Ben Ładenu varta pačytać Kur'an

Ben Ładenu varta pačytać Kur'an

Karani isłamskaha teraryzmu — u małaadukavanaści. Terakty 11 vieraśnia vyklikali šyrokuju reakcyju — na musulmanskim Uschodzie radavalisia, pa Eŭropie j ZŠA prakaciłasia chvala antyisłamskaje ksenafobii. Ale abiedźvie reakcyi — z-za ciemrašalstva.

Siońniašniuju antyterarystyčnuju vajnu sprabavali pradstavić jak sutyknieńnie cyvilizacyjaŭ, procistajańnie zachodniaha j isłamskaha śvietaŭ — takuju sabie vajnu pamiž šaryjatam i MCworld'am. Ale Zachad i Ŭschod majuć supolnyja kaštoŭnaści. Adno što na Ŭschodzie mnohich ludziej u abdymki terarystaŭ šturchaje elementarnaja adsutnaść aśviety. Uschodu treba jašče vučycca i vučycca ŭ samym litaralnym sensie. Bajučysia abvinavačvańniaŭ u paternaliźmie ci navat rasiźmie, Eŭropa maŭčyć pra hetuju prablemu. Balšynia ludziej u arabskich krainach ci Iranie žyvie ŭ halečy. Hałoŭnaja prablema dla ich — znajści kavałak chleba, asnoŭnaja infarmacyja — viaskovyja čutki, adzinaja knižka — Kur'an u vykładzie miascovaha muły. Navat u superzamožnaj Saudaŭskaj Arabii 40% niepiśmiennych. Jakoj talerantnaści možna tut čakać?

Nie isłam vinavaty ŭ siońniašniaj vajnie. Radykały karystajucca ciemrašalstvam, pieratvarajučy narodnuju vieru ŭ relihijny fašyzm. Jahony sens ścisła vykłaŭ ben Ładen u 1998 h.: “Kožny darosły musulmanin nienavidzić amerykancaŭ, žydoŭ i chryścijanaŭ. Heta naša viera i relihija”.

Dla ŭtajmavańnia musulmanskich radykałaŭ dosyć było b… relihijnaj adukacyi. Prosta prymusić fanatykaŭ vyvučać Kur'an i asnovy viery. Bo viedy na Ŭschodzie pakul što zastajucca pryvilejem niamnohich.

Toje, što zvyčajna nazyvajuć musulmanskim fundamentalizmam, źjaŭlajecca niečym całkam procilehłym — takim sabie musulmanskim trackizmam. Vahabity — heta ludzi, što admaŭlajuć tradycyju i patrabujuć samaj rašučaj revizii viery, ale nie dziela viartańnia da fundamentu, a dla padładžvańnia jaje pad svajo razumieńnie isłamu.

Miž tym sapraŭdny isłam — takaja ž relihija dabra i ciarpimaści, jak i praŭdzivaje chryścijanstva. Na dumku musulmanaŭ, jon — “treciaja redakcyja” adviečnaje monateistyčnaje relihii. Pieršaj “redakcyjaj” było judejstva, adnak, ličać musulmanie, jano patanuła ŭ pamyłkach, dla vypraŭleńnia jakich pryjšoŭ Isus. Ale i chryścijanstva skaciłasia da šmatbožža. Tady Ałah pasłaŭ Muchamada. U Kur'anie napisana, što isłam — relihija nie arabskaja, a boskaja. Mnohija tysiačy pasłańnikaŭ Boha prychodzili da ŭsich narodaŭ, u tym liku i biełaruskaha. Bolšaść zhinuła nieviadomymi, tolki Muchamad zdoleŭ pašyryć svajo pasłańnie pa ŭsim śviecie — voś jak traktujuć svaju vieru musulmanie.

Biada musulmanskaha śvietu, što jon svoječasova nie paznajomiŭ ben Ładena sa zdabytkami JAHONAJ ža kultury. Zrešty, i ŭ Biełarusi nianaviść da inšych — ci to “amerykosaŭ”, ci to “čornych”, ci to “śviadomych”, ci to “žydoŭ” — žyvie siarod samych nieadukavanych słajoŭ nasielnictva.

Siarhiej Radštejn, Tehieran