaržavam-členam ES adnahałosna padtrymać adkryćcio pieršaha błoka pieramoŭ, jaki nazyvajecca «bazavym kłastaram», piša Euronews.
Kančatkova hetaje rašeńnie pavinna być aformlena 15 červienia padčas mižuradavych kanfierencyj u Luksiemburhu, jakija buduć praviedzienyja asobna z Ukrainaj i Małdovaj.
Pieršy etap pieramoŭ datyčycca najbolš važnych pytańniaŭ funkcyjanavańnia dziaržavy. U jaho ŭvachodziać reformy ŭ śfiery viaršenstva prava, niezaležnaści sudovaj sistemy, baraćby z karupcyjaj, abarony pravoŭ čałavieka i nacyjanalnych mienšaściaŭ.
Mienavita pytańnie ab pravach nacyjanalnych mienšaściaŭ było hałoŭnaj pryčynaj sprečak pamiž Vienhryjaj i Ukrainaj. Budapiešt śćviardžaŭ, što vienhierskaja mienšaść u Zakarpackaj vobłaści nie maje dastatkovych harantyj svaich pravoŭ, i z hetaj pryčyny doŭhi čas nie dazvalaŭ ruchacca dalej u pieramovach. U vyniku pieramoŭ pamiž dvuma bakami byŭ padrychtavany i skarektavany płan dziejańniaŭ, jaki zadavoliŭ krainy ES.
Kiraŭnictva Jeŭrapiejskaha sajuza nazvała pryniataje rašeńnie pryznańniem mužnaści i nastojlivaści Ukrainy i Małdovy, jakija praciahvajuć pravodzić nieabchodnyja reformy, niahledziačy na surjoznyja ŭnutranyja i źniešnija vykliki. Kiraŭniki jeŭrapiejskich instytutaŭ padkreślili, što pašyreńnie ES razhladajecca jak stratehičny vybar, jaki pavinien umacavać mir, biaśpieku i dabrabyt na jeŭrapiejskim kantyniencie.
Prezident Ukrainy Uładzimir Zialenski pryvitaŭ hetaje rašeńnie i nazvaŭ jaho važnaj palityčnaj i maralnaj padtrymkaj dla jahonaj krainy i ŭkrainskaha naroda va ŭmovach praciahłaj vajny.
Uvieś praces dałučeńnia da Jeŭrapiejskaha sajuza vielmi składany i padzieleny na šeść vialikich tematyčnych błokaŭ, jakija ŭklučajuć 33 asobnyja raździeły zakanadaŭstva i dziaržaŭnaha kiravańnia. Adkryćcio pieršaha kłastara aznačaje tolki pačatak doŭhaha šlachu, a nie chutkaje ŭstupleńnie ŭ ES.
Ukraina raźličvaje ŭžo najbližejšym časam adkryć astatnija błoki pieramoŭ, kab pakazać svaim hramadzianam, što pierśpiektyva jeŭrapiejskaha členstva zastajecca realnaj navat padčas vajny. Takuju pazicyju padtrymlivajuć Jeŭrapiejskaja kamisija i šerah dziaržaŭ ES.
Razam z tym krainy Jeŭrasajuza padkreślivajuć, što praces dałučeńnia budzie adbyvacca pavodle ahulnych pravił. Nijakich sproščanych schiem abo paskoranaha členstva tolki praź ciažkija abstaviny dla Ukrainy nie płanujecca. Kožny nastupny etap budzie zaležać ad taho, nakolki paśpiachova krainy-kandydaty vykanajuć nieabchodnyja patrabavańni i praviaduć reformy.
Taksama ŭ ES pačynajuć abmiarkoŭvać, ci buduć Ukraina i Małdova i nadalej ruchacca ŭ pieramovach razam, jak adzinaja hrupa krain-kandydataŭ, abo ŭ budučyni ich šlachi mohuć razyścisia ŭ zaležnaści ad tempaŭ vykanańnia patrabavańniaŭ Jeŭrapiejskaha sajuza.
Ciapier čytajuć
«Nas u hrupie było 240. U pałonie — siamiora. Astatnija dvuchsotyja». Andrej ź Viciebska, toj samy čałaviek-adkryvačka staŭ adnym ź siami ščaśliŭcaŭ1515
Kamientary
«Kohda Ukraina vstupit v ES?». «Srazu pośle Turcii». «A Turcija kohda?» – «Turcija? Nikohda…»