BDU: Vyjezd studentaŭ na navučańnie za miažu — heta nie ŭciečka mazhoŭ

Vyjezd biełaruskich studentaŭ na navučańnie za miažu — heta jašče nie ŭciečka mazhoŭ. Takoje mierkavańnie vykazaŭ 4 listapada na siesii pa adukacyi XIII Minskaha forumu načalnik upraŭleńnia mižnarodnych suviaziej BDU Uładzimir Cichanaŭ.

«Havaryć pra „brejn drejn“ (anhł. brain drain — uciečka mazhoŭ) sa studentami, pa-mojmu, heta jašče nie tyja mazhi, jakija ŭciakajuć», — skazaŭ Cichanaŭ. Na jaho dumku, u Biełarusi prablema ŭciečki mazhoŭ ludziej z vučonymi stupieniami ŭ cełym padobnaja na tuju ž prablemu ŭ Hiermanii, adnak nadzvyčajnaj niebiaśpieki dla navukovaha fondu krainy jana nie ŭjaŭlaje.

«I jašče nakont vyjezdu studentaŭ za miažu — nijakich palityčnych pryčyn tut niama», — śćviardžaje Cichanaŭ.

Pa statystycy BDU, za vosiem miesiacaŭ 2010 hoda ŭ zamiežnych kamandziroŭkach pabyvali 440 studentaŭ i 615 vykładčykaŭ hałoŭnaj VNU krainy.

Ciapier u Biełdziaržuniviersitecie vučycca kala dźviuch tysiač zamiežnych studentaŭ, u asnoŭnym heta hramadzianie azijackich dziaržaŭ, krain SND i Hruzii.

Mahčymaść sproščanaj i zručnaj sistemy abmienu studentami — heta stanoŭčy momant udziełu ŭ Bałonskim pracesie, skazała pradstaŭnik Tavarystva pa mižnarodnych adukacyjnych prajektaŭ va Uschodniaj Jeŭropie (GIBO) Majkie Lindnier.

Jana adznačyła, što supracoŭnictva biełaruskaha i niamieckaha bakoŭ sadziejničaje ŭvachodžańniu biełaruskich VNU ŭ zonu jeŭrapiejskaj adukacyjnaj prastory. Pavodle słoŭ Lindnier, «u Hiermanii jość šmathadovy vopyt realizacyi prahram Bałonskaha pracesu, i Biełarusi nie abaviazkova paŭtarać tyja pamyłki, jakija rabili pijaniery sistemy».

U svaich razvažańniach ab vopycie jeŭrapiejskich VNU Uładzimir Cichanaŭ skazaŭ, što BDU aktyŭna supracoŭničaje ź Vilniuskim univiersitetam. Adnak jon nie bačyć vialikaha sensu ŭ kantaktach hałoŭnaj biełaruskaj VNU z raźmieščanym u Litvie Jeŭrapiejskim humanitarnym univiersitetam, jaki ŭklučyŭsia ŭ prahramu pracesu ŭ 2005 hodzie. EHU byŭ zasnavany ŭ Minsku ŭ 1992 hodzie, adnak u 2004 hodzie byŭ vymušany spynić adukacyjnuju dziejnaść u Biełarusi. U 2005 hodzie pačaŭ pracu ŭ Litvie, hodam paźniej atrymaŭ status litoŭskaha ŭniviersiteta.

XIII Minski forum prachodzić 3–5 listapada. Mierapryjemstva maje na mecie adkryty dyjałoh pamiž Biełaruśsiu, Hiermanijaj, jeŭrapiejskimi arhanizacyjami i ŭsimi susiednimi dziaržavami. Asnoŭnyja temy: palityka, ekanomika, kultura i hramadzianskaja supolnaść.

• 0
• 0
• 0
• 0
• 0
• 0
• 0
• 0