Patrabujem rasśledavać fakty katavańniaŭ u SIZA KDB

Abvinavačanyja pa spravie «ab masavych biesparadkach» źviarnulisia da hienieralnaha prakurora Respubliki Biełaruś z prośbaj rasśledavać fakty katavańniaŭ, jakija ŭžyvajucca ŭ SIZA KDB.

Hienieralnamu prakuroru Respubliki Biełaruś

R. A. Vasileviču

Spadar prakuror!

My, abvinavačanyja pa spravie ab tak zvanych «masavych biesparadkach 19 śniežnia 2010», jakija prajšli praz utrymańnie pad vartaj u SIZA KDB, patrabujem spynić pravavuju anarchiju i ŭsiodazvolenaść ludziej u pahonach, jakija adbyvajucca siońnia ŭ krainie i ŭ SIZA KDB u pryvatnaści.

Paśla padziej 19 śniežnia 2010 Biełaruś adčuła šok i zanuryłasia ŭ atmaśfieru strachu. U XXI stahodździ biełarusaŭ viarnuli ŭ 1937 hod z «varankami», katavańniami, sudziliščam z udziełam iłžeśviedak u pahonach i biesčałaviečnymi prysudami, łamajučy čałaviečyja losy.

Sotni biełarusaŭ padvierhnulisia zatrymańniam z užyvańniem hvałtu i žorstkaści i palityčna matyvavanym aryštam. Usio heta supravadžałasia prynižeńniem ich čałaviečaj hodnaści, parušeńniem ich pravoŭ padčas śledstva i ŭ sudach.

28 lutaha 2011 kandydat u prezidenty Respubliki Biełaruś Aleś Michalevič raspaŭsiudziŭ zajavu, dzie vykłaŭ kankretnyja fakty katavańniaŭ, jakija ŭžyvalisia ŭ dačynieńni da jaho i inšym hramadzianaŭ Biełarusi, jakija ŭtrymlivajucca ŭ SIZA KDB.

Biełaruskaja i mižnarodnaja hramadskaść, bieź pierabolšańnia, šakavanyja hetymi faktami. Pravaabaroncy ŭžo zapatrabavali ad Vas rasśledavać vykładzienyja fakty i pakarać vinavatych u hetym.

Niezaležnyja biełaruskija i mižnarodnyja ekśpierty, hruntujučysia na faktach, zajaŭlali ab tym, što pravakacyi, jakija mieli miesca na płoščy Niezaležnaści 19 śniežnia 2010, byli arhanizavanyja dla dyskredytacyi demakratyčnych kandydataŭ.

Na padstavie vykładzienaha my patrabujem:

1. Praviadzieńnia niezaležnaha — z pryciahnieńniem mižnarodnych ekśpiertaŭ — rasśledavańnia faktaŭ hvałtu, žorstkaha abychodžańnia i katavańniaŭ u dačynieńni da aryštavanych pa spravie «19 śniežnia 2010».

2. Nieadkładnaj pravierki ŭmovaŭ utrymańnia ŭ SIZA KDB kandydataŭ u prezidenty Respubliki Biełaruś i čalcoŭ ich kamandaŭ, mietadaŭ pracy supracoŭnikaŭ KDB padčas praviadzieńnia rasśledavańnia.

3. Biezumoŭnaha vyzvaleńnia z turmaŭ usich viaźniaŭ sumleńnia, palityčnych źniavolenych, aryštavanych previentyŭna, padčas i paśla razhonu mirnaj akcyi 19 śniežnia, źniaćcia ź ich palityčna matyvavanych abvinavačańniaŭ.

Podpisy:

Siarhiej Vaźniak, davieranaja asoba eks-kandydata ŭ prezidenty Uładzimira Niaklajeva

Andrej Dźmitryjeŭ, kiraŭnik vybarčaha štaba eks-kandydata ŭ prezidenty Uładzimira Niaklajeva

Uładzimir Kobiec, kiraŭnik vybarčaha štaba eks-kandydata ŭ prezidenty Andreja Sańnikava

Aleh Korban, lidar moładzievaha kryła AHP

Anastasija Pałažanka, namieśnik staršyni «Maładoha Frontu»

Natalla Radzina, redaktar sajta charter97.org

Vital Rymašeŭski, eks-kandydat u prezidenty.

• 0
• 0
• 0
• 0
• 0
• 0
• 0
• 0