«Naša Niva» atrymała papiaredžańnie ad Mininfarmacyi

Ministerstva infarmacyi nakiravała ŭ adras redakcyi haziety «Naša Niva» papiaredžańnie ab niedapuščalnaści parušeńnia normaŭ zakona «Ab srodkach masavaj infarmacyi», paviedamlaje BIEŁTA. Sama Redakcyja jaho jašče nie atrymała.

«Padstavaj dla papiaredžańnia stała publikacyja na staronkach haziety niedakładnaj infarmacyi ab tym, što adna z achviaraŭ teraktu 11 krasavika nibyta znachodziłasia na stancyi da poźniaha viečara», — ličać pradstaŭniki Mininfarmacyi.

Na dumku Mininfarma, raspaŭsiudžvańnie hetaj infarmacyi pryčyniaje škodu hramadzkim intaresam, dyskredytuje orhany dziaržaŭnaj ułady, vyratavalnyja i miedycynskija słužby, jakija brali ŭdzieł u akazańni dapamohi paciarpiełym u vyniku teraktu.

Taksama Ministerstvam infarmacyi 15 krasavika było vyniesiena papiaredžańnie ŭ adras redakcyi haziety «Narodnaja vola» ŭ suviazi z raspaŭsiudžvańniem vydańniem źviestak, jakija nie adpaviadajuć rečaisnaści i haniać dziełavuju reputacyju Biełteleradyjokampanii. «Fakt raspaŭsiudu takich źviestak byŭ ustalavany 13 krasavika 2011 rašeńniem Vyšejšaha haspadarčaha sudu», — udakładnili ŭ ministerstvie.

U historyi z Marynaj Šubič zastajucca niajasnaści. Dźvie krynicy, u ščyraści jakich my nie sumniavajemsia, niezaležna adna ad druhoj paćvierdzili, što dziaŭčyna pozna trapiła ŭ špital. U toj ža čas pavodle zapisaŭ u pryjomnym pakoi, jana była ŭ balnicy ŭžo, a 18.30. Roznačytańni mohuć tłumačycca šokavym stanam vidavočcaŭ u toj dzień.

Kali kančatkova vyjavicca, što hazieta dapuściła pamyłku, my damo ŭdakładnieńnie. Nie pamylajecca tolki toj, chto ničoha nie robić. Tak, navat kampietentnyja orhany spačatku pamyłkova ŭklučyli dźvie asoby ŭ śpis pamierłych i apublikavali ich imiony. Ci i im dało papiaredžańnie Ministerstva infarmacyi?

U cełym, u stresavaj situacyi paśla vybuchu «Naša Niva» davała šmat infarmacyi, karysnaj dla hramadstva, rabiła toje chutka i abjektyŭna, čym zasłužyła padziaki i pavahu čytačoŭ.

I što zusim niezrazumieła — jakim čynam heta publikacyja moža dyskredytavać «orhany dziaržaŭnaj ułady». U artykule nie dajecca acenki ich dziejańniam. Dziejańni ž miedycynskaj i vyratavalnaj słužbaŭ byli acenienyja ŭ tym samym numary nadzvyčaj vysoka: ich apieratyŭnaści i prafiesijnaści pryśviečany redakcyjny kamientar.

Papiaredžańnie «NN» stała naturalnym praciaham palityki, skiravanaj na abmiežavańnie prastory dla dziejańnia niezaležnych ŚMI.

• 0
• 0
• 0
• 0
• 0
• 0
• 0
• 0