Choć u try ŭniversytety
pastupleńnie ŭ VNU
Ustupnyja ispyty raspačali z 8 lipienia šeść vyšejšych navučalnych ustanovaŭ Biełarusi: Akademija kiravańnia pry prezydentu, Akademija mastactvaŭ, Akademija muzyki, Biełaruski dziaržaŭny ŭniversytet, Vajskovaja akademija i Vyšejšaja pažarna-techničnaja vučelnia Ministerstva pa nadzvyčajnych sytuacyjach.
Ispyty va ŭsie astatnija VNU projduć paźniej i ŭ dva etapy: ad 16 da 23 lipienia i ad 24 da 31 žniŭnia. Šeść mienskich VNU atrymali pryvilei ŭ paraŭnańni ź inšymi, bo ciaham apošnich hadoŭ karystajucca najbolšym popytam u abituryjentaŭ — zajavaŭ tudy padajuć najbolš. Heta źviazana jak z staličnym statusam VNU, tak i ź ichnaj unikalnaściu: nivodnaja nia maje analahaŭ i ŭsie važnyja dla krainy. Raniej padobnyja pryvilei byli tolki ŭ BDU.
Hetkija źmieny dazvolać abituryjentam pasprabavać svaje siły ŭ bolšaj kolkaści VNU. Kali nia ŭdasca prajści adbor u adnoj, dyk jašče možna paśpieć padać dakumenty ŭ inšuju — praŭda, mienš prestyžnuju. A kali ŭličyć, što dakumenty možna padavać adrazu ŭ try VNU (u adnu — aryhinał, u druhija — nataryjalna zavieranyja kopii), dyk šancy na pastupleńnie pavialičvajucca ŭtraja. Pry hetym administracyja VNU nia maje prava patrabavać “tolki aryhinał”.
Mahčymaść pasprabavać siabie ŭ niekalkich navučalnych ustanovach, na dumku ministra adukacyi Piatra Bryhadzina, dapamoža ŭźniać konkurs u vyšejšuju škołu. Letaś konkurs składaŭ 3,4 čałavieki na adno studenckaje miesca (ahułam 128 tysiačaŭ abituryjentaŭ), a sioleta Ministerstva adukacyi spadziajecca na konkurs u 4 čałavieki na miesca (130 tysiačaŭ abituryjentaŭ).
Novaŭviadzieńni sioletniaj pryjomnaj kampanii vyklikanyja nia tolki pamknieńniem Ministerstva ŭźniać prestyž vyšejšaj škoły. Zhodna z novaj redakcyjaj “Zakonu ab adukacyi” (ad 19 krasavika 2002 h.) upieršyniu ŭ krainie stvoranyja adzinyja praviły pryjomu ŭ dziaržaŭnyja i pryvatnyja navučalnyja ŭstanovy. U novym zakonie niama nijakaha adroźnieńnia miž navučalnymi ŭstanovami roznaj formy ŭłasnaści ni ŭ pryjomie, ni ŭ funkcyjanavańni.
Arkadź Šanski
Kamientary