Pryznačeńnie Jurja Sivakova ministram sportu i turyzmu znoŭ abudziła intares da jaho. Čujucca čarhovyja abvinavačańni ŭ jahony adras. Hienerału zakidajuć stvareńnie ŭ Biełarusi «eskadronaŭ śmierci». Jon heta admaŭlaje, kaža tolki, što nasamreč «usio lažyć na pavierchni».
Asoba byłoha kamandujučaha ŭnutranymi vojskami j ministra ŭnutranych spravaŭ Sivakova paśla šerahu publikacyj u niezaležnaj presie asacyjujecca sa źniknieńniem biełaruskich apazycyjnych palitykaŭ u 1999 h. Pavodle infarmacyi, nadrukavanaj u «Biełorusskoj diełovoj hazietie», pry kancy 2000-ha staršynia KDB i hienprakuror prasili ŭ prezydenta krainy sankcyju na aryšt nia tolki Šejmana, ale j Sivakova.
Paźniej hienerał prachodziŭ jak śviedka pa spravie źniknieńniaŭ, dy, pavodle słovaŭ advakata Hary Pahaniajły, admaŭlaŭ svajo dačynieńnie da jaje albo spasyłaŭsia na słabuju pamiać. Sam Ju.Sivakoŭ u interviju «Narodnaj voli» kaža, što hetyja abvinavačańni nia buduć jamu pieraškadžać pracavać na novaj pasadzie, a hazetnyja publikacyi jon nia choča kamentavać, bo «tut usio lažyć na pavierchni». «Razumny čałaviek i tak usio zrazumieje», — padvodzić rysu pad pytańniem Sivakoŭ.
I sapraŭdy, sytuacyja zrazumiełaja. Jość asoba, jakaja šmat viedaje i pra jakuju viedajuć niamała. Čałaviek, los jakoha zaležyć ad kapryzaŭ ułady (adnak i ŭłada baicca, što jon moža zahavaryć) i jaki joj klaniecca ŭ svajoj addanaści. Nia dziva, što jon pahadžajecca na luby ŭčastak pracy, jaki tolki jamu ni prapanujuć. Ale nia moža schavać i pakuty, jakuju mnohija zaŭvažyli na tvary hienerała, kali toj «prymaŭ» novuju pasadu.
Jašče ŭłada sprabuje vykarystać imidž Sivakova dla vykaranieńnia valnadumstva ŭ šerahach biełaruskaha spartovaha čynavienstva. U śniežni 2002 h., padčas skandalnaj spravazdačna-vybarnaj kanferencyi Biełaruskaj federacyi futbołu, na jakoj prysutničaŭ i Łukašenka, vyśvietliłasia, što nia ŭsie čynoŭniki zhodnyja biezahladna vykonvać zahady kiraŭnictva krainy. Prezydent BFF Ryhor Fiodaraŭ nie pabajaŭsia supraciŭlacca svajoj adstaŭcy na karyść kiraŭnika hroznaj struktury — Rady biaśpieki. A nieŭzabavie Fiodaraŭ admoviŭsia balatavacca na pasadu prezydenta BFF na nastupny termin. Ciapier voś pazbyŭsia pasady ministra sportu i turyzmu Jaŭhien Vorsin. A nad biełaruskim sportam źjaviŭsia cień hienerała Sivakova.
Adnak nia tolki baraćboj z valnadumstvam budzie zajmacca Ju.Sivakoŭ na pasadzie ministra sportu i turyzmu. Siońnia ŭ sporcie i kala sportu kruciacca vialikija hrošy, heta prybytkovy biznes. Nia dziŭna, što biełaruskija siłaviki ŭžo daŭno ačolili asnoŭnyja federacyi pa hulniavych vidach sportu (zhadajma «bijatlanista» Jeryna). Zadača Sivakova — kaardynavać ich dziejnaść i papaŭniać, pry patrebie, dziaržaŭnuju skarbonku.
Siarhiej Jorš
Kamientary