Naviny
Zorka Venera
Na kinastudyi «Biełaruśfilm» pačalisia zdymki poŭnametražnaha mastackaha filma «Zorka Venera». Hałoŭny hieroj stužki — nie Maksim Bahdanovič, jak možna było b padumać pavodle nazvy, a sučasnaja postčarnobylskaja moładź. Scenar napisaŭ kinadramaturh Viktar Kaźko, jaki dniami adśviatkavaŭ svaje 60-ja ŭhodki. Režyser «Zorki Venery» Marharyta Kasymava spadziajecca, što film budzie zavieršany ŭžo ŭ vieraśni i patrapić na Mižnarodny kinafestyval u Taronta. Paet Hienadź Buraŭkin paabiacaŭ napisać admysłova dla hetaj karciny niekalki vieršaŭ.
Pałac Paskieviča: restaŭracyja tałakoju
Homielski abłvykankam źviarnuŭsia da žycharoŭ horadu z zaklikam dapamahčy restaŭracyi pałacu hrafa Paskieviča. Biudžetnych srodkaŭ na adbudovu pomnika katastrafična nie staje. Haradzkija ŭłady planujuć, što achviaravańni pradpryjemstvaŭ i pryvatnych asobaŭ składuć ažno 70% ad koštu restaŭracyi — 835 miljonaŭ rubloŭ. Harvykankam abiacaje, što pałac Paskieviča budzie adnoŭleny da kanca hodu, ale sami restaŭratary ŭ hetym mocna sumniajucca.
Siaredniaviečnaja ekzotyka
Rycarski orden «Serca Cmoka», jaki naličvaje ŭ svaich šerahach kala sta vajaroŭ, naładziŭ u mienskim Pałacy dziaciej i moładzi vystavu staražytnaj zbroi, stvoranaj siabrami ordenu pavodle aŭtentyčnych uzoraŭ. Tut možna patrymać u rukach raznastajnyja miačy, arbalety, kalčuhi, štandary dy sfatahrafavacca ŭ vobrazie praŭdzivaha rycara.
Počaści Basałyhu
U Muzei Janki Kupały adčyniłasia vystava kalarovych litahrafijaŭ Uładzimiera Basałyhi, jaki tolki što atrymaŭ hanarovy dyplom Mižnarodnaha Kupałaŭskaha fondu za ilustracyi da knižok 11 paetaŭ-laŭreataŭ Litpremii imia Janki Kupały. Vystava składajecca ź dźviuch seryjaŭ: pieršaja pryśviečana litaram dla nacyjanalnaje azbuki, druhaja — pomnikam dojlidztva Biełarusi (stvaryć jaje mastaka natchniŭ jašče Karatkievič). Ciapier Basałyha planuje praciahnuć hetuju seryju vyjavami ŭžo niaisnych, zrujnavanych śviatyniaŭ Biełarusi.
Svavola ŭ Homieli
Novy Front Mastactva i Zadzinočańnie Biełaruskich Studentaŭ naładzili ŭ homielskim Domie kultury hłuchich festyval perfomansaŭ «Dzień mumifikatara». Udzieł brali mienskija i łatvijskija litaratary, rok-hurty «Navyvarat» (Bieraście), «Ban-Žvirba» (Homiel), «Baradaty Hrynvič» i «Sonca-Kvietki» (Miensk), a taksama Teatar Psychičnaje Nieŭraŭnavažanaści. Lepšym mumifikataram artysty zavočna pryznali byłoha lektara Tavarystva «Viedy» Alaksandra Łukašenku, jaki zdoleŭ zakanservavać amal cełuju krainu.
Juraś Barysievič
Druhi vajskoviec, jaki zahinuŭ pry avaryi MAZa pad Asipovičami — 21‑hadovy tenisist ź Viciebska1
Kamientary