Biespaśpiachova zakončyłasia sproba Iryny Kazulinaj padčas sustrečy z mužam u kalonii ŭhavaryć jaho spynić haładoŭku. Źniavoleny palityk haładaje ŭžo 47 dzion.
Biespaśpiachova zakončyłasia sproba Iryny Kazulinaj padčas sustrečy z mužam u kalonii ŭhavaryć jaho spynić haładoŭku. Źniavoleny palityk haładaje ŭžo 47 dzion.
Sustreča Iryny Kazulinaj z mužam doŭžyłasia kala tryccaci chvilin. Iryna kaža, što Alaksandar Kazulin mocna schudnieŭ, ale trymajecca badziora. Na prośbu spynić haładoŭku palityk adkazaŭ admovaj – jon ličyć, što asnoŭnyja jahonyja patrabavańni nia vykananyja.
Alaksandar Kazulin pa-raniejšamu damahajecca, kab adna z krainaŭ «vialikaj vaśmiorki» pastaviła na razhlad u Radzie biaśpieki AAN biełaruskaje pytańnie. Druhim patrabavańniem jość zvarot u AAN Palityčnaj rady demakratyčnych siłaŭ Biełarusi adnosna parušeńnia pravoŭ čałavieka ŭ krainie. Palityk damahajecca, kab Palityčnaja rada źviarnułasia j da premjera Sidorskaha z prapanovaj uziać u svaje ruki ŭładu. Pavodle Iryny Kazulinaj, jaje muž miarkuje, što heta ŭsio vykanalna.
(Kazulina:) «Jon nahadaŭ, što svaje patrabavańni vystaviŭ jašče 20 vieraśnia, siońnia ŭžo śniežań. Ja jamu tłumačyła nakont ambasadaraŭ z krainaŭ Eŭraźviazu – što, mahčyma, u ich jość niejkija ciažkaści. Jon adkazaŭ, što razumieje, što razhlad biełaruskaha pytańnia nia moža adbycca dakładna zaŭtra. Ale, na jahonuju dumku, realna chacia b zajavić pra namier heta zrabić. Jon nia ličyć, što heta nievykanalnaje patrabavańnie, i nie razumieje, čamu hetaha nia robiać».
Iryna Kazulina zrabiła vysnovu, što administracyja kalonii zacikaŭlenaja ŭ tym, kab sytuacyja z haładoŭkaj Alaksandra Kazulina chutka raźviazałasia. Pavodle jaje, mužu prapanavali pa zakančeńni haładoŭki lekavacca ŭ respublikanskim turemnym špitali, ale ad hetaj prapanovy Alaksandar Kazulin admoviŭsia. «Jak čałaviek mocny, jon ličyć, što sam spravicca z haładoŭkaj», – kaža Iryna Kazulina.
U Viciebsk razam ź Irynaj Kazulinaj jeździŭ były deputat Siarhiej Skrabiec, jaki jašče try tydni tamu ŭ kalonii «Vićba-3» haładaŭ razam z Alaksandram Kazulinym. Siońnia na spatkańnie z Kazulinym Skrabca nie puścili. Adnak jamu ŭdałosia pahutaryć z supracoŭnikami administracyi pra toje, jak bavić čas jahony siabra. Siarhieju Skrabcu apaviali, što Alaksandar Kazulin šmat špacyruje, čytaje, naviedvaje duš.
(Skrabiec:) «Siońnia ranicaj jon pryniaŭ duš i navat naviedaŭ turemnuju cyrulniu. Rychtavaŭsia da sustrečy z žonkaj, bo pačuŭ pa Radyjo Svaboda, što jana pryjedzie».
Siońnia idzie 47-my dzień haładoŭki Alaksandra Kazulina. Pavodle turemnych daktaroŭ, za čas haładoŭki palityk schudnieŭ na 26 kilahramaŭ. Daktary adznačajuć, što ŭ Kazulina niebiaśpiečna źniziŭsia cisk i temperatura cieła.
Nahadajem, eks-kandydat na prezydenta Alaksandar Kazulin asudžany na piać z pałovaj hadoŭ źniavoleńnia za chulihanstva j arhanizacyju vuličnych biesparadkaŭ. Vinavatym siabie Kazulin nie pryznaje j tłumačyć pieraśled palityčnymi pryčynami.
Kamientary