Łukašenka siadzić u Maskvie

Siońnia ŭ Maskvie projduć pieramovy kiraŭnikoŭ dziaržaŭ Mytnaha sajuza i JeŭrAzES. Ci adbudziecca ŭ ramkach samita dvuchbakovaja sustreča prezidentaŭ Alaksandra Łukašenki i Dźmitryja Miadźviedzieva, pakul nieviadoma.

Pres-słužba prezidenta Biełarusi sustreču nie anansuje. Kali takija pieramovy adbuducca, paviedamleńnie dla ŚMI źjavicca ŭžo pa fakcie, zajaviŭ BiełaPAN kiraŭnik pres-słužby Pavieł Lohki.

Nahadajem, Alaksandr Łukašenka prybyŭ u Maskvu 8 śniežnia.

U toj ža dzień u padmaskoŭnym Nova-Aharova prajšli pieramovy prem'jer-ministraŭ Biełarusi i Rasii. Jak paviedamiŭ žurnalistam pres-sakratar Pucina Dźmitryj Piaskoŭ, bakam nie ŭdałosia damovicca pa ŭsich sprečnych pytańniach i pieramovy praciahnucca na ŭzroŭni ekśpiertaŭ.

Asnoŭnaja supiarečnaść u rasijska-biełaruskich pieramovach — pytańnie ekspartnych pošlin na naftu i naftapradukty. Maskva zajaŭlaje, što ŭ ramkach farmiravańnia Adzinaj ekanamičnaj prastory (AEP) Mytnaha sajuza hatova admovicca ad ekspartnych pošlin na naftu, kali Minsk pahodzicca pieraličvać u rasijski biudžet vyvaznyja pošliny na naftapradukty ŭ poŭnym abjomie. Biełaruski bok taki varyjant nie zadavalniaje.

U Maskvie taksama zajaŭlajuć, što ŭ vypadku ratyfikacyi da kanca 2010 hoda pakieta dakumientaŭ pa AEP usimi tryma krainami Mytnaha sajuza — Rasijaj, Biełaruśsiu i Kazachstanam — pastaŭki rasijskaj nafty ŭ Biełaruś mohuć stać biaspošlinnymi ŭ poŭnym abjomie ŭžo z 1 studzienia.

***

Jak piša siońnia rasijski «Kommiersant'»,

pieramovy Pucina ź Sidorskim «zakončylisia pravałam», ale «na dumku ekśpiertaŭ, rasijskija pieramoŭščyki sustrakajucca ź biełaruskimi z pazicyi siły — rana ci pozna biełarusy pavinny pryniać umovy rasijan».

Pavodle źviestak «'», «biełarusy hatovy byli pajści na sastupki ŭ spravie biaspošlinnaj pastaŭki rasijskaj nafty na pradpryjemstvy Biełarusi. Viadoma, što ciapier Rasija biaspošlinna hatova pastaŭlać susiedniaj krainie 6,5 młn. ton nafty, a paśla ŭvachodžańnia Biełarusi ŭ AEP — i bolš». «Adnak kolki — dahetul niezrazumieła. Zrazumieła, što patreby biełaruskich NPZ, jakija pierapracoŭvajuć rasijskuju naftu, što potym idzie na ekspart, pavinny być zadavolenyja, pažadana ŭ poŭnym abjomie. Heta zrazumieła pierš za ŭsio biełaruskim pieramoŭščykam», — adznačaje vydańnie.

Pa prahnozach analitykaŭ, paśla pravalnaj sustrečy premjeraŭ prezidenty Łukašenka i Miadźviedzieŭ naŭrad ci buduć siońnia abmiarkoŭvać hetyja sprečnyja pytańni — vyrašeńnie vostrych prablem jany, chutčej za ŭsio, pakinuć ekśpiertam i ŭradam.

Jak ličyć biełaruski palitołah Valeryj Karbalevič, nijakich kankretnych i važnych rašeńniaŭ ad sustrečy ŭ Maskvie čakać nie varta. Asnoŭnaja meta pajezdki Łukašenki ŭ Maskvu — prademanstravać napiaredadni vybaraŭ, što ŭ biełaruska-rasijskich adnosinach budzie ŭsio narmalna.

Što da mahčymaści dvuchbakovaj sustrečy Łukašenki i Miadźviedzieva, to dla biełaruskaha kiraŭnika pryncypovy sam jaje fakt, miarkuje ekśpiert. «Dla Łukašenki heta było b vielmi važna, ale Miadźviedzieŭ naŭrad ci na heta pahodzicca», — ličyć palitołah. Jak paviedamiła pres-słužba prezidenta RF, siońnia na pasiadžeńni vyšejšaha orhana Mytnaha sajuza płanujecca padpisać try pahadnieńni, jakija farmirujuć narmatyŭna-pravavuju bazu AEP, — ab uzhodnienaj makraekanamičnaj palitycy; ab pryncypach valutnaj palityki; ab stvareńni ŭmoŭ na finansavych rynkach dla zabieśpiačeńnia svabodnaha ruchu kapitału.

Akramia taho, prezidenty majuć namier unieści źmianieńni ŭ pieralik adčuvalnych tavaraŭ, adnosna jakich rašeńnie ab źmianieńni staŭki ŭvaznoj mytnaj pošliny prymaje kansiensusam kamisija MS. Płanujecca taksama abmierkavać metazhodnaść uniasieńnia źmianieńniaŭ i dapaŭnieńniaŭ u dahavor ab kamisii MS.

Paśla zakančeńnia trochbakovaj sustrečy da prezidentaŭ Biełarusi, Kazachstana i Rasii dałučacca lidary astatnich krain JeŭrAzES i naziralniki pry arhanizacyi. Na samicie JeŭrAzES kiraŭnikam dziaržaŭ u farmacie «piaciorki» nieabchodna padpisać šerah dakumientaŭ.

• 0
• 0
• 0
• 0
• 0
• 0
• 0
• 0