Z usioj krainy

 Z usioj krainy

Dva novyja kryžy

Rejdavaja hrupa arhanizacyi "Kraj" i Słonimski adździeł "Kraju" ŭstalavali kryž u honar udzielnika paŭstańnia 1830—31 h. Michała Vałoviča i jahonych paplečnikaŭ pobač ź vioskaj Parečča, što la Słonimu. Udzielniki akcyi prajšli šeściem z kryžom praź vioski Vasilevičy i Parečča da zrujnavanaj carkvy. La carkvy pastavili kryž u honar paŭstancaŭ. Unijacki śviatar aśviaciŭ jaho dy adsłužyŭ malebien za biełaruski narod. A ŭ Šarašovie, što na Pružanščynie, pastavili kryž na mahile Michała Babroŭskaha — navukoŭca, śviatara, vykładčyka Vilenskaha ŭniversytetu. Tut taksama adsłužyŭ malebien unijacki śviatar.

U AAN napierad baŭharaŭ

Biełaruś choča ŭvajści ŭ skład stałych čalcoŭ Rady biaśpieki AAN. Baŭharyja - druhaja pretendentka na hetaje miesca. Hałoŭnaja ŭmova pieramohi - uniosak krainy ŭ zachavańnie suśvietnaha miru dy biaśpieki. Baŭharyja była ŭ Radzie biaśpieki dvojčy, a my tolki adzin raz. Apošni raz my supierničali za miesca ŭ Radzie z čechami i prajhrali z hodnym likam.

Łukašenka dziakuje FSB

Padčas hutarki ź Siarhiejem Lebiedzievym, dyrektaram Federalnaje słužby zamiežnaje vyviedki Rasiei, Łukašenka pryludna padziakavaŭ jamu za «analityčnyja i aperatyŭnyja materyjały, jakija rehularna pastupajuć z Maskvy» i «dazvalajuć spakojna pieražyć samyja surjoznyja padziei». Pavodle rasiejskich zakonaŭ Lebiedzieŭ maje prava dakładać adno Pucinu. Lebiedzieŭ sumieŭsia. U Rasiei hetaja zajava Łukašenki vyklikała skandał.

Strajki nastaŭnikaŭ dy pradprymalnikaŭ

Federacyja Prafsajuzaŭ kaža, što vialikaja akcyja pratestu suprać padzieńnia ŭzroŭniu žyćcia, chutčej za ŭsio, projdzie ŭ studzieni 2001 hodu. Nastaŭniki ŭžo źbirajuć podpisy pad pratestam suprać źbiadnieńnia dy kažuć pra mahčymaść spynieńnia pracy. A pradprymalniki vyrašyli pravieści 23 listapada adnadzionny papieradžalny strajk.

Pikiet kala rasiejskaj ambasady

8 listapada svajaki čatyroch biełarusaŭ, jakija pajechali budavać Vilujskuju HES-3 u Jakucii, ale ŭ vyniku padmanu zastalisia biaz hrošaj i biez žytła, pikietavali rasiejskuju ambasadu ŭ Miensku, bo ni rasiejskija, ni biełaruskija ŭłady dapamahać im nie žadali. Adnu z žančyn pryniali ŭ ambasadzie dy paabiacali dapamahčy. Paśla milicyjanty advieźli ŭsich udzielnic pikietu (heta byli spres žančyny) uva ŭpraŭleńnie ŭnutranych spraŭ Centralnaha rajonu, dzie na troch ź ich (chto mieŭ pry sabie plakaty) skłali pratakoły za parušeńnie hramadzkaha paradku - niesankcyjanavanaje pikietavańnie. Sud Centralnaha rajonu vynies im papiaredžańni.

Rasieja admiažoŭvajecca

8 listapada rasiejski prezydent Uładzimier Pucin skazaŭ na naradzie ŭ Rastovie-na-Donie, što "zaraz praktyčna niama paŭnacennaj miažy z krainami SND, ale takaja miaža budzie". Pra niejkuju asablivuju mytnuju dy mihracyjnuju palityku ŭ adnosinach da Biełarusi Pucin nie kazaŭ ničoha.

Zbroja dla Armienii

Biełaruś i Armienija pastanavili padpisać pahadnieńnie ab uzajemnych pastaŭkach uzbrajeńnia i vajskovaj techniki. Naš Saŭmin užo ŭchvaliŭ jahony prajekt. U pieršaj pałovie 2001 hodu hienerał-pałkoŭnik Alaksandar Čumakoŭ palacić damaŭlacca ŭ Jerevan.

Abraz skrali i znajšli

7 listapada sa Śviata-Mikałajeŭskaj carkvy ŭ Bieraści skrali abraz z vyjavaj Mikoły Cudatvorca. A 16 hadzinie pabačyli, što jon źnik. Pilnyja babuli ŭ carkvie ŭzhadali padazronaha nieznajomca, dapamahli skłaści jahony fatarobat. Praź dźvie hadziny złodzieja, jaki chavaŭ ikonu pad pachaj, schapili ŭ mieście. Usiaho z pačatku hodu na bieraściejskaj mytni zatrymali 559 abrazoŭ, jakija vieźli za miažu. Kantrabandu viazuć amal vyklučna ciahnikom № 9 Maskva - Varšava.

Hrošy dla pažarnych

Homielskija ŭłady vydzielili pažarnym 350 miljonaŭ rubloŭ, kab tyja nabyli sabie novuju techniku: aŭtamabil chutkaha reahavańnia, avaryjna-ratavalny aŭtamabil i vyšynnuju leśvicu daŭžynioj 50 metraŭ. Na Homielščynie 114 vysotnych budynkaŭ, tamu leśvica budzie vielmi darečy. Hetkuju ž maje ŭ tym rehijonie tolki Biełaruski metalurhičny zavod.

Najlepšy futbalist

27-hadovaha paŭabaroncu nacyjanalnaj zbornaj Biełarusi i kijeŭskaha "Dynama" Alaksandra Chackieviča pryznali lepšym futbalistam Biełarusi 2000 h. pavodle apytańnia, jakoje naładziła hazeta “Presboł”. Druhoje miesca maje jahony adnaklubnik Valancin Bialkievič, treciaje — napadajučy mazyrskaj "Słavii", lepšy bambardzir apošniaha čempijanatu krainy Raman Vasiluk.

Volnaja vučoba ŭ Mahilovie

6 listapada ŭ Mahilovie prezentavali prajekt "Volnaja klasa". Jaho ładzić miascovaja filija Maładoha Frontu sumiesna z "Tavarystvam filamataŭ". Viadomyja navukoŭcy i vykładčyki ź Miensku i Mahilova buduć vykładać vučniam starejšych klasaŭ dy studentam historyju i kulturu Biełarusi, ekanomiku, palitalohiju, prava, žurnalistyku, ekalohiju dy anhielskuju movu.

Padrychtavaŭ Aleś Kudrycki
 pavodle paviedamleńniaŭ karespandentaŭ “NN” i ahienctva BiełaPAN

Pieramieny pačali z teatru

Mahiloŭskija maładafrontaŭcy adznačyli ŭdzieł u akcyi “Pieramienaŭ” pracaj na budoŭli dramatyčnaha teatru. Epapeja z rekanstrukcyjaj bolš čym stohadovaha budynka dahetul nia skončyłasia. Tydzień tamu stała viadoma, što zaplanavanaje adkryćcio znoŭ pieranosicca na nastupny hod. I heta pry tym, što budujuć pa najtańniejšym prajekcie. U vyniku teatralnyja kalidory źbirajucca ablicoŭvać biełaj plitkaj, bolš prydatnaj dla prybiralni.

Dziesiać maładafrontaŭcaŭ pryjšli papracavać u jakaści budaŭnikoŭ. Niekatoryja z rabočych pryniali maładafrontaŭcaŭ za cimuraŭcaŭ. Ale nikoha nie prahnali, kožnamu znajšłosia što rabić. Chłopcy buduć tutaka pracavać štosuboty da samaha adkryćcia adnoŭlenaha chramu Melpameny.

Kaštany zamiest tapolaŭ

Mahiloŭskija ekolahi raspačali akcyju “Kaštan”. Vučni troch miascovych škoł razam z vykładčykami na zaklik ekolahaŭ sabrali amal paŭtony kaštanaŭ. Zvyčajna kaštany hnijuć u łužynach ci zharajuć u kučach śmiećcia. Na hety raz ich čakaŭ inšy los. Sabranyja 3 miachi, 4 pakiety i 2 skryni z pładami stanuć asnovaj dla zakładki kaštanavaha hadavalnika. Usie viedajuć, jak harady ŭ nas zasadžvalisia tapolami, što dadało pracy dvornikam, dyj astmatykam i alerhikam nie pryniesła ničoha dobraha. Miascovy zielanhas pryniaŭ sabrany ŭradžaj i pastupova budzie zamianiać tapoli kaštanami.

Symon Hłazštejn, Mahiloŭ

Zatrymańni

Pazaŭčora ŭ Miensku milicyjanty schapili pensijanerku Alenu Jarmošanku. 62-hadovaja žančyna kleiła nalepki z zaklikam prychodzić na akcyju “Pieramienaŭ”.

Učora ŭ Horadni zatrymali kala 20 udzielnikaŭ pikietu “Za pieramieny”. U 15.15 zatrymali Śviatłanu Niech dy Andreja Mialešku — zavadataraŭ. Praz kolki chvilinaŭ padjechaŭ aŭtobus z amapaŭcami, jakija pačali chapać usich, chto mieŭ plakaty dy ściahi.

Siarod zatrymanych učora ŭ Miensku za ŭdzieł u akcyi “Pieramienaŭ” Androsaŭ Aleś, Astapčuk Siarhiej, Atroščanka Siarhiej, Atroščankaŭ Cimoch, Bałuk Antoś, Buracki, Vituška, Vianiarski Maksim, Hietman Pavał, Dziatovič Vital, Žarko Alaksiej, Zialotkin, Kalina Alaksandar, Kunina Mara, Makiejeŭ Aŭhien, Mikałajčyk Alaksiej, Miatlicki Pavał, Savič Pavał, Sieviaryniec Pavał, Silicki Anton, Starykovič Uładzimier, Stralcoŭ Aleś, Filipovič Aleś, Chomič, Čarniaŭski Źmicier, Šaŭcuk Andrej, Šmialoŭ Siaržuk, Jaromienka Dzianis.

Siarod zatrymanych – Jan Citovič, artykuł jakoha my jakraz drukujem na staroncy 6. Imiony inšych zatrymanych pastarajemsia paviedamić u nastupnym numary. Na momant zdačy numaru jany nam byli jašče nieviadomyja.

U subotu ŭ Barysavie za ŭdzieł u niesankcyjanavanym pikiecie byli zatrymanyja niepaŭnaletnija Michaś Kuźniacoŭ, Alena i Maryna Jasiuk.