Беларусь у бліжэйшы час можа перайсці да сектаральных ільгот. Аб гэтым заявіў першы віцэ-прэм'ер Васіль Мацюшэўскі ў эфіры праграмы «Галоўны эфір» на тэлеканале «Беларусь 1».
Паводле яго слоў, гэта пытанне ўжо абмяркоўвалася ва ўрадзе. «І ёсць агульнае меркаванне, што колькасць ільгот павінна змяншацца. Мы павінны паступова пераходзіць да сектаральных ільгот - калі мы стымулюем не канкрэтны суб'ект гаспадарання, а нейкія стратэгічна важныя галіны эканомікі для рэспублікі», - сказаў Васіль Мацюшэўскі.
Ён адзначыў, што ў стратэгіі развіцця краіны на 2016-2020 гады гэтыя прыярытэты ўжо будуць адназначна вызначаны.
Першы віцэ-прэм'ер адказаў таксама на пытанне аб планах урада па дэдаларызацыі беларускай эканомікі. Ён згадзіўся, што беларусам пара перастаць усё мераць у доларах. «Але для комплекснай рэалізацыі гэтай меры трэба прайсці даволі сур'ёзны шлях, павысіць узровень даверу насельніцтва да нацыянальнай валюты», — адзначыў Васіль Мацюшэўскі.
Каменціруючы змяненні ў падаткаабкладанні, ён запэўніў, што такое пытанне, як чарговае павышэнне стаўкі падаходнага падатку, пакуль у Беларусі не стаіць. «Мы пакуль можам вырашаць сацыяльныя праблемы без павышэння падаходнага падатку», — сказаў Васіль Мацюшэўскі.
Каментары