Na jaho restaŭracyju niestaje srodkaŭ. Akramia taho, jon nie maje mastackaj vartaści.
U Babrujsku ŭłady vyrašyli demantavać biust Leninu. Na jaho restaŭracyju niestaje srodkaŭ. Akramia taho, jon nie maje mastackaj vartaści.
Pakul biust zastajecca na svaim raniejšym miescy — kala ŭvachoda ŭ babrujski filijał Biełaruskaha dziaržaŭnaha ekanamičnaha ŭniviersiteta. Raniej u hetym budynku na vulicy Savieckaja mieściŭsia harnizonny Dom aficeraŭ. Jaho abaviazkovym atrybutam i byŭ biust Leninu. Ciapier jon zaniapaŭ — asypajecca tynk i farba.
«Kamisijaj pryznana, što jon užo nie padlahaje restaŭracyi. Dadziena zadańnie źnieści jaho. Dla restaŭracyi treba šmat hrošaj. U nas davoli takich biustaŭ i pomnikaŭ u horadzie», — paviedamili ŭ adździele ideałahičnaj pracy Leninskaha rajona Babrujska.
Toje, što biust pravadyra praletaryjatu nie patrebny Babrujsku jak kaštoŭnaść, daviali kamisii ŭ adździele architektury harvykankama.
«Heta typavoje rašeńnie, jakoje nie ŭjaŭlaje jakojści histaryčnaj kaštoŭnaści. U savieckija časy hetaje typavoje rašeńnie było papularnym čamuści ŭ vajennych», — zaznačyŭ načalnik adździeła architektury Siarhiej Lavonaŭ.
Kankretnaja data demantažu pakul nie nazyvajecca. Placoŭku pierad uvachodam u navučalnuju ŭstanovu pryvodziać u paradak. Kab paskoryć znos biusta, kiraŭnictva filijała nie maje techničnych srodkaŭ. «Jon ža ciažki. Heta ž nie toje, što ŭziaŭ i źniaŭ jaho achajna. Heta ž patrebny niejkija krany, traktary, pahruzčyki. I znoŭ ža, jak jaho zdymać — nie nakinieš ža jamu siło na šyju i nie padymieš», — narakaje pradstaŭnik administracyi navučalnaj ustanovy.
U Babrujsku 12 pomnikaŭ Leninu.
Za apošniaje dziesiacihodździe ich kolkaść skaraciłasia amal napałovu, zaznačaje miascovy palityk Aleś Čyhir.
«Niekatoryja prosta zaniepadajuć. Niekatoryja prybirajuć admysłova. Voś pomnik, jaki znachodziŭsia nasuprać administracyi Leninskaha rajona, prybrali, bo stajaŭ nasuprać carkvy. Samaha hałoŭnaha Lenina apuścili padčas „Dažynak“ da ziamli, na 2–2,5 mietry. Ciapier jon vyhladaje na płoščy davoli pahroźliva. Jon adziny, jaki achoŭvajecca dziaržavaj», — raspavioŭ Čyhir.
Akramia pomnikaŭ Leninu ŭ Babrujsku jość zavod imia Lenina, a ŭ Babrujskim rajonie — sanatoryj imia Lenina.
U Mahiloŭskaj vobłaści jość dva rajcentry, jakija naohuł nie majuć pomnikaŭ Leninu:
heta niedaloki ad Babrujska Hłusk i staražytny Mścisłaŭ. Tam zamiest Lenina ŭstalavali pomnik aśvietniku Piatru Mścisłaŭcu.
Kamientary