PRAVASŁAŬNAJA PRAPANOVA

Kiraŭnictva Biełaruskaj pravasłaŭnaj carkvy padrychtavała prajekt pahadnieńnia pamiž BPC i dziaržavaj i pieradało jaho va ŭrad. Razhledziać jaho tam da siaredziny lutaha. Pahadnieńnie praduhledžvaje značnaje pašyreńnie paŭnamoctvaŭ Ekzarchatu, dušpastyrskuju kampetencyju jakoha miarkujecca pašyryć na ŭsio nasielnictva Biełarusi — u tym liku niepravasłaŭnaje.

Vojska. Pavodle prajektu, studenty duchoŭnych navučalnych ustanovaŭ buduć mieć prava na adterminoŭku ad vajskovaj słužby. Zhadvajecca taksama i mahčymaść «volnaha ŭdziełu vajskoŭcaŭ u carkoŭnaj słužbie ŭ niadzieli i carkoŭnyja śviaty, kali heta nie pieraškadžaje vykanańniu imi svaich słužbovych abaviazkaŭ».

Medycyna. Jak zaznačajecca ŭ prajekcie pahadnieńnia, pravasłaŭnaje vučeńnie pra asobu, siamju, šlub i hramadztva «pavinna lažać u asnovie maralnaha zdaroŭja narodu i palapšeńnia demahrafičnaj sytuacyi». Dziela «palapšeńnia demahrafičnaj sytuacyi» ŭ pahadnieńnie ŭstaŭleny punkt pra niedapuščalnaść masavaha ci nieapraŭdanaha prymianieńnia abortaŭ, a taksama pryznańnie prava medrabotnika «na admovu ad praviadzieńnia abortu pa relihijnych ci asabistych maralnych pierakanańniach».

Relihijnyja dačynieńni. Carkoŭnaja terminalohija ŭ nazvach ustanovaŭ i arhanizacyjaŭ, jak zapisana ŭ pahadnieńni, musić užyvacca tolki z dazvołu carkvy. Dziaržava, zaznačaje prajekt, «pryznaje status jurydyčnaj asoby tolki za pryznanymi Carkvoj kananičnymi strukturami». Vyhladaje na toje, što ŭsie relihii dy kanfesii, jakich nie pryznaje BPC (aŭtakiefalnyja pravasłaŭnyja, pratestanckija, judejskija, hreka-katalickija, musulmanskija supołki), nia zdolejuć atrymać status jurydyčnaj asoby ŭ Biełarusi.

Hrošy. Pavodle pahadnieńnia, dziaržava musić pryznać «fakt materyjalnaje i maralnaje škody, naniesienaje Carkvie ŭ hady panavańnia dziaržaŭnaha ateizmu ŭ XX st., i, adpaviedna, pieradaje Carkvie jejnuju majomaść, kanfiskavanyja ŭ jaje pradmiety kultu, bohasłužebnuju ci bahasłoŭskuju litaraturu albo častkova kampensuje naniesienuju materyjalnuju škodu». Ad BPC nia buduć patrabavacca licenzii na investycyjnuju dziejnaść u časie pabudovy j rekanstrukcyi carkoŭnych budynkaŭ (nia treba budzie pradastaŭlać i dakumenty pra krynicy investycyjaŭ). Prajekt praduhledžvaje j faktyčnuju manapoliju BPC na humanitarnuju dapamohu: «Dziaržava nadaje jurydyčnym asobam Carkvy prava na atrymańnie humanitarnaj dapamohi ŭ sproščanym paradku».

Prajekt pakul nie ahałošvajecca, i nieviadoma, ci budzie nadrukavany ŭ dziaržaŭnaj presie. Chutčej za ŭsio, jaho, jak i «Zakon ab svabodzie sumleńnia i relihijnych arhanizacyjach» pastarajucca pravieści ciškom i jak maha chutčej. Načalnik adździełu ŭ spravach relihijaŭ Kamitetu ŭ spravach relihijaŭ i nacyjanalnaściaŭ pry Saviecie ministraŭ Alaksandar Kalinaŭ zajaviŭ 29 studzienia ŭ časie «kruhłaha stału» ŭ Domie presy: dziaržava, zhodna z zakanadaŭstvam, maje prava na takija pahadnieńni. Kali pradstaŭniki inšych relihijaŭ ci kanfesijaŭ zachočuć padpisać takoje ž pahadnieńnie ź dziaržavaj, jany mohuć źviarnucca z takoj samaj prapanovaj. Praŭda, pra vierahodnaść padpisańnia takoha pahadnieńnia z kimści «niepravasłaŭnym» A.Kalinaŭ nie skazaŭ ni słova.

Malcaŭ, Bryhadzin suprać. Pastajałka — za. Dziaržaŭnyja struktury pačali ŭžo vykazvać svajo staŭleńnie da novaha prajektu. Za śviecki charaktar navučańnia vykazaŭsia ministar adukacyi Piatro Bryhadzin padčas niadaŭniaj pres-kanferencyi. Pavodle infarmacyi «NN», nehatyŭna pastavilisia da pahadnieńnia z BPC ŭ Ministerstvie abarony: nam, maŭlaŭ, kapelany nie patrebnyja, biaź ich spravimsia. Zatoje haračuju padtrymku vykazała Ministerstva achovy zdaroŭja, jakim kiruje Ludmiła Pastajałka. Ahienctva «Interfaks» 29 studzienia raspaŭsiudziła kamentar «vysokapastaŭlenaha supracoŭnika» Ministerstva z uchvałaj pahadnieńnia.

Arkadź Šanski

• 0
• 0
• 0
• 0
• 0
• 0
• 0
• 0