Jak paviedamlaje sajt belarus.avtonom.org, biełaruski anarchist Maksim Vietkin pryznaŭ svaju datyčnaść da padpału banka 1 traŭnia i napadu na ambasadu Rasiei 30 žniŭnia. Siabry aktyvista ŭpeŭnienyja, što pryznańnie jon zrabiŭ pad ciskam milicyi.
Siabry Maksima Vietkina pryznajucca, što nia viedajuć «abstavinaŭ aryštu i pryznalnych pakazańniaŭ». U toj ža čas aktyvisty ŭpeŭnienyja, što ŭsio, što milicyja zmoža «ź jaho vybić, budzie zroblena albo praz katavańni, albo praz pahrozy represijaŭ u dačynieńni da blizkich», pryvodzić adkryty list siabroŭ anarchista błoh belarus.avtonom.org.
30 žniŭnia ŭviečary nieviadomyja kinuli na terytoryju rasiejskaj ambasady ŭ Miensku dźvie butelki z zapalnaj sumieśsiu. U vyniku incydentu nichto nie paciarpieŭ. Adna butelka trapiła ŭ pryparkavany na terytoryi ambasady aŭtamabil, ale achova ambasady patušyła pažar samastojna.
Pa fakcie zdareńnia była ŭzbudžanaja kryminalnaja sprava pa artykule "chulihanstva". 2 vieraśnia ŭ internecie źjaviłasia zajava, u jakoj adkaznaść za incydent ŭziała na siabie anarchisckaja hrupoŭka "Siabry Svabody". Jak paviedamlałasia ŭ zajavie, incydent la ambasady byŭ akcyjaj pratestu suprać aryštaŭ u dačynieńni da aktyvistaŭ, jakija vyjšli na abaronu Chimkinskaha lesu ŭ Maskvie.
Kamientary