Чарговы нумар студэнцкага часопісу.
Выданьне запачаткавалася некалькі гадоў таму ў якасьці супольнага праекту беларускіх інтэлектуалаў—выкладчыкаў Беларускага Калегіюму і студэнтаў аддзяленьня філязофіі і літаратуры, якім традыцыйна апякуецца Валянцін Акудовіч. Шосты нумар часопіса навідавок адрозьніваецца ад папярэдніх — новая генэрацыя выпускнікоў БК адмовілася ад канцэптуалізаці нумару, задаволіўшыся зьмяшчэньнем на вокладцы партрэту свайго гуру ў выкананьні мастачкі Валянціны Лойкі ды насыціўшы часопіс уласнымі ды перакладнымі якаснымі, рызыкоўнымі, а часам і правакацыйнымі інтэлектуальна-мастацкімі пошукамі.
Зьмесьціву нумару можа пазайздросьціць любая з апошніх перакладніцкіх кніжных "салянак" — філязофія ад Пётры Рудкоўскага і Юрыя Андруховіча, проза Вольгі Такарчук, Тараса Прахаські, Ані Самон, Трумэна Капотэ, а таксама новыя творы Зьмітра Смалякова, Глеба Лабадзенкі, Тацяны Беланогай, Сержука Мядзьведзева. Таксама прысутнічаюць на старонках часопіса "ПАМІЖ" імёны і творы аўтараў, дагэтуль невядомых сталым прыхільнікам выданьня і Беларускага Калегіюму.
Каментары