Minharvykankam zabaraniŭ praviadzieńnie akcyi «Boj paduškami», pryśviečanaj hadavinie bity pad Oršaj

Minharvykankam zabaraniŭ praviadzieńnie akcyi «Boj paduškami», pryśviečanaj hadavinie bity pad Oršaj, paviedamili 3 vieraśnia na pres-kanfierencyi ŭ Minsku arhanizatary mierapryjemstva.

Hetym razam inicyjataram «Boju paduškami» vystupiła maładziožnaje hramadskaje abjadnańnie «Historyka». Jak adznačyŭ na pres-kanfierencyi aktyvist arhanizacyi Valancin Sakałoŭski, u zajaŭkach na praviadzieńnie «Boju paduškami» byli ŭkazany čatyry mahčymyja miescy praviadzieńnia akcyi — park Družby narodaŭ, lesaparkavaja zona pobač z Nacyjanalnaj biblijatekaj, park imia Janki Kupały i park 50-hodździa Kastryčnika.

«Kala miesiaca my ŭzhadniali praviadzieńnie akcyi z roznymi zacikaŭlenymi orhanami. Praviadzieńnie takoj akcyi ŭchvalili Ministerstva kultury, adździeł kultury i adździeł ideałohii Minharvykankama. Adnak, kali my pryjšli na sustreču z namieśnikam staršyni Minharvykankama Michaiłam Ciciankovym, jon nam zajaviŭ, što «mierapryjemstva — niedarečnaje, ja jaho nie razumieju, tamu maju namier jaho zabaranić», — skazaŭ Sakałoŭski.

Arhanizatary atrymali try admovy na svaje zajaŭki. «U parku Družby narodaŭ boj paduškami byŭ zabaronieny z-za taho, što za paŭkiłamietra ad jaho, uzdoŭž vulicy Arłoŭskaj, pravodzicca rekanstrukcyja ciepłavych sietak, i heta nibyta budzie sadziejničać uźniknieńniu niebiaśpieki dla žyćcia i zdaroŭja ŭdzielnikaŭ mierapryjemstva. U lesaparkavaj zonie kala Nacyjanalnaj biblijateki i ŭ parku imia Janki Kupały nam admovili pa pryčynie taho, što „Boj paduškami“ nie budzie sadziejničać zachavańniu zialonych nasadžeńniaŭ u miescy praviadzieńnia mierapryjemstva. Inakš kažučy, my tam travu patopčam abo drevy paduškami pałamajem», — skazaŭ Sakałoŭski.

Na zajaŭku, padadzienuju ŭ parku 50-hodździa Kastryčnika, adkazu naohuł nie pryjšło, choć užo prajšoŭ ustanoŭleny zakonam termin dla dačy adkazu, adznačyŭ Sakałoŭski.

Sakałoŭski nazvaŭ absurdnaj matyviroŭku admoŭ. «Paduškaj niemahčyma złamać dreva — heta nie siakiera. Pravodzić bitvu paduškami na asfalcie taksama nielha — mienavita tady i ŭźnikaje niebiaśpieka dla zdaroŭja ŭdzielnikaŭ mierapryjemstva», — zajaviŭ Sakałoŭski.

Arhanizatar «Bajoŭ paduškami» ŭ 2009 hodzie Andrej Kim adznačyŭ, što akcyja, prymierkavanaja da hadaviny bitvy pad Oršaj, usio roŭna adbudziecca 8 vieraśnia ŭ Minsku. «My źmienim farmat i miesca praviadzieńnia mierapryjemstva. Pakul my nie ahučvajem hetyja momanty, kab nie atrymałasia tak, jak padčas „Boju paduškami“, pryśviečanaha hadavinie Hrunvaldskaj bitvy, kali było zatrymana bolš za 200 čałaviek», — zajaviŭ Kim. Pry hetym jon padkreśliŭ, što sam nie źjaŭlajecca arhanizataram mierapryjemstva.

• 0
• 0
• 0
• 0
• 0
• 0
• 0
• 0