13 верасня. У межах праекта Агенцтва ЗША па міжнародным развіцці (USAID) «Мясцовае прадпрымальніцтва і эканамічнае развіццё» ў вёсцы Белая Камянецкага раёна Брэсцкай вобласці 13 верасня адкрыўся музей-кузня. Ён будзе працаваць у аграсядзібе «Польскi маёнтак».
Паводле слоў уладальніцы сядзібы Таццяны Ісаевай, кавалём будзе яе муж Сяргей Піскун, які вырабляе прадметы быту і сувеніры. Асновай экспазіцыі музея будуць старадаўнія рэчы, якія раней выкарыстоўвалі жыхары вёскі Белая і іншых вёсак Камянецкага раёна ў паўсядзённым побыце.
Ісаева выказала надзею, што музей-кузня стане часткай турыстычнай зоны «Белавежскі тракт» і сюды актыўна будуць прыязджаць турысты.
Як паведаміў рэгіянальны каардынатар праекта USAID Вадзім Пракапчук, «Белавежскі тракт» уключае ў сябе музей прыроды Нацыянальнага парку «Белавежская пушча» ў вёсцы Камянюкі, музей народнага майстра Мікалая Тарасюка ў вёсцы Стойлы, музей у Камянецкай вежы, а таксама некалькі аграсядзіб.
Усяго, паводле слоў Пракапчука, у рамках праекта створана 17 турыстычных зон (дэстынацый) у Брэсцкай і Гомельскай абласцях. Турысцкая дэстынацыя — цэнтр (тэрыторыя) з разнастайнымі зручнасцямі, сродкамі абслугоўвання і паслугамі для забеспячэння разнастайных патрэб турыстаў. Бюджэт праекта, які рэалізуецца ПРААН у Беларусі, складае 1 млн. 965 тыс. долараў ЗША на 2012—2015 гады.
Пракапчук зазначыў, што экатурызм з'яўляецца адным з сегментаў турыстычнага рынку Беларусі, якія найбольш дынамічна развіваюцца. Паводле звестак на 1 студзеня 2014 года ў краіне дзейнічала 1.881 аграсядзіба, а ў 2006 годзе іх было толькі 34. Аднак, працягнуў спецыяліст, «нягледзячы на ўражальны рост, паслугі ў сферы экатурызму ў Беларусі на гэты момант не зусім адпавядаюць міжнародным стандартам». Каб у поўнай меры выкарыстаць магчымасці экатурызму ў якасці рухальнай сілы сацыяльна-эканамічнага развіцця сельскіх тэрыторый, «неабходны намаганні па павышэнні патэнцыялу мясцовых суб'ектаў экатурызму».
Цяпер чытаюць
Маладую беларуску пратрымалі ў расійскім СІЗА амаль 4 гады і апраўдалі. А кампенсацыю далі такую, нібыта ў твар плюнулі5
Каментары