«Марым пра нармальнае FM-вяшчанне ў Беларусі» — «Еўрарадыё» споўнілася 10 гадоў
26 лютага 2006 года адбыўся першы эфір «Еўрапейскага радыё для Беларусі» (Еўрарадыё).
Як распавёў у інтэрв'ю baj.by галоўны рэдактар «Еўрарадыё» Віталь Зыблюк, гісторыя радыёстанцыі пачалася з таго, што адзін з былых кіраўнікоў «Радыё 101.2», адзін з заснавальнікаў першай «Рацыі» Дзмітрый Новікаў вырашыў стварыць новае СМІ. Такім чынам у 2005 годзе ў Польшчы паўстала новае радыё. У склад заснавальнікаў тады ўвайшлі розныя структуры, у тым ліку і Беларуская асацыяцыя журналістаў. Праз колькі месяцаў нарэшце адбыўся першы эфір. Першапачаткова «Еўрарадыё» пачало вяшчаць праз спадарожнік. Тады ж стартаваў і наш сайт.
Зараз на спадарожніку і праз сайт мы вяшчаем круглыя суткі, а таксама ў нас ёсць набор хваляў, якія пакрываюць розныя рэгіёны Беларусі. Мы арандуем перадатчыкі ў Польшчы, з якіх вяшчаем на Брэсцкую вобласць; ёсць перадатчыкі ва Украіне, якія пакрываюць Піншчыну; на ультракароткіх хвалях мы кругласуткава вяшчаем на поўнач Беларусі. Але ў марах у нас – усё ж атрымаць нармальнае FM-вяшчанне ў самой Беларусі.
27 лютага ў клубе «РэПаблік» (17:30) «Еўрарадыё» ладзіць традыцыйны святочны канцэрт «Даём рады».
«Ніякімі сюрпрызамі загадзя дзяліцца не буду, — зазначыў Віталь Зыблюк — Няхай гэта застанецца сапраўды сюрпрызам для тых, хто прыйдзе».
Каментары