Z seryi "Niepakoić Handuras"

MZS Biełarusi nie ŭtryvaŭ, kab nie prakamentavać padziei vakoł manumenta ŭ Talinie. Nu a BT uvohule zrabiła z hetaha prapahandovy hit — z pryciahnieńniem veteranaŭ i h.d. Maŭlaŭ, pahladziecie na hetuju cy-vi-li-za-va-nuju Eŭropu: vandały!

Pavialičyć

Siužet z tym pomnikam, skažam tak, nieadnaznačny. I dyplamaty nia ŭciahnutych u kanflikt krainaŭ dy pradstaŭniki mižnarodnych strukturaŭ starajucca vykazvacca dalikatna. Tak, sa słoŭ dobra viadomaha nam van der Lindena, "najaŭnaść u Talinie pomnika savieckamu vajaru-vyzvolniku jość davoli dvuchsensoŭnaj, pakolki pa-roznamu symbalizuje chvaravityja momanty historyi dačynieńniaŭ miž Rasiejaj i Estonijaj". A va ŭkrainskim dyplamatyčnym viedamstvie, naprykład, strymana zaznačyli, što heta jość ŭnutranaj spravaj Estonii.

Tolki ŭ Maskvie pyrskajuć ślinaj. Psychoz nahadvaje niadaŭniuju kampaniju suprać Hruzii. Rasiejskija senatary prapanujuć Pucinu razarvać dačynieńni z Talinam. Aktyvisty prakramloŭskaha ruchu "Rasieja maładaja" śmieła zakidvajuć estonskuju ambasadu fekalijami, bałazie milicyja nie zvažaje. A Žyrynoŭski pałochaje estoncaŭ rejdam pskoŭskich desantnikaŭ.

Nu, nakont desantnikaŭ jon paharačyŭsia, kaniešnie. Maleńkaja Estonija pad dacham NATA — jak ŭ boha za pazuchaj. Niezdarma tak rvałasia tudy.

Dyk voś, rasiejski ministar Łaŭroŭ zajaviŭ, što historyja z pomnikam adabjecca na stasunkach Rasiei i z Paŭnočnaatlantyčnym aljansam, i z Eŭraźviazam. U čym jany vinavatyja? A voś nia treba było prymać "u svajo ŭłońnie krainu, što hruba topča..." — nu i h.d. z patasam u hołasie.

Takaja lohika na ŭzroŭni dziciačaj svarki ŭ piasočnicy pakazvaje, što Maskvie aby nahoda, kab zakinuć Zachadu padvojnyja standarty. Niezdarma paviejała ducham "chałodnaj vajny" ad zaŭčorašniaha pasłańnia Pucina. Vybary na nosie. Kanfrantacyja z Zachadam, chaj sabie imitacyjnaja, raźviazvaje ruki dla ŭžyvańnia ŭ siabie doma asabliva "kiravanaj" demakratyi, kab harantavana zładzić aperacyju "Pierajemnik". Darečy, imavierny pierajemnik Siarhiej Ivanoŭ jašče zadoŭha da kulminacyi padziej vakoł Bronzavaha žaŭniera zaklikaŭ suajčyńnikaŭ nie kuplać estonskija tavary. Možna spračacca, nakolki ŭzvažanaj była ŭsia hetaja zaduma tamtejšych uładaŭ. Ale vajavać z prybałtyjskimi šprotami — sapraŭdy bliskučy ŭzrovień stratehičnaha myśleńnia dla pretendenta na kiravańnie jadravaj dziaržavaj!

Va ŭsiakim razie, tema nahniatałasia daŭno i metanakiravana. Kramloŭskaja elita siońnia stavić na renesans šavinistyčnaha duchu.

Ale našto aficyjnamu Miensku dźmuć u maskoŭskuju dudu? Chiba niekalki miesiacaŭ tamu Biełaruś nie adčuła ledzianoha dychańnia enerhietyčnaje blakady, praź jakuju niekali prajšli ŭ zmahańni za niezaležnaść tyja samyja prybałty? Niaŭžo tut spadziajucca, što za prapahandovyja vysiłki Kreml daść źnižku na haz? :)

Nia kažučy ŭžo pra toje, što znajšli parušynku ŭ čužym voku. Kab choć sotuju dolu taho impetu — suprać vandalizmu pad bokam, u Kurapatach! A ci daŭno tam moładź baraniła ad buldozeraŭ mahiły achviaraŭ stalinizmu? Ale ž Stalina čapać nielha...

Zatoje z padziejami ŭ Talinie naš MZS razabraŭsia borzda. Niby ŭłasnaje raśśledavańnie zładziŭ. Biezapelacyjna śćviardžajecca, što dziejańni estonskaj palicyi suprać manifestantaŭ byli "nieapraŭdana žorstkimi" (u nas, peŭna ž, apazycyju miesiać "miakka"!). I što, maŭlaŭ, mienavita heta pryviało da "eskałacyi hvałtu i vuličnych zabureńniaŭ" (to bok, pakryŭdziŭšysia na achoŭnikaŭ pravaparadku, možna rabavać kramy dy kuročyć lehkaviki?).

Całkam fabułu padziejaŭ vakoł toha pomnika nichto biełaruskamu abyvatalu nie raspaviadaje. Bo kali raspavieści, jak jość: što planavaŭsia nia znos, a pieranos na vajskovyja mohiłki, što Talin prapanoŭvaŭ Rasiei pryniać udzieł u pierazachavańni, a Maskva ŭvieś čas nahaniała hradus, i h.d. — dyk prapahandovaja strašyłka adrazu pablaknie.

A tak — chaj dumaje prosty elektarat, što palityčnaje dzikunstva kvitnieje dzie zaŭhodna, tolki nia ŭ nas. Tak savieckich ludziej niekali "niepakoiŭ Handuras".

• 0
• 0
• 0
• 0
• 0
• 0
• 0
• 0