Miaśnikovič atrymaŭ kitajski orden
Premjera ŭznaharodzili «za ŭkład u raźvićcio navukova-techničnaha supracoŭnictva».
Prem'jer-ministru Biełarusi Michaiłu Miaśnikoviču ŭručanaja najvyšejšaja ŭradavaja ŭznaharoda KNR — orden Družby Kitajskaj Narodnaj Respubliki.
Jak paviedamlaje pres-słužba biełaruskaha ŭrada, uručeńnie adbyłosia 1 červienia padčas sustrečy premjera z pasłom Kitaja ŭ Biełarusi Łu Hujčenam.
Uznaharodžańnie było inicyjavanaje ŭ 2010 hodzie Akademijaj navuk pravincyi Šańdun (KNR) za ŭkład Miaśnikoviča ŭ raźvićcio navukova-techničnaha supracoŭnictva pamiž Biełaruśsiu i Kitajem i padtrymana MZS KNR, Akademijaj navuk KNR i Dziaržaŭnaj administracyjaj pa spravach zamiežnych śpiecyjalistaŭ KNR, adznačajecca ŭ paviedamleńni pres-słužby.
Na sustrečy abmierkavanyja pierśpiektyvy dalejšaha raźvićcia handlova-ekanamičnaha, navukova-techničnaha i kredytna-inviestycyjnaha supracoŭnictva pamiž Biełaruśsiu i Kitajskaj Narodnaj Respublikaj, razhledžanyja pytańni realizacyi sumiesnych prajektaŭ.
Pavodle dadzienych pres-słužby, za studzień-luty 2011 abjom handlu tavarami Biełarusi z Kitajem pavialičyŭsia ŭ paraŭnańni z anałahičnym pieryjadam 2010 hoda na 21,2% i skłaŭ 424,3 młn dalaraŭ. Ekspart biełaruskich tavaraŭ u Kitaj skłaŭ 75,5 młn dalaraŭ, abo 44,3% da ŭzroŭniu studzienia-lutaha 2010 hoda. Padzieńnie abjomaŭ biełaruskaha ekspartu abumoŭlenaje ŭ pieršuju čarhu značnym źmianšeńniem abjomaŭ pastavak kalijnych uhnajeńniaŭ u KNR. Ekspart biełaruskich tavaraŭ u Kitaj u studzieni-lutym 2011 hoda biez uliku pastavak kaliju skłaŭ 122,9% da ŭzroŭniu studzienia-lutaha minułaha hoda. Impart kitajskich tavaraŭ za pieršyja dva miesiacy 2011 hoda dasiahnuŭ 348,8 młn dalaraŭ i vyras da anałahičnaha pieryjadu minułaha hoda na 94%.
Na siońniašni dzień uradam i bankami KNR dla finansavańnia sumiesnych inviestycyjnych prajektaŭ u Biełarusi adkryty kredytnyja linii na sumu 15 młrd dalaraŭ.
U Biełarusi asvojvajucca naŭprostyja kitajskija inviestycyi. U 2008 hodzie z udziełam AAT «Haryzont» i karparacyi «Midea Hrup» stvorana SP «Haryzont-Midea». U 2010 hodzie biełaruskaje AAT «MZKC» i kitajskaja kampanija «Sanczian» stvaryli SP «Vołat-Sanczian». Pačataje supracoŭnictva pa prajektach budaŭnictva ŭ Minsku žyłoha masivu ŭ mikrarajonie Labiažy, hatela «Piekin», šmatfunkcyjanalnaha kompleksu «Čajna-taŭn». U 2010 hodzie orhany dziaržkiravańnia dźviuch krain pačali prapracoŭku pytańniaŭ stvareńnia ŭ Biełarusi kitajska-biełaruskaha technaparku (industryjalnaj zony).
Kamientary