ZŠA nie padtrymlivaje budaŭnictva biełaruskaj AES

Administracyja ZŠA nie vykazvała biezahavoračnaj padtrymki płanam Biełarusi pa budaŭnictvie AES,

zajaviła pamočnik dziaržsakratara ZŠA pa pytańniach kantrolu nad uzbrajeńniami Roŭz Hietemiuler na sustrečy ź litoŭskimi parłamientaryjami 9 lutaha ŭ Vilni.

Pamočnik dziaržsakratara sustrełasia ŭ siejmie z členami kamiteta nacyjanalnaj biaśpieki i abarony i kamiteta zamiežnych spraŭ. Sustreča była pryśviečana dahavoru ab SNU pamiž ZŠA i Rasijaj.

Jak paviedamiŭ staršynia kamisii siejma pa jadziernaj enierhietycy Rokas Žylinskas, u adkaz na pytańnie, čamu administracyja ZŠA vykazała svaju padtrymku prajektu biełaruskaj AES, jaki realizujecca z parušeńniem mižnarodnaha zakanadaŭstva i va ŭmovach niedemakratyčnaha pryniaćcia rašeńniaŭ, pamočnik dziaržsakratara ZŠA zajaviła, što prezident ZŠA Barak Abama

padtrymaŭ raźvićcio mirnaj jadziernaj enierhietyki ŭ cełym, majučy na ŭvazie prajekty, jakija vykonvajucca ŭ strohaj adpaviednaści z patrabavańniami MAHATE.

Žilinskas, pavodle jaho słoŭ, nahadaŭ pamočniku dziaržsakratara ZŠA ab pazicyi Litvy ŭ dačynieńni da prajekta biełaruskaj AES: jaho realizacyja nieprazrystaja i ažyćciaŭlajecca nasupierak patrabavańniam Kanviencyi JEEK AAN ab acency ŭździejańnia na navakolnaje asiarodździe ŭ transhraničnym kantekście i mižnarodnaj kanviencyi MAHATE pa jadziernaj biaśpiecy. Hetyja kanviencyi abaviazvajuć krainy, jakija źbirajucca ŭzvodzić jadziernyja abjekty, pravodzić kansultacyi z susiedziami pierad pryniaćciem adpaviednych rašeńniaŭ.

«Placoŭka dla biełaruskaj AES abranaja biez papiaredniaha abmierkavańnia alternatyŭ i kansultacyj ź Litvoj, i da taho ž za 50 km ad našaj stalicy Vilni. Taki padychod supiarečyć zhadanym mižnarodnym kanviencyjam i razburaje pryncypy dobrasusiedstva, heta aficyjnaja pazicyja Litvy pa biełaruskaj AES», — padkreśliŭ Žylinskas.

Ab pazicyi ZŠA pa pytańni budaŭnictva ŭ Biełarusi AES było zajaŭlena na sustrečy kiraŭnikoŭ źniešniepalityčnych viedamstvaŭ dźviuch krain 1 śniežnia 2010 hoda ŭ Astanie, dzie prachodziŭ samit ABSIE. «ZŠA padtrymlivajuć hetu dziejnaść, jakaja ŭklučaje spaborny praces prajektavańnia i budaŭnictva nadziejnaj i biaśpiečnaj stancyi, jakaja dziejničaje ŭ adpaviednaści z harantyjami MAHATE. ZŠA taksama padtrymlivajuć namahańni Biełarusi pa najchutčejšaj realizacyi hetaha kamiercyjnaha prajekta», — paviedamiła pres-słužba MZS Biełarusi pa vynikach pieramoŭ Siarhieja Martynava i Chiłary Klintan.

• 0
• 0
• 0
• 0
• 0
• 0
• 0
• 0