Danejka: Nijakich sankcyj suprać «kašalkoŭ režymu»

«Uviadzieńnie i mahčymaje pašyreńnie jeŭrapiejskich sankcyj u dačynieńni da biełaruskaha biznesu robić rasiejskija kampanii praktyčna ekskluziŭnymi ŭdzielnikami pryvatyzacyi ŭ našaj krainie, — zajaviŭ u „Našaj dumcy“ ekanamist Pavieł Danejka. —

Takim čynam, adzinym realnym pretendentam na ŭdzieł u biełaruskaj pryvatyzacyi zastajecca rasijski biznes».

Takaja pazicyja ekanamista ŭžo vyklikała krytyku z asiarodku Chartyi-97.

Chartysty, jak i były staršynia Viarchoŭnaha Savieta Stanisłaŭ Šuškievič vystupajuć za ekanamičnuju izalacyju łukašenkaŭcaŭ. Ale navat i mienš radykalnyja koły miarkujuć, što «lepš pałavinistyja sankcyi, čym nijakich». Pravaabaroncy, naprykład, bajacca, što parušeńni pravoŭ čałavieka ŭ krainie mohuć nabyć katastrafičny charaktar, kali Zachad pierastanie na heta zvažać. Miž tym Danejka vystupaje suprać jakich by ni było abmiežavalnych zachadaŭ. Jahonaja arhumientacyja — ekanamičnaja. Biełarusi patrebna intehracyja ŭ jeŭrapiejskuju ekanomiku, miarkuje jon.

«Usie vialikija palityčnyja kampanii ŭ Biełarusi supravadžalisia žorstkaj krytykaj z boku Zachadu, — nahadvaje Danejka.

— Za krytykaj vynikali sproby ŭździejničać na biełaruskaje kiraŭnictva — jak praviła, havorka išła ab kropkavych sankcyjach u dačynieńni da pradstaŭnikoŭ dziaržaparatu. Ekanamičnyja miery ŭździejańnia ŭžyvalisia tolki ZŠA, dla jakich Biełaruś nie źjaŭlajecca ni susiedam, ni važnym partnioram. Jeŭrapiejskija ž krainy až da apošniaha času nie razhladali ŭsurjoz mahčymaść uviadzieńnia ekanamičnych sankcyj. Adnak u sakaviku hetaha hoda pad jeŭrapiejskija abmiežavalnyja miery trapili pradstaŭniki biełaruskaha biznesu», — piša Danejka.

Na dumku Danejki, sankcyjam paspryjaŭ prodaž «Hazpramu» biełaruskaha hazatranspartnaha pradpryjemstva «Biełtranshaz».

«Kali raniej krainy ES nie išli na abvastreńnie adnosin ź Minskam šmat u čym tamu, što aścierahalisia prablem z pastaŭkami hazu, to zaraz pytańnie bieśpierabojnych pastavak zaležyć ad Rasiei, a značyć, Jeŭropa ličycca ŭ pieršuju čarhu ź jaje intaresami». Dadamo, što Jeŭrasajuz z tryvohaj stavicca da kožnaha asłableńnia biełaruskaj samastojnaści.

«U suviazi z hetym uźnikaje pytańnie, chto voźmie ŭdzieł u biełaruskaj pryvatyzacyi. — praciahvaje Danejka. —

Prychod amierykanskich i jeŭrapiejskich kampanij u jakaści mahčymych kupcoŭ aktyvaŭ u našu krainu niemahčymy paśla padziejaŭ 19 śniežnia 2010 hoda. Jeŭrapiejskija kampanii zacikaŭleny ŭ mahčymaści nabyćcia ŭłasnaści ŭ Biełarusi. Adnak uviadzieńnie sankcyj ES u dačynieńni da biełaruskich pradpryjemstvaŭ robić małariealnym prychod u našu krainu jeŭrapiejskich inviestaraŭ — a značyć i ich sučasnych technałohij», — ukazvaje jon.

U kitajskija i arabskija inviestycyi Danejka nie vieryć.

«Kitajskija pradprymalniki inviestujuć žyvyja hrošy tolki ŭ pryrodnyja resursy. Z hetaha punktu hledžańnia ich moža zacikavić chiba što pradpryjemstva „Biełaruśkalij“, ad pryvatyzacyi jakoha ŭ ahladnaj budučyni lepš było b ustrymacca. Pa inšych prajektach my možam čakać ad Kitaja tolki źviazanych kredytaŭ, jakija majuć na ŭvazie ŭkładańnie srodkaŭ nie stolki ŭ biełaruskuju ekanomiku, kolki ŭ pastaŭlajucca siudy kitajskija tavary, abstalavańnie i pracoŭnuju siłu. Mahčymaści pryciahnieńnia inviestaraŭ z arabskich dziaržaŭ taksama źjaŭlajucca abmiežavanymi, bo jany, jak praviła, układvajuć kapitał u nieruchomaść i hatelny biznes i vielmi redka — u inšyja prajekty».

U takoj situacyi ŭ krainu budzie iści tolki rasijski kapitał, ličyć Danejka.

«Źjaŭleńnie ŭ takoj situacyi śpisu „kašalkoŭ režymu“, heta značyć pradpryjemstvaŭ, na jakija raspaŭsiudžvajecca albo moža raspaŭsiudzicca dziejańnie jeŭrapiejskich sankcyj, stała udaram pa pierśpiektyvam ŭdziełu biełaruskaha biznesu ŭ pryvatyzacyi.

Siarod „kašalkoŭ režymu“ apynulisia ŭładalniki takich paśpiachovych kampanij jak „Santa-Impeks“, „Amkador“ i „Savuškaŭ pradukt“. Hetyja i inšyja biznesy, jakija trapili ŭ čorny śpis, pracujuć na kankurentnych rynkach, stvaryli mocnyja brendy na postsavieckaj prastory i pracoŭnyja miescy ŭ Biełarusi. Jany nie prosta paśpiachova zajmajucca biznesam, ale i aktyŭna ŭdzielničajuć u pryvatyzacyi. Uniasieńnie ŭ čorny śpis pazbaŭlaje ich mahčymaściaŭ dostupu da tannych jeŭrapiejskich kredytaŭ i takim čynam pavialičvaje barjery na šlachu ŭdziełu ŭ pryvatyzacyi».

«Ja nie suprać rasiejskaha biznesu, ja — za kankurencyju, — zaścierahaje Danejka, jaki sam doŭha pracavaŭ u Maskvie i maje tam biznes-intaresy.

— Pryvatyzacyja, u jakoj udzielničajuć tolki bujnyja kampanii z Rasii, faktyčna aznačaje adsutnaść kankurencyi, vynikam čaho moža stać ceły šerah surjoznych prablem. Pa-pieršaje, mahčymaść biezalternatyŭnaha prodažu aŭtamatyčna źnižaje košt biełaruskich aktyvaŭ. Pa-druhoje, u adsutnaść kankurencyi niemahčyma abrać na konkursnaj asnovie najbolš efiektyŭnaha ŭłaśnika, jaki pryniasie nie tolki dobryja hrošy, ale i novyja technałohii vytvorčaści i kiravańnia. Tamu z ekanamičnaha punktu hledžańnia možna havaryć ab tym, što jeŭrapiejskija ekanamičnyja sankcyi supiarečać nacyjanalnym intaresam Biełarusi i jaje jeŭrapiejskaj budučyni».

Pavieł Danejka byŭ deputatam Viarchoŭnaha Savieta 13-ha sklikańnia ad apazicyi.

Jon naležyć da Abjadnanaj hramadzianskaj partyi. U kancy 1990-ch jon staŭ adnym z tvorcaŭ «Novaj chvali» palitykaŭ, jakija arhanizavali Maršy svabody. Inšy palityk z toj chvali, Mikałaj Statkievič, ciapier u turmie. Źmicier Bandarenka tolki-tolki z turmy vyjšaŭ. Praz turmy prajšoŭ i Anatol Labiedźka, kiraŭnik Abjadnanaj hramadzianskaj partyi. Vincuk Viačorka adyšoŭ z palityki piaredniaha płana. A sam Danejka palitykaj nie zajmajecca ad pačatku 2000-ch.

Paśla karotkaha pieryjadu emihracyi ŭ Rasiju i Ukrainu — pahražali represii za Marš Svabody — Danejka zasiarodziŭsia na ekanamičnych daśledavańniach i biznesie.

Jamu naležała zaduma stvareńnia Biełaruskaha instytuta stratehičnych daśledavańniaŭ.

Ciapier jon uznačalvaje Biełaruski ekanamičny daśledča-adukacyjny centr (BEROC). I kansultuje niekatoryja biełaruskija pradpryjemstvy.

• 0
• 0
• 0
• 0
• 0
• 0
• 0
• 0