Vyznačany pieramožcy II konkursu aŭtarskaj pieśni «Kupałaŭskija vakacyi»

Finalny kancert konkursu aŭtarskaj pieśni «Kupałaŭskija vakacyi», jaki adbyŭsia 11 červienia ŭ Viazyncy (Maładziečanski rajon Minskaj vobłaści), vyznačyŭ pieramožcaŭ.

Pryz za najlepšaje vykanańnie pieśni na słovy Janki Kupały atrymaŭ Arciom Sitnikaŭ. U naminacyi «Za lepšaje spałučeńnie muzyki i tekstu» favarytami stali Michaś Baranoŭski i hurt «Nielha zabyć», a ŭ «Lepšaj prezientacyi pieśni» — Channa Čumakova.

Śpiecyjalny pryz ad kampanii «Budźma» atrymaŭ užo viadomy aŭtar-vykanaŭca biełaruskich piesień Alaksiej Niežaviec, a śpiecpryz «Nadzieja» dastaŭsia hurtu «Pacuki», siaredni ŭzrost muzykantaŭ jakoha składaje 16,5 hady.

Vykanaŭcam najlepšaj aŭtarskaj pieśni i ŭładalnikam pryza hladackich simpatyj byŭ pryznany Siarhiej Bašłykievič, siarod jaho ŭznaharodaŭ — mahčymaść pabačyć Biełaruś z vyšyni ptušynaha palotu razam z fatohrafam i redaktaram haziety «Turizm i otdych» Siarhiejem Płytkievičam.

Bašłykievič paviedamiŭ, što na hitary jon «navučyŭsia hrać hadoŭ šeść tamu». Vykanaŭca «na ŭzroŭni padśviadomaści nie nadta vieryŭ» u mahčymaść atrymać pryz hladackich simpatyj, ale pryznajecca, što jamu «vielmi chaciełasia».

Bałyškievič vystupaje soła, ale jość vierahodnaść, što ŭ budučyni jon stvoryć duet. «Chočacca vystupać duetam, bo ŭ mianie jość siabar, ź jakim my zvyčajna ihrajem, u nas jość sumiesnyja pieśni, — paviedamiŭ muzykant. — Adnak atrymlivajecca vielmi ciažka navat udvuch sabracca, tamu pakul prychodzicca solna vystupać».

Pavodle słoŭ Bašłykieviča, konkurs spadabaŭsia jamu farmatam — «vielmi pryjemna i cikava było pasłuchać», a finał prajšoŭ «prosta šykoŭna».

Svoj udzieł ŭ śviacie aŭtarskaj biełaruskamoŭnaj pieśni jon razhladaje jak realizavanuju mahčymaść zavieści novyja znajomstvy ŭ hetym muzyčnym asiarodździ.

Dyrektar Dziaržaŭnaha litaraturnaha muzieja Janki Kupały Alena Macievasian paviedamiła, jak uźnikła ideja stvareńnia konkursu. «U muziei pracuje dva kłuby: kłub maładych paetaŭ „Litaraturnaje pradmieście“, jakim kiruje Ludmiła Rubleŭskaja, i kłub, jaki ab`iadnoŭvaje muzykaŭ, — „Sproba aktavy“. My z Alesiem Kamockim (kampanija „Budźma“) padumali, što treba jašče bolš intensiŭna dałučać moładź da muzieja, i vyrašyli arhanizavać konkurs aŭtarskaj biełaruskamoŭnaj pieśni pry muziei», — paviedamiła jana.

Asnoŭnymi metami konkursu, pavodle słoŭ Macievasian, ź`iaŭlajucca «papularyzacyja historyka-kulturnaj spadčyny Biełarusi, kupałaŭskaj spadčyny, biełaruskaj movy, litaratury i, viadoma, pryciahnieńnie naviedvalnikaŭ, pierš za ŭsio turystaŭ, da kupałaŭskich miaścin».

• 0
• 0
• 0
• 0
• 0
• 0
• 0
• 0