ZŠA nie pryznajuć referendumu ab Kanstytucyjnym akcie

Ambsadarka Złučanych Štataŭ Ameryki ŭ Biełarusi Karen Stjuart vystupiła z acenkaj stanu biełaruska-amerykanskich dačynieńniaŭ. Jana znoŭ zaklikała biełaruskija ŭłady vyzvalić palitviaźniaŭ i zaznačyła, što ZŠA buduć vykarystoŭvać lubuju mahčymaść dla ŭźniaćcia biełaruskaha pytańnia na mižnarodnaj arenie, u tym liku ŭ AAN.

Padvodziačy vyniki raźvićcia dačynieńniaŭ Biełarusi j ZŠA ŭ 2006 hodzie, ambasadarka Karen Stjuart zaznačyła, što na aficyjnym ŭzroŭni stanoŭčych momantaŭ u ich było mała. ZŠA nie pryznali volnymi j spraviadlivymi sakavickija prezydenckija vybary ŭ Biełarusi, šmat razoŭ vykazvali zaniepakojenaść palityčna matyvavanymi aryštami j prysudami, ciskam biełaruskich uładaŭ na niezaležnyja ŚMI, niaŭradavyja arhanizacyi j hrupy viernikaŭ.

U suviazi z kryzisam, jaki ŭźnik u dačynieńniach Biełarusi i Rasiei z-za cenaŭ na haz, spadarynia Stjuart vykazała pazycyju svajho ŭradu: krainy nie pavinny vykarystoŭvać enerhanośbity ŭ jakaści palityčnaj zbroi ŭ miždziaržaŭnych dačynieńniach. Vykazała ambasadarka aficyjnuju pazycyju svajho ŭradu i adnosna patencyjnaha praviadzieńnia referendumu ab Kanstytucyjnym akcie sajuzu Biełarusi j Rasiei:

(Stjuart:) «Naša pazycyja palahaje ŭ tym, što ŭ ciapierašnich umovach u Biełarusi niemahčymy referendum, jaki b dazvoliŭ nam pryznać jaho całkam svabodnym i spraviadlivym vykazvańniem voli biełaruskaha narodu. Toje, što niadaŭna było padoŭžanaje dziejańnie «Aktu ab demakratyi dla Biełarusi», śviedčyć: ciapier u Kanhresu jość mierkavańnie adnosna taho, što ŭ isnych umovach taki referendum nia moža być pryznany».

Novy «Akt ab demakratyi dla Biełarusi», pavodle spadaryni Stjuart, dakładna vyznačaje palityku ŭradu ZŠA ŭ adnosinach da Biełarusi:

(Stjuart:) «Palityka ZŠA maje być skiravanaj na padtrymku imknieńnia biełaruskaha narodu da demakratyi, pravoŭ čałavieka j pravavoj dziaržavy, na padtrymku niezaležnaści j suverenitetu hetaj krainy, spryjańnie demakratyčnym rucham i instytutam, urad ZŠA maje zaklikać da vyzvaleńnia palitźniavolenych, ciesna supracoŭničać ź inšymi dziaržavami j mižnarodnaj supolnaściu dziela realizacyi hetych zadačaŭ».

Spadaryni Stjuart padkreśliła, što ŭ chodzie dyskusii ŭ Radzie Biaśpieki AAN na minułym tydni Złučanyja Štaty nie apošni raz uźniali pytańnie ab sytuacyi z pravami čałavieka ŭ Biełarusi.

(Stjuart:) «Złučanyja Štaty planujuć praciahvać uzdymać pytańnie ab sytuacyi z demakratyjaj i pravami čałavieka ŭ Biełarusi ź luboj zručnaj dla hetaha nahody. Ciapier my razhladajem ceły šerah takich mahčymaściaŭ».

Spadarynia Stjuart taksama zajaviła, što ŭ vypadku prahresu na šlachu demakratyzacyi Biełarusi Złučanyja Štaty, jak i Eŭraźviaz, hatovyja akazać značnuju ekanamičnuju j humanitarnuju padtrymku biełaruskamu narodu.

Zdymak z sajtu Ambasady ZŠA ŭ Biełarusi

• 0
• 0
• 0
• 0
• 0
• 0
• 0
• 0