Крамы, якімі валодаюць замежнікі, падвергліся ў ноч з чацвярга на пятніцу нападам і рабунку ў паўднёваафрыканскім Ёханэсбургу.
Паліцыя ўжыла слезацечны газ і гумовыя кулі, каб разагнаць вандалаў, у той час як каля 200 чалавек, грамадзян іншых краін, схаваліся ў адным з паліцэйскіх участкаў. Паводле дадзеных Франс прэс, паліцыя арыштавала 12 чалавек.
Ксенафобскі напад адбыўся праз некалькі гадзін пасля таго, як у курортным горадзе Дурбан тысячы людзей выйшлі на мітынг супраць хвалі ксенафобіі, якая ахапіла краіну.
Пяць чалавек загінулі ў нападах, учыненых у апошнія тыдні супраць замежнікаў, сярод загінулых — двое замежнікаў і тры грамадзяніна Паўднёва-Афрыканскай Рэспублікі, уключаючы 14-гадовага хлопчыка.
Многія беспрацоўныя паўднёваафрыканцы вінавацяць замежнікаў у тым, што яны захапілі іх працоўныя месцы, у той час як беспрацоўе ў краіне дасягнула 24%.
У чацвер позна ўвечары на ўсходзе Ёханэсбурга натоўп стаў рабаваць крамы, якія належаць замежнікам. Былі таксама падпаленыя некалькі аўтамабіляў і будынак, дзе пражываюць замежныя грамадзяне.
Цяперашні дзейны губернатар правінцыі Гаутэнг, цэнтрам якой з'яўляецца Ёханэсбург, асудзіў гвалт.
«Мы павінны — кожны паўднёваафрыканец, каму дарагі мір, — устаць і асудзіць гэта, — сказаў Кедані Махлангу. — Сёння мы не можам сказаць, што мы хочам жыць у ізаляцыі, калі ўвесь свет глабалізуецца».
Па паведамленні Рэйтэр, у пятніцу ў Ёханэсбургу паліцэйскія разагналі групу замежных грамадзян, узброеных мачэтэ для самаабароны.
Прэзідэнт ПАР Джэйкаб Зума таксама раскрытыкаваў тых, хто здзяйсняе ксенафобскія напады ў краіне.
«Ні пачуццё расчаравання, ні пачуццё абурэння не могуць апраўдаць напады на замежнікаў і спусташэнне іх крамаў», — сказаў Зума, звяртаючыся да парламента.
У той жа час караля зулу Гудвіла Звеліціні абвінавачваюць у тым, што ён сваёй заявай «замежнікі павінны з'язджаць да сябе дадому» толькі распаліў сітуацыю. Аднак сам кароль заяўляе, што яго словы былі скажоныя.
Паліцыя арганізавала кругласутачныя цэнтры хуткага рэагавання, каб змагацца з нападамі на замежных грамадзян.
З 2008 года па меншай меры 62 чалавекі загінулі ў Паўднёвай Афрыцы ў такога роду нападах.
Цяпер чытаюць
Прапаганда прычапілася да «дарагога» гадзінніка Латушкі. Той расказаў, што гэта за мадэль насамрэч33
Каментары