Biezhałosyja

My biełarusy, z roznym koleram vačej i vałasoŭ, u nas roznyja palityčnyja simpatyi i roznyja śvietapohlady, ale jość toje, što nas abjadnoŭvaje — nam nieabyjakavy los krainy.

Mienavita heta pavinny byli ŭčora prademanstravać dziesiać biełarusaŭ, jakija pretendujuć na samuju vysokuju pasadu ŭ dziaržavie.

Nie prademanstravali.

Naadvarot, pasiadžeńnie CVK, na jakim i vyznačałasia, chto stanie kandydatam u prezidenty, pakazała, što mnohich z tych, chto bałatujecca ŭ prezidenty, nie vielmi i chvaluje los krainy, los naroda…

Łukašenka praihnaravaŭ cyrymoniju ŭručeńnia paśviedčańnia kandytata ŭ prezidenty. Naviedvańnie Parku vysokich technałohij jamu padałosia bolš važnym. Nibyta zaŭtra toj Park zachopiać inšapłaniecianie i mahčymaści sustrecca sa śpiecyjalistami pa vysokich technałohijach u jaho bolš nie budzie.

Ale kali surjozna, to, na moj pohlad, mienavita ŭčora, 18 listapada, Alaksandr Łukašenka prademanstravaŭ, što nie budzie pry jahonym kiraŭnictvie spakoju ŭ našaj Biełarusi, nie budzie ciarplivaści da čužoj dumki, nie budzie pavahi da apanientaŭ.

Nie źjaviŭšysia ŭ CVK, jon nie apazicyju praihnaravaŭ. Jon praihnaravaŭ bolš za miljon biełarusaŭ,

jakija pastavili svaje podpisy za vyłučeńnie kandydatami ŭ prezidenty pradstaŭnikoŭ demakratyčnaha ruchu. Tak, heta nie vybarščyki Łukašenki. Ale jany taksama biełarusy, jany majuć prava na svaju dumku, jany majuć prava hołasu. Za ŭsie 16 hadoŭ Łukašenka tak i nie zrazumieŭ, što ŭzrušvajuć našu krainu ŭ roznych palityčnych kryzisach nie niejkija vorahi, što heta robić jon sam. Robić voś takim staŭleńniem da miljonaŭ ludziej — ich źniavahaj i ihnaravańniem ich pazicyi.

Jon navat na hadzinu-druhuju nie pažadaŭ «źniać karonu» i stać roŭnym siarod roŭnych,

sieści pamiž Kastusiovym i Michalevičam, vystupać nie pieršym, a pa ałfavicie. Chacia dobra viedaje, što mienavita tak pavinny prachodzić sapraŭdnyja vybary.

Ale i Niaklajeŭ nie pryjšoŭ. Dla jaho arhanizavali on-łajn kanfierencyju z Varšavy, jakaja tranśliravałasia praz kampjutary na Kastryčnickuju płošču.

Adkul uziałasia «zornaść», jakaja nie dazvoliła vypracavać hrafik pajezdak tak, kab u znakavyja momanty vybarčaj kampanii znachodzicca ŭ Biełarusi?

Z adnaho boku, mahčyma, Niaklajeŭ paličyŭ, što 18 listapada ničoha losavyznačalnaha ŭ Minsku nie adbudziecca. Nu, paśviedčańnie kandydata ŭ prezidenty ŭručać, nu, budzieš mieć mahčymaść skazać členam CVK, svajmu hałoŭnamu apanientu niejkija važnyja słovy… Ale jak čałaviek, pretendujučy na samuju vysokuju pasadu, pavinien byŭ razumieć, što ŭ mnohich uźniknuć pytańni: što ty robiš padčas vybarčaj kampanii za miežami krainy, kali chočaš stać palitykam numar adzin tut, u Biełarusi? Kaho ty ahituješ u Kijevie, Prazie, Varšavie? Toje, što biełaruskaja apazicyja daŭno zahitavała Jeŭropu, my viedajem. Chto budzie ahitavać Biełaruś?

Nie źjaviŭsia na ŭručeńnie kandydackich paśviedčańniaŭ i Vital Rymašeŭski. Zamiest jaho na pasiadžeńnie CVK pryjšoŭ Pavieł Sieviaryniec. Demanstratyŭna pastaviŭ pierad saboj bieł-čyrvona-bieły ściažok, nie padaŭ ruki Lidzii Jarmošynaj, rezka vystupiŭ. U tym sensie, što sistema siońniašniaj ułady prahniła i jaje treba mianiać. Što siońniašnija ŭłady pavinny pakajacca, bo padmanvajuć narod. Zajaviŭ u vočy členam CVK, što Alaksandr Łukašenka nie moža bałatavacca na pasadu prezidenta…

Sieviaryniec, jaki prajšoŭ navat praz turmu, maje prava na takija słovy. Ale dzie ŭ hety čas byŭ Rymašeŭski?

Spačatku išli paviedamleńni, što jon u Paryžy, potym — u Hałandyi…

Skažycie, u jakoj krainie isnuje praktyka, kali palityk padčas vybaraŭ źjazdžaje za jaje miežy?.. Moža, u Jeŭropie takoje pryniata? Ci ŭ ZŠA? Padajecca, što

nidzie, navat pry samych demakratyčnych vybarach i samym sumlennym padliku hałasoŭ palityk nie moža spadziavacca na pieramohu, kali ŭ samyja važnyja momanty vybaraŭ jaho fizična ŭ krainie niama.

Ciapier užo možna havaryć i pra toje, što nie dačakalisia vybarščyki napiaredadni rehistracyi kandydataŭ u prezidenty siensacyi.

U štabach viedajuć, što isnavała damoŭlenaść pamiž najbolš mocnymi kandydytami — Niaklajevym, Sańnikavym i Ramančukom — ab tym, što jany abvieściać pra adzinstva. Ale nie zdaryłasia. U apošni momant admoviŭsia Jarasłaŭ Ramančuk. Pieradumaŭ.

I što?

Vystupajučy na pasiadžeńni CVK, Ramančuk spakvala namiaknuŭ Lidzii Jarmošynaj pra toje, jakich vybaraŭ ad jaje čakaje Biełaruś, padaryŭšy albom pra Paryž. Śmieła?.. Vytančany ździek ź nieŭjaznoj u krainy Jeŭropy Jarmošynaj?..

Nie viedaju, ci pakryŭdziłasia Lidzija Michajłaŭna, ale ja rasčaravana, što śmiełaści Ramančuku ŭsio ž nie chapiła.

Kab skazać pra soram dla biełarusaŭ žyć u apošniaj dyktatury Jeŭropy, pra toje, jak była rastoptana Kanstytucyja, pra strašennyja złačynstvy sa źniknieńniem viadomych palitykaŭ… Moža, jon zabyŭsia, što źnikłyja palityki byli jahonymi adnapartyjcami?

Tolki pa prapanovie Andreja Sańnikava chvilinaj maŭčańnia na pasiadžeńni CVK byli pamianuty tyja, chto addaŭ žyćcio za Biełaruś.

Škada, vielmi škada, što ŭ hety dzień kandydackija paśviedčańni nie atrymlivali Hienadź Karpienka, Viktar Hančar, Juryj Zacharanka…

• 0
• 0
• 0
• 0
• 0
• 0
• 0
• 0