Z pačatku hoda ŭ Biełarusi zhvałtavali 32 dziciaci

Za 10 miesiacaŭ 2010 hoda ŭ Biełarusi 32 dzicia byli zhvałtavany, 34 — stali achviarami dziejańniaŭ sieksualnaha charaktaru, 15 — raspusnych dziejańniaŭ. Takija źviestki pryvioŭ 11 listapada na pres-kanfierencyi ŭ Minsku sakratar kamisii pa spravach niepaŭnaletnich pry Saviecie ministraŭ Andrej Saładoŭnikaŭ.

Siem dziaŭčynak byli pryznany achviarami pravaparušalnikaŭ, jakija stvaryli ŭmovy dla prastytucyi; čatyroch niepaŭnaletnich uciahnuli ŭ prastytucyju; try stali achviarami handlu ludźmi; dzieviać dziaciej, u tym liku siem małaletnich (da 14 hadoŭ), byli ŭciahnuty ŭ raspaŭsiudžvańnie pornamateryjałaŭ; troch — vykrali i pazbavili voli.

Dla paraŭnańnia Saładoŭnikaŭ pryvioŭ źviestki 2005 hoda, kali za ŭvieś hod byli zhvałtavany 135 dziaciej, 36 — stali achviarami raspusnych dziejańniaŭ, 12 — achviarami pravaparušalnikaŭ, jakija stvaryli ŭmovy dla prastytucyi.

Pry hetym sakratar kamisii padkreśliŭ: pavodle źviestak statystyki nielha mierkavać pra toje, kolki nasamreč dziaciej byli zhvałtavany abo źviedali raspusnyja dziejańni. Časta dzieci abo ich baćki imknucca ŭtaić niepryjemny fakt. «Złačynstvy sieksualnaha charaktaru źjaŭlajucca łatentnymi, tamu my bačym tolki vierch ajśbierha», — skazaŭ Saładoŭnikaŭ.

Jon adznačyŭ pavieličeńnie kolkaści niepaŭnaletnich achviaraŭ złačyncaŭ. Za 10 miesiacaŭ hetaha hoda kolkaść złačynstvaŭ u dačynieńni da niepaŭnaletnich dasiahnuła 8.590, u toj čas jak za ŭvieś 2009 hod — 6.128. U ahulnaj struktury paciarpiełych ad pravaparušeńniaŭ dzieci skłali 9,7% (5,3% — u 2009 hodzie).

Razam z tym, pavodle słoŭ Saładoŭnikava, «nie varta kazać pra paharšeńnie situacyi ŭ hetaj śfiery»: bolšaść dziaciej (6.244) pryznany paciarpiełymi ad uchileńnia baćkami ad abaviazkaŭ pa ŭtrymańni dziaciej. Zhodna ŭ ukazam prezidenta «Ab dadatkovych mierach pa dziaržaŭnaj abaronie dziaciej u niepaśpiachovych siemjach» dzieci, baćki jakich admaŭlajucca ich utrymlivać, pryznajucca paciarpiełymi ŭ vyniku złačynstva.

Jak by tam ni było, prablema nasilla nad dziećmi ŭ Biełarusi źjaŭlajecca aktualnaj, padkreśliŭ sakratar kamisii. Za 10 miesiacaŭ 2010 hoda ŭ vyniku złačynstvaŭ zahinuli 70 dziaciej, ź jakich pałova — da 14 hadoŭ (u 2009 hodzie — 82); 80 dziaciej byli paranieny (u 2009 hodzie — 83). Achviarami naŭmysnych zabojstvaŭ stali 16 dziaciej, u tym liku 12 — va ŭzroście da 14 hadoŭ, i šeść novanarodžanych (u 2009 hodzie — 11). Dzieviać dziaciej pryznany achviarami katavańniaŭ (ź ich šeść małaletnich). Šeść dziaciej byli daviedzieny da samazabojstva, vosiem — pryznanyja pakinutymi ŭ niebiaśpiecy, 48 — paciarpiełymi ad pahrozy zabojstva.

Pra nieabchodnaść zrabić bolš žorstkim zakanadaŭstva ŭ dačynieńni da hvałtaŭnikoŭ, jakija nanieśli škodu dzieciam, zajaviŭ staršynia praŭleńnia mižnarodnaha hramadskaha abjadnańnia «Razumieńnie» Andrej Machańko. «Jość momanty, pa jakich dziejnaje zakanadaŭstva adnaznačna pavinna być bolš žorstkim, pierš za ŭsio heta tyčycca złačynstvaŭ, źviazanych ź sieksualnym nasillem u dačynieńni da niepaŭnaletnich», — padkreśliŭ jon.

Na dumku Machańko, pakarańniem «dla tych, chto ŭčyniŭ złačynstvy pałavoha charaktaru ŭ dačynieńni da dziaciej, pavinna być pažyćciovaje źniavoleńnie z abaviazkovym psichijatryčnym lačeńniem i chimičnaj kastracyjaj». Takija prapanovy, zaznačyŭ jon, mohuć vyklikać abvinavačańni ŭ adsutnaści humanizmu da złačyncaŭ, «ale maksimalna pakarać niahodnikaŭ dziaržava abaviazana».

• 0
• 0
• 0
• 0
• 0
• 0
• 0
• 0