Nadyšła paŭnata času, napisana ŭ Evanhielli. Miera pierapoŭniłasia, i pavinien nastać kanflikt

Biełaruskija ŭłady nie zhadzilisia na praciah vizaŭ siami ksiandzam i piaci siostram-zakońnicam, što pracavali ŭ Haradzienskaj katalickaj dyjacezii. Da kanca śniežnia ŭsie hetyja duchoŭnyja, jakija źjaŭlajuca hramadzianami Polščy, pavinny pakinuć terytoryju Biełarusi. Ułady tłumačać rašeńnie patrebaj uładkavać na vyzvalenyja miescy maładych śviataroŭ i siaścior – biełaruskich hramadzianaŭ. Pradstaŭniki Haradzienskaj dyjacezii havorać, što kaścioł kirujecca ŭłasnym pravam, i tolki biskup, a nia śvieckija ŭłady vyrašajuć, jakoha śviatara j na jakuju pasadu pryznačyć.

Pra toje, što siami ksiandzam i piaci siostram z Polščy, što pracujuć na Haradzienščynie, admovilisia praciahnuć vizy, stała viadoma jašče 20 vieraśnia. Haradzienski biskup Alaksandar Kaškievič sprabavaŭ damahčysia admieny hetaha rašeńnia, ale marna. Apaviadaje vikaryj haradzienskaha katedralnaha Farnaha kaściołu ksiondz Andrej Znoska:

(ks.Znoska:) «Byli try zvaroty ksiandza-biskupa da ŭładaŭ. Spačatku da haradzienskich uładaŭ, paśla dva listy ŭ Miensk, u Kamitet u spravach relihijaŭ i nacyjanalnaściaŭ. I dniami, zaŭčora albo ŭčora, pryjšoŭ nastupny kateharyčny adkaz: «Usie siem ksiandzoŭ i piać siostraŭ pavinny vyjechać u toj čas, kali ŭ ich buduć zakančvacca vizy. Heta prykładna da kanca śniežnia pavinny vyjechać. Kateharyčny adkaz».

(Karespandent:) «A čym matyvujuć ułady?»

(ks.Znoska:) «Matyvacyja trochi biazhuzdaja. Tym, što nibyta pavinny stvaryć miesca dla maładych ksiandzoŭ. Pavinny bolš prymać na pracu miascovych. Tolki zabyvajucca pra toje, što kaścioł kirujecca svaim ułasnym pravam sui juris. Jon adździeleny ad dziaržavy, i biskup vyrašaje, jak pracaŭładkoŭvać svaich ksiandzoŭ. Usie svaje – i tyja, što pryjechali z Polščy, i miascovyja. U nas takoha padziełu niama i być nia moža».

Supracoŭnik Kamitetu ŭ spravach relihijaŭ i nacyjanalnaściaŭ Alaksandar Kalinaŭ admoviŭsia kamentavać pryniataje rašeńnie. Siońnia biskup Alaksandar Kaškievič vyjechaŭ u Miensk abmierkavać sytuacyju kaściołu na Haradzienščynie (vysyłka śviataroŭ i siostraŭ, haładoŭka viernikaŭ) z nuncyjem Vatykanu ŭ Biełarusi arcybiskupam Marcinam Vidavičam. Kiraŭnictva Haradzienskaj dyjacezii źbirajecca vystupić z adkrytym zvarotam da biełaruskich uładaŭ. Ksiondz Andrej Znoska ličyć, što ŭ abvastreńni dačynieńniaŭ z kaściołam vinavataja miascovaja ŭłada.

(ks. Znoska:) «Prablema nie ŭ zakonie. Prablema nie ŭ kanstytucyjnaj svabodzie – jana jość. Tolki nam tut na miescy, u Horadni, jaje nie dajuć. A čamu heta zdaryłasia mienavita ŭ hetym śniežni? Vidać, nastaŭ taki momant, jak napisana ŭ Evanhielli, nadyšła paŭnata času. Miera pierapoŭniłasia, pavinien nastać kanflikt».

Ciapier u Haradzienskaj dyjacezii pracujuć 180 śviataraŭ. Dźvie traciny – hramadzianie Biełarusi, rešta – hramadzianie Polščy.

• 0
• 0
• 0
• 0
• 0
• 0
• 0
• 0