Вызначаны пераможцы II конкурсу аўтарскай песні «Купалаўскія вакацыі»

Фінальны канцэрт конкурсу аўтарскай песні «Купалаўскія вакацыі», які адбыўся 11 чэрвеня ў Вязынцы (Маладзечанскі раён Мінскай вобласці), вызначыў пераможцаў.

Прыз за найлепшае выкананне песні на словы Янкі Купалы атрымаў Арцём Сітнікаў. У намінацыі «За лепшае спалучэнне музыкі і тэксту» фаварытамі сталі Міхась Бараноўскі і гурт «Нельга забыць», а ў «Лепшай прэзентацыі песні» — Ханна Чумакова.

Спецыяльны прыз ад кампаніі «Будзьма» атрымаў ужо вядомы аўтар-выканаўца беларускіх песень Аляксей Нежавец, а спецпрыз «Надзея» дастаўся гурту «Пацукі», сярэдні ўзрост музыкантаў якога складае 16,5 гады.

Выканаўцам найлепшай аўтарскай песні і ўладальнікам прыза глядацкіх сімпатый быў прызнаны Сяргей Башлыкевіч, сярод яго ўзнагародаў — магчымасць пабачыць Беларусь з вышыні птушынага палёту разам з фатографам і рэдактарам газеты «Туризм и отдых» Сяргеем Плыткевічам.

Башлыкевіч паведаміў, што на гітары ён «навучыўся граць гадоў шэсць таму». Выканаўца «на ўзроўні падсвядомасці не надта верыў» у магчымасць атрымаць прыз глядацкіх сімпатый, але прызнаецца, што яму «вельмі хацелася».

Балышкевіч выступае сола, але ёсць верагоднасць, што ў будучыні ён створыць дуэт. «Хочацца выступаць дуэтам, бо ў мяне ёсць сябар, з якім мы звычайна іграем, у нас ёсць сумесныя песні, — паведаміў музыкант. — Аднак атрымліваецца вельмі цяжка нават удвух сабрацца, таму пакуль прыходзіцца сольна выступаць».

Паводле слоў Башлыкевіча, конкурс спадабаўся яму фарматам — «вельмі прыемна і цікава было паслухаць», а фінал прайшоў «проста шыкоўна».

Свой удзел ў свяце аўтарскай беларускамоўнай песні ён разглядае як рэалізаваную магчымасць завесці новыя знаёмствы ў гэтым музычным асяроддзі.

Дырэктар Дзяржаўнага літаратурнага музея Янкі Купалы Алена Мацевасян паведаміла, як узнікла ідэя стварэння конкурсу. «У музеі працуе два клубы: клуб маладых паэтаў „Літаратурнае прадмесце“, якім кіруе Людміла Рублеўская, і клуб, які аб`ядноўвае музыкаў, — „Спроба актавы“. Мы з Алесем Камоцкім (кампанія „Будзьма“) падумалі, што трэба яшчэ больш інтэнсіўна далучаць моладзь да музея, і вырашылі арганізаваць конкурс аўтарскай беларускамоўнай песні пры музеі», — паведаміла яна.

Асноўнымі мэтамі конкурсу, паводле слоў Мацевасян, з`яўляюцца «папулярызацыя гісторыка-культурнай спадчыны Беларусі, купалаўскай спадчыны, беларускай мовы, літаратуры і, вядома, прыцягненне наведвальнікаў, перш за ўсё турыстаў, да купалаўскіх мясцін».

• 0
• 0
• 0
• 0
• 0
• 0
• 0
• 0